التاي كولگىنوۆ ەلوردا تۇرعىندارىنا ۇندەۋ جاسادى

نۇر- سۇلتان. قازاقپارات - نۇر- سۇلتان اكىمى التاي كولگىنوۆ قالا تۇرعىندارىن ساقتىق شارالارى مەن سانيتاريا نورمالارىن كارانتيننەن كەيىن دە بارىنشا ساقتاۋعا شاقىردى.

بۇل تۋرالى ول Instagram-داعى پاراقشاسىندا جازدى، دەپ حابارلايدى قازاقپارات.

«كارانتين الىنعاننان كەيىن ەپيدەميولوگيالىق جاعدايدىڭ قالاي بولارىنا تالداۋ جاسادىق. بولجامعا سايكەس، جاعداي بىردەن جاقسارىپ كەتپەيدى. ورۆي ماۋسىمىن ەسكەرسەك جىلداعىداي مەديتسينالىق مەكەمەلەرگە اۋرىتپالىق تۇسەدى. قازىردىڭ وزىندە دايىندىق جۇمىستارىن جۇرگىزىپ جاتىرمىز. ەمحانا، اۋرۋحانالارعا قوسىمشا كومەك كورسەتىلدى. 600-دەن استام فلۋومەتر، 500-گە جۋىق وتتەگى كونسەنتراتورى، 500-گە جۋىق ارنايى توسەك- ورىن، وكپەنى جاساندى جەلدەتۋ جانە ك ت اپپاراتتارى الىندى. الداعى ۋاقىتتا جەدەل جاردەم كولىكتەرى دە جەتكىزىلەدى. ەكى اپتا ىشىندە قالاعا 110 توننادان استام ءدارى جەتكىزىلدى. ءبىز بۇل جۇمىستاردى جۇيەلى نەگىزدە جالعاستىرا بەرەمىز»، - دەدى ا. كولگىنوۆ.

ەلوردا باسشىسىنىڭ ايتۋىنشا، قاجەت بولعان جاعدايدا بارلىق 16 ينفەكسيالىق ستاتسيونار قايتا اشىلادى.

«سپورتتىق عيماراتتار مەن باسقا دا ءبىرقاتار نىسان كەز كەلگەن ساتتە ورىندار ازىرلەي الادى. جاسىراتىنى جوق، قالا تۇرعىندارى العاشقى كارانتيننەن كەيىن سانيتاريا نورمالارىن ساقتامادى. بۇل، كەرى اسەرىن تيگىزىپ، ىندەتكە شالدىققانداردىڭ سانى كۇرت ءوستى. دارىگەرلەر مەن مەديتسينالىق ۇيىمدار مۇمكىندىگىنشە بارىن سالىپ جۇمىس ىستەدى. كارانتين شارالارى عانا جاعدايدى تۇراقتاندىرۋعا مۇمكىندىك بەردى»، - دەدى ول.

اتاپ وتىلگەندەي، ينفەكسيالىق ستاتسيونارلارداعى توسەك- ورىنعا سۇرانىس شىلدە ايىنىڭ باسىنان باستاپ 99 پايىزدان 18,5 پايىزعا دەيىن تومەندەدى. 16 ستاتسيوناردىڭ بەسەۋى جابىلدى. ولاردا بولعان بارلىق ناۋقاستار جازىلىپ شىقتى. ك ۆ ي ماسەلەلەرى بويىنشا جەدەل جاردەم شاقىرۋ سانى 9,5 ەسەگە جۋىق تومەندەپ، تاۋلىگىنە 500-دەن 53-كە دەيىن ازايدى. ستاتسيونارلاردا پنيەۆمونيامەن اۋىراتىن ناۋقاستاردىڭ سانى 6 ەسە قىسقاردى. №1 جانە №2 قالالىق بالالار اۋرۋحاناسى تامىز ايىنىڭ باسىنان باستاپ بۇرىنعى رەجيمدە جۇمىس ىستەي باستادى.

«ەرتەڭنەن باستاپ قالالىق ەمحانالار جوسپارلى قابىلداۋدى قايتا جالعاستىرادى. ءبىراق ىندەتتى جۇقتىرۋ قاۋپى جويىلدى دەۋگە ءالى ەرتە. ينفەكسيانى توقتاتۋ ءۇشىن ساقتىق شارالارى مەن سانيتاريا نورمالارىن بارىنشا ساقتاۋ قاجەت»، - دەپ جازدى التاي كولگىنوۆ.