مەكتەپ وقۋشىلارىنا كومپيۋتەر ساتىپ الۋعا كومەكتەسەتىن اكتسيا وتەدى
بۇل تۋرالى وكق وتكەن ونلاين- باسپا ءسوز كونفەرەنتسياسىندا ق ر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ەسەنعازى يمانعاليەۆ ايتتى، دەپ حابارلايدى قازاقپارات ءتىلشىسى.
«ق ر ءبىلىم جانە عىلىم مينيسترلىگى «اتامەكەن» ۇلتتىق كاسىپكەرلەر پالاتاسىمەن، سونداي- اق «مەنىڭ اتامەكەنىم» قوعامدىق بىرلەستىگىمەن بىرلەسىپ «مەكتەپكە جول» قوعامدىق قوزعالىسى اياسىندا «OQY'SHYNY QOLDA» رەسپۋبليكالىق قايىرىمدىلىق اكتسياسىن باستادى. اكتسيا كومپيۋتەرلىك تەحنيكانى، نوۋتبۋكتەردى، پلانشەتتەردى ساتىپ الۋعا جانە ونى قايتارىمدى نەگىزدە مۇقتاج ستۋدەنتتەرگە بەرۋگە باعىتتالعان. كومپيۋتەرلىك جابدىق دەمەۋشىلەر، مەتسەناتتار، ەرىكتىلەر ارقىلى ساتىپ الىنادى. اكتسيا سونىمەن قاتار، بالالار مەن جەكەلەگەن ساناتتاعى وتباسىلارعا جوعارى جىلدامدىقتى ينتەرنەتكە قول جەتكىزۋدى قامتاماسىز ەتۋگە باعىتتالعان»، - دەدى ەسەنعازى يمانعاليەۆ.
سونىمەن قاتار، ول بارلىق قازاقستاندىقتارعا، وتاندىق كاسىپورىندار مەن كومپانيالارعا ۇندەۋ تاستاپ، بارلىعىن اكتسياعا قاتىسۋعا جانە بالالارعا قاشىقتان وقىتۋعا كومەكتەسۋگە شاقىردى.
«مينيسترلىك مەكتەپتەردە مونيتورينگ جۇرگىزىپ، اقىلى جابدىقتى الۋدا باسىمدىقتى انىقتاۋ كەزىندە ەسكەرىلەتىن ولشەمدەردى اتادى. الەۋمەتتىك از قامتىلعان وتباسى بالالارى مەن جەتىم بالالارعا كومەك كورسەتىلەدى. اكتسيا اياسىندا جابدىققا تاپسىرىس بەرۋ ءۇشىن qoldau.edu.kz ارنايى سايتى ىسكە قوسىلدى. سونداي- اق، ءا ا ك الماعان، تابىسى كۇنكورىس دەڭگەيىنەن تومەن، اتا- اناسى مۇگەدەك نەمەسە جالعىز باستى، كوپبالالى وتباسىلاردىڭ بالالارىنا كومەك كورسەتىلەدى»، - دەپ تولىقتىردى كوميتەت ءتوراعاسى.