دينوزاۆر داۋىرىنەن قالعان جەمىس

نۇر-سۇلتان. قازاقپارات - كوكوس پالماسى سوناۋ دينوزاۆرلار داۋىرىنەن كەلە جاتقان الەمنىڭ ەڭ ماڭىزدى ون اعاشىنىڭ قاتارىنا كىرەدى.

بۇل اعاش اتاقتى يتاليالىق ساياحاتشى ماركو پولونىڭ (1254-1324) كىتابىندا سيپاتتالعان. كوكوس پالماسىنىڭ شىققان جەرى - زوند ارالدارى مەن پولينەزيا ايماعى سانالادى.

كوكوستىڭ تروپيكالىق ايماقتار مەن الىس ايماقتاعى ارالدارعا تارالۋى ەكى جولمەن جۇزەگە اسقان: پالمادان سۋ بەتىنە قۇلاعان جەمىسى (ونىڭ سۋعا تۇكەن جەمىسى 110 كۇنگە شىدايدى) جانە ادامداردىڭ تاسىمالى ارقىلى. بۇگىندە وڭتۇستىك- شىعىس ازيانىڭ 5 ميلليون گەكتار جەرىن كوكوس پالماسى الىپ جاتىر. سونداي- اق، ولار ءۇندىستاندا، كاريب ارالدارىندا، گاۆاي ارالدارىندا، وڭتۇستىك فلوريدادا، وڭتۇستىك كاليفورنيادا وسىرىلەدى. اعاشتىڭ بيىكتىگى 25 مەتر، ال جاپىراقتارىنىڭ ۇزىندىعى 4 مەتردى قۇرايدى. كوكوس - تەڭىز جاعالاۋىنىڭ وسىمدىگى.

كوكوس جاڭعاقتارىن ءبىز بىلەتىن جاڭعاقتاردىڭ قاتارىنا قوسقاننان، كوكوس پالماسىنىڭ قۇرعاق سۇيەكتەرى دەپ اتاعان الدەقايدا دۇرىس بولماقشى. جەمىستىڭ ىشىندە ءسۇت (نەمەسە شىرىن) پەن جۇمساق ەت بار. ءپىسىپ- جەتىلمەگەن كوكوس جەمىسىندە (5 اي) جارتى ليتردەن استام ءمولدىر ءتۇستى قىشقىل سۇيىقتىق بولادى. جاڭعاق ابدەن پىسكەندە، وسى سۇيىقتىق قويۋلانىپ، جۇمساق ەتكە اينالادى. بۇل جۇمساقتى «كوپرا» دەپ اتايدى. كوكوس جاڭعاقتارىىڭ ديامەترى 30 سانتيمەتردەن اسادى، ال سالماعى 2-4 كەلىدەي شىعادى.

قۇرامى امبەباپ كەلەتىن كوكوس جەمىستەرى ادام اعزاسىنا وتە پايدالى. ونىڭ قۇرامىندا ۆ1, ۆ2, ۆ5, س دارۋمەندەرى، اقۋىزدار، كومىرتەك، ماي، قانت، كالتسي، كالي، فوسفور سىندى ميكروەلەمەنتتەر جانە جاسۇنىق بار. كوكوس مايىنىڭ قۇرامىندا قانداعى حولەستەرين مولشەرىن تومەندەتەتىن قىشقىل بار.

كوكوس جاڭعاعى وتە ءدامدى ءارى پايدالى. اسپازدىق سالاسىندا ونى سەرگىتەتىن سۋسىن، الكوگولدىك سۋسىن دايىنداۋدا قولدانادى. جانە دە جۇمساق ەتى تاتتىلەرگە قوسىلىپ، بالىقتى نەمەسە ەتتى قۋىرعاندا اۋناتىلادى. ونىڭ جۇمساق ەتىن سالاتقا، سورپالارعا، بالىشكە پايدالانساڭىز، تەڭدەسسىز دامگە يە بولادى.

كوكوس جاڭعاعى مەديتسينا سالاسىنا دا پايداسىن تيگىزىپ كەلەدى. ول ادامنىڭ يممۋنيتەتىن، كۇشىن نىعايتىپ، كوزدىڭ كورۋىن جاقسارتادى، ميكروبقا قارسى تۇرا الادى. كوكوس سۋسىنى ساحار ديابەتىمەن اۋىراتىندارعا جاقسى اسەرىن بەرەدى. ونىڭ ەتىن سىعۋ ارقىلى الىنعان ءسۇت جۇرەك- قانتامىرى اۋرۋلارىن قالپىنا كەلتىرەدى.

كوكوس مايى كوسمەتيكا سالاسىندا ۇلكەن جەتىستىكتەرگە جەتىپ وتىر. ول تەرىنى نارلەندىرىپ، جىلتىراتادى، اجىمدەردى جازادى. مايدى دەنەڭىزگە جاعىپ كورسەڭىز، ناعىز «جۇماق راقاتىن» سەزىنەسىز.

امبەباپ مايدىڭ قاسيەتتەرى مۇنىمەن بىتپەيدى. ماماندار كوكوس مايىن سۇيەكتى، ءتىستى نىعايتۋ ءۇشىن، وستەوپوروزا اۋرۋى بارىسىندا قولدانۋعا كەڭەس بەرەدى. مايدىڭ قۇرامىندا حولەستەرين جوق. ول اتەروسكلەروزدىڭ دامۋىن تەجەيدى.

كوكوستىڭ كالوريالىعى - 354 ككال. تاعامدىق قۇندىلىعى: اقۋىز - 3,33 گ ر، ماي - 33,49گ، كومىرتەك - 6,23 گ.

massaget.kz