قارجى ءمينيسترى سالىق بويىنشا جوسپاردىڭ نەلىكتەن ورىندالماعانىن ايتتى

نۇر-سۇلتان. قازاپارات - ق ر قارجى ءمينيسترى ەرۇلان جاماۋبايەۆ بيىلعى جەتى ايىنىڭ قورىتىندىسى بويىنشا مەملەكەتتىك بيۋجەتتىڭ اتقارىلۋ كورسەتكىشتەرى جايىندا ەسەپ بەردى، دەپ حابارلايدى قازاقپارات ءتىلشىسى.

«رەسپۋبليكالىق بيۋجەتكە كىرىستەر (ترانسفەرتتەردى ەسەپكە الماعاندا) 2 تريلليون 714 ميلليارد تەڭگە سوماسىندا ءتۇستى نەمەسە جوسپار 83,3 پايىزعا اتقارىلدى. كىرىستەر بويىنشا جوسپاردىڭ اتقارىلماۋى 544 ميلليارد تەڭگەنى قۇرادى. نەگىزگى اتقارىلماۋ سومالارى قوسىلعان قۇن سالىعى جانە كورپوراتيۆتىك تابىس سالىعىنا تيەسىلى بولدى»، - دەدى مينيستر ۇكىمەت وتىرىسىندا.

كورپوراتيۆتىك تابىس سالىعىنىڭ اتقارىلماۋىنا كەلەسى فاكتورلار اسەر ەتكەن:

- نەگىزگى ەكسپورتتىق پوزيتسيالار بويىنشا باعانىڭ ورتا ەسەپپەن 16,1 پايىزعا تومەندەۋى (شيكى مۇنايعا - 35,8 پايىز، مىرىش - 21,5 پايىز، اليۋميني - 12,7 پايىز، فەرروحروم - 8,4 پايىز، مىس - 8,5 پايىز جانە قورعاسىن - 9,8 پايىز)، بۇل تاۋ-كەن سەكتورىنداعى ءىرى سالىق تولەۋشىلەردەن تۇسەتىن تۇسىمدەردىڭ 42,6 پايىزعا ازايۋىنا اكەپ سوقتىردى؛

- 830 ءىرى سالىق تولەۋشى بويىنشا مالىمدەلگەن اۆانستىق تولەمدەر سوماسىنىڭ وتكەن جىلدىڭ 7 ايىمەن سالىستىرعاندا 184,3 ميلليارد تەڭگەگە تومەندەۋى؛

- ەكىنشى دەڭگەيدەگى بانكتەردەن تۇسەتىن تۇسىمدەردىڭ 30 ميلليارد تەڭگەگە ازايۋى.

قوسىلعان قۇن سالىعى بويىنشا جوسپاردىڭ نەگىزگى اتقارىلماۋ سەبەپتەرى:

- 2019-جىلدان ەداۋىر اۋىسپالى دەبەتتىك قالدىقتىڭ بولۋىنا بايلانىستى وتكەن جىلدىڭ ۇقساس كەزەڭىمەن سالىستىرعاندا قوسىلعان قۇن سالىعىن قايتارۋدىڭ 84,4 پايىزعا ءوسۋى؛

- «ەلەكتروندىق شوت- فاكتۋرالار» ا ج دەرەكتەرى بويىنشا ساتۋ بويىنشا اينالىمداردىڭ 12,4 پايىزعا ازايۋى.

نەگىزگى تومەندەۋ تاۋ- كەن ونەركاسىبى سالاسىنا تيەسىلى، وندا اينالىمدار 2019-جىلدىڭ ۇقساس كەزەڭىمەن سالىستىرعاندا 34,4 پايىزعا نەمەسە 3,5 تريلليون تەڭگەگە تومەندەگەن.

- كارانتين رەجيمى ەنگىزىلۋىنە بايلانىستى ىسكەرلىك بەلسەندىلىكتىڭ تومەندەۋى شامامەن 19,3 مىڭ سالىق تولەۋشى تولەمدەرىن 187 ميلليارد تەڭگەگە تومەندەتتى؛

- قازاقستان رەسپۋبليكاسىنىڭ ءۇشىنشى ەلدەرمەن تاۋار اينالىمى 9,1 پايىزعا، ونىڭ ىشىندە ماۋسىم ايىندا 23,6 پايىزعا تومەندەۋى جانە قىتاي حالىق رەسپۋبليكاسىنان تاۋارلار يمپورتتايتىن كولىك قۇرالدارىنىڭ سانى 16,7 پايىزعا تومەندەۋى تىركەلدى.