ىلە- الاتاۋى ۇلتتىق پاركىندەگى بەتون قۇرىلىستار الىنادى

الماتى. قازاقپارات - ىلە- الاتاۋى ۇلتتىق پاركىنىڭ اۋماعىنداعى بەتون قۇرىلىستار الىنادى. بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگىنەن ءمالىم ەتتى، دەپ حابارلايدى قازاقپارات.

مينيسترلىكتىڭ اقپاراتىنا سايكەس، قوعامدىق كەڭەس مۇشەلەرى ىلە- الاتاۋى ۇلتتىق پاركىندەگى ەكوتۋريزمدى دامىتۋ جۇمىستارىمەن تانىسقان. «تۋرانگا گرۋپ» كومپانياسىنىڭ ديرەكتورى الەكساندر گۋجاۆين بۇگىنگە دەيىن اتقارىلعان جۇمىستارمەن تانىستىردى.

«اۆتوتۇراق جاسالىپ، سپورت الاڭى ورناتىلدى. سونىمەن قاتار العاشقى قوعامدىق اجەتحانانى قۇراستىرىپ كوتەرۋ جالعاسۋدا. نىسانداردىڭ بارلىعىندا، سونىڭ ىشىندە ۆيزيت ورتالىقتا گەوبۇراماشەگەلەر پايدالانىلدى. ءبىز نىسانداردى تۇرعىزۋ كەزىندە بەتون قولدانبايمىز، قازان شۇڭقىر قازبايمىز. كورىپ تۇرعانىڭىزداي، مىنا جەردە جىرا بار. كەلەسى اپتادا مۇندا قوعامدىق اجەتحانانىڭ تازارتۋ جۇيەسىن ورنالاستىرۋ جۇمىستارىن باستايمىز. اجەتحانا ەرلەرگە ارنالعان – 5، ايەلدەرگە - 5 جانە قوزعالىسى شەكتەۋلى ادامدارعا ارنالعان 2 بولمەدەن تۇرادى»، - دەيدى ا. گۋجاۆين.

ونىڭ ايتۋىنشا، جەردى جالداعان بۇرىنعى يەلەردەن قالعان بەتون قۇرىلىستىڭ ءبارىن كومپانيا الىپ تاستاۋدى ۇيعارعان. ولاردىڭ ورنىندا قوعامدىق كولىك ايالداماسى پايدا بولادى. مونيتورينگىلەۋ بارىسىندا قوعامدىق كەڭەس مۇشەلەرى ايۋساي ۆيزيت- ورتالىعىن سالۋ كەزەڭىمەن تانىسىپ، جابايى تابيعاتتا ۋاقىت وتكىزۋگە مۇمكىندىك بەرەتىن «تامىر» مەكتەبىنە باردى.

جاقىن ارادا «تۋرانگا گرۋپ» كومانداسى «تامىر» مەكتەبىمەن بىرگە جاڭادان ەكى سوقپاق جول سالۋدى جوسپارلاۋدا. ءبىرىنشى سوقپاق جول «جاس قايىڭ» دەپ اتالادى. ونىمەن كىشكەنتاي بالاسى بار اتا- انالار مەن ەرەسەكتەر سەرۋەندەيدى. ەكىنشى سوقپاق جول مۇمكىندىگى شەكتەۋلى كەلۋشىلەرگە ارنالعان. كەلەشەكتە جىلدام قوزعالاتىن مۇگەدەكتەر ارباسى دا ساتىپ الىنۋى مۇمكىن.

ەسكە سالساق، ۇلتتىق پارك جانىنداعى قوعامدىق كەڭەس قۇرامىنا 19 ادام كىرەدى. ولاردىڭ اراسىندا تۋريستىك ۇيىم وكىلدەرى، عالىمدار، سپورتشىلار، بيزنەسمەندەر، ەكوبەلسەندىلەر، قوعام قايراتكەرلەرى بار. جوبا شەڭبەرىندە 155 شاقىرىم سوقپاقجول سالۋ جوسپارلانۋدا. 7 ۆيزيت- ورتالىق سالىنادى. وندا كەلۋشىلەر ۇلتتىق پارك تۋرالى اقپارات الا الادى. ەتنواۋىل، كەمپينگ، شاتىرلار لاگەرى، 10-15 نومىرلىك گلەمپينگ (تاۋداعى تۇراق) پەن ءبىر كاراۆانينگ (اۆتوۇيلەرمەن ساياحاتتاۋشىلارعا ارنالعان جابدىقتالعان اۆتوتۇراق) پايدا بولادى.