اتىراۋدا «ماڭگىلىك اباي» اتتى ونلاين تەلەمارافون ءوتتى

None
None
اتىراۋ. قازاقپارات - اتىراۋدا 10- تامىز - اباي كۇنىنە وراي ۇيىمداستىرىلعان «ماڭگىلىك اباي» اتتى ونلاين تەلەمارافون كوپشىلىككە «اتىراۋ» تەلەارناسى مەن وبلىس اكىمدىگىنىڭ الەۋمەتتىك جەلىلەرى ارقىلى كورسەتىلدى، دەپ حابارلايدى قازاقپارات وڭىرلىك كوممۋنيكاتسيالار قىزمەتىنە سىلتەمە جاساپ.

تەلەمارافوندا اتىراۋ وبلىسىنىڭ اكىمى ماحامبەت دوسمۇحامبەتوۆ ءوڭىر تۇرعىندارىن اباي كۇنىنىڭ ەڭ العاش مەرەكەلەنۋىمەن قۇتتىقتادى.

«بيىل الاشتىڭ الىبى، قازاقتىڭ داناسى اباي قۇنانباي ۇلىنىڭ تۋعانىنا 175 جىلدىق مەرەيتويى اتالىپ وتۋدە. وسىعان وراي بىلتىر مەملەكەت باسشىسى دارا تۇلعانىڭ مەرەيتويىن تاعىلىمدىق تۇرعىدا اتاپ ءوتۋدى، توي-مەرەكە ەمەس، وي-بەرەكەنىڭ ۇيىتقىسىنا اينالۋىن تاپسىرعان بولاتىن. ۇلى ويشىلدى ۇلىقتاۋدىڭ نەگىزگى ماقساتى — جاس بۋىننىڭ ساناسىنا عۇلامانىڭ ىزگىلىك ءتامسىلىن بارىنشا ءسىڭىرۋ. اباي جاققان ءبىلىم-عىلىمنىڭ شامشىراعىن مەملەكەتشىلدىكتىڭ اداستىرماس تەمىرقازىعىنا اينالدىرۋ. دانا ابايدىڭ ەسىمى الەمدىك دەڭگەيگە جاڭا لەپپەن شىعارىنا سەنەمىن. ابايدى تانۋ - الاشتى تانۋ، قازاق حالقىنىڭ تەرەڭ دۇنيەتانىمى مەن تاعىلىمدى بولمىسىن تانۋ دەگەن ءسوز. ويتكەنى، ونىڭ تۋىندىلارىندا ۇلتتىڭ بولمىس- ءبىتىمى، تۇرمىس- تىرشىلىگى، پايىم- پاراساتى، ءدىلى مەن ءتىلى، ءدىنى مەن رۋحى ايرىقشا كورىنىس تاپقان. تاۋەلسىزدىكتىڭ ارقاسىندا اباي الەمىنىڭ تەرەزەسى التى الاشقا عانا ەمەس، تۇتاس ادامزاتقا ايقارا اشىلدى. جىلدار وتە تاۋ تۇلعامىزدىڭ ەسىمى جاھان جاۋھارلارىنىڭ ورتاسىنان ويىپ تۇرىپ ورىن الىپ، الەمنىڭ اسىل قازىناسىنا اينالارى ءسوزسىز»، - دەدى وبلىس اكىمى ماحامبەت دوسمۇحامبەتوۆ.

«ماڭگىلىك اباي» ونلاين تەلەمارافونىنا وڭىردەگى قالا، اۋداندارىنان، سونداي-اق، اۋىلدارىنان رۋحانيات، ونەر مەن مادەنيەت وكىلدەرى قاتىستى.

كەمەڭگەردىڭ ولەڭدەرى مەن قاراسوزدەرى وقىلىپ، اباي اندەرى شىرقالدى. سونداي-اق، ابايدىڭ ءومىر جولى، شىعارماشىلىعىنان سىر شەرتەتىن ەڭبەكتەر دە كوپشىلىك نازارىنا ۇسىنىلدى.

ەسكە سالا كەتەلىك، بۇدان بۇرىن اتىراۋدا ومىرگە كەلگەن سابيگە اباي ەسىمى بەرىلگەن ەدى.

سوڭعى جاڭالىقتار