قىرىمبەك كوشەربايەۆ: قازاق حالقى وركەنيەتتىڭ جاڭا تالاپتارىنا ساي ءومىر سۇرە ءبىلۋى كەرەك

نۇر-سۇلتان. قازاقپارات - ق ر مەملەكەتتىك حاتشىسى، قوعام قايراتكەرى قىرىمبەك كوشەربايەۆ عالامدىق ىندەتتەن كەيىنگى مەملەكەتتىڭ الدىندا تۇرعان ماقسات- مىندەتتەر تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«عالامدىق ىندەتكە بايلانىستى ايتار بولسام، جاقىندا مەملەكەت باسشىسى قاسىم-جومارت توقايەۆ ماۋسىم ايىندا «انا ءتىلى» گازەتىنە «قازاق حالقىنىڭ تاعدىرى تاريح تارازىسىندا تۇر» اتتى ماقالا جاريالادى.

وندا مەملەكەت باسشىسى كوپتەگەن كوكەيتەستى ماسەلەگە بايلانىستى ءوزىنىڭ وي-پىكىرىن ايتتى. ىندەتكە قاتىستى، ونى جەڭىپ شىعۋدىڭ قانداي جولدارى بارى تۋرالى ءسوز قوزعالدى. ەلدىڭ بىرلىگى مەن ىنتىماعىنىڭ ارقاسىندا «مىڭ ءولىپ، مىڭ تىرىلگەن» قازاق حالقى بۇل قيىندىقتان دا امان شىعاتىنىنا ەش كۇمان جوق. ءبىراق ءبىر اقيقات بار. بۇل عالامدىق ىندەت پەن الەۋمەتتىك- ەكونوميكالىق داعدارىستان كەيىن دۇنيە بۇرىنعىداي بولمايدى. ءبىزدى ۇلكەن وركەنيەتتىك وزگەرىستەر كۇتىپ تۇر. سوندىقتان ءبىز وعان دايىن بولۋىمىز كەرەك. سوندىقتان ءبىز زيالى قاۋىممەن بىرلەسىپ، ۇلكەن رۋحاني ىزدەنىستەردىڭ الدىندا تۇرمىز. سول سۇراقتاردىڭ جاۋابىن بىرگە ايقىنداۋىمىز كەرەك»، - دەدى «اباي TV» ارناسىنا بەرگەن سۇحباتىندا.

مەملەكەتتىك حاتشىنىڭ ايتۋىنشا، زاماننىڭ جاڭا تەگەۋرىندەرىنە لايىقتى جاۋاپ بەرۋ كەرەك.

سونىمەن قاتار قىرىمبەك كوشەربايەۆ «رۋحاني جاڭعىرۋ» باعدارلاماسىنىڭ جۇزەگە اسىرىلۋ بارىسى قاي كەزەڭدە تۇرعانىن ايتىپ ءوتتى.

«رۋحاني جاڭعىرۋ» باعدارلاماسىنىڭ جاڭا تىنىسى اشىلۋى كەرەك دەپ ەسەپتەيمىز. سەبەبى زامان وزگەرىپ جاتىر. وسى ۋاقىتقا دەيىن بۇل باعىتتا كوپتەگەن جۇمىس اتقارىلدى. ءبىراق قازىر جاڭا زاماننىڭ كەلبەتىنە ساي جاڭا رۋحاني جوبالار قاجەت. سوندىقتان وسى مۇمكىندىكتى پايدالانا وتىرا، زيالى قاۋىمنان وتىنەرىمىز، بيلىكپەن بىرگە زيالى قاۋىم رۋحاني جوبالاردى جۇزەگە اسىرۋى كەرەك. بىزگە باسەكەگە قابىلەتتى تولىققاندى ادام قاجەت. ماسىلدىققا ورىن جوق. داعدارىسقا جاڭا مۇمكىندىكتەر مەن جەتىستىكتەردىڭ باستاۋى دەپ قاراۋىمىز كەرەك»، - دەيدى قىرىمبەك كوشەربايەۆ.

مەملەكەتتىك حاتشى بۇل رەتتە جاپون حالقىنىڭ 1945-جىلعى تاريحىن ەسكە الدى.

ونىڭ ايتۋىنشا، 1945-جىلى 15- تامىزدا جاپونيا يمپەراتورى حيروحيتو كيوتو قالاسىندا ءسوز سويلەگەن.

«جاپونيادا يمپەراتوردى كۇننىڭ ساۋلەسىنەن جارالعان ادام دەپ ەسەپتەيدى. يمپەراتوردىڭ ايتقان ءسوزى جۇرتتى بىرىكتىرىپ، ۇيىستىرادى. ءتارتىپ بويىنشا جاپوندىقتار يمپەراتور سويلەگەندە تىزەرلەپ تۇرىپ، تىڭدايدى ەكەن. بۇل جولى حيروحيتو «حالىقتىڭ ءبارى تۇرەگەپ تۇرسىن، ال يمپەراتوردىڭ ءوزى تىزەرلەپ تۇرىپ ەلىنىڭ الدىنان كەشىرىم سۇرايدى» دەپ ۇندەۋ جاريالايدى.

ويتكەنى جاپون ارمياسى تاس-تالقان بولىپ، ا ق ش حيروسيما مەن ناگاساكي قالالارىنا اتوم بومباسىن تاستادى. سول سوزىندە حيروحيتو «جان توزبەس قيىندىققا شىدايىق، ەموتسياعا جول بەرمەي، نىعايىپ، بىرىگىپ، ەڭبەك ەتەيىك» دەگەن ءسوزدى ايتادى.

يمپەراتور مەملەكەتتى قۇتقارۋدىڭ بىردەن-ءبىر جولى - ادامدى دامىتۋ دەيدى. ال قازىر جاپونيا الەمدەگى تەحنولوگياسى جوعارى دامىعان بەس مەملەكەتتىڭ قاتارىندا. سولاي بولا تۇرا وزدەرىنىڭ ۇلتتىق ءداستۇرىن قالاي ساقتاپ قالعانىن بىلەسىز. سوندىقتان جاپوندىقتاردىڭ كورسەتكەن جولى - بىزگە ۇلگى»، - دەگەن مەملەكەتتىك حاتشى كەزىندە الاش قايراتكەرلەرىنىڭ دە ەرلىگىنە جاپون حالقىنىڭ جەتىستىگى رۋح بەرگەنىن ەسكە الدى.

قىرىمبەك كوشەربايەۆ سيفرلىق تەحنولوگيالار، جاساندى ينتەللەكت زامانى كەزىندە ۇلتتىق قۇندىلىقتاردان ايىرىلىپ قالماي، رۋحاني قۇندىلىقتاردى بايىتا وتىرىپ، وركەنيەتتىڭ جاڭا تالاپتارىنا ساي ءومىر سۇرە ءبىلۋى كەرەكتىگىن ايتتى.