بۇگىن «اباي ارمانى» اتتى ونلاين كونسەرت وتەدى

None
None
نۇر-سۇلتان. قازاقپارات - ەل رۋحانياتى ءۇشىن ايرىقشا اباي كۇنىنە وراي بۇگىن ساعات 21:00 دە قازاق كونسەرتتىڭ YouTube ارناسىندا «اباي ارمانى» اتتى كونسەرتتىڭ ونلاين كورسەتىلىمى وتەدى، دەپ حابارلايدى قازاقپارات ءتىلشىسى.

قازاق كونسەرت باسپا ءسوز قىزمەتىنىڭ مالىمەتىنشە، ونلاين كونسەرتتە بەلگىلى انشىلەر، قازاقستاننىڭ ەڭبەك سىڭىرگەن قايراتكەرلەرى بيبىگۇل جانۇزاق، ازامات جىلتىركوزوۆ، مەدەت شوتابايەۆ، ەرلان رىسقالي، ارداق بالاجانوۆا جانە حالىقارالىق بايقاۋلاردىڭ لاۋرەاتتارى اسقار مۇقيات، اياۋلىم قاماجان ونەر كورسەتەدى.

ونلاين فورماتتا وتەتىن مەرەكەلىك كونسەرتتە ابايدىڭ اندەرى مەن ونىڭ ولەڭدەرىنە جازىلعان اندەر ورىندالادى.

«ۇلت رۋحانياتىنىڭ تەمىرقازىعىنا اينالعان ابايدىڭ 175 جىلدىعى اياسىندا «اباي كۇنى» دەگەن اتاۋلى داتانىڭ بەلگىلەنۋى ءبىز ءۇشىن قۋانىشتى جاڭالىق بولدى. ۇلى ابايدىڭ باي مۋزىكالىق مۇراسىندا ۇلتتىق ونەگە مەن مول تاعىلىم جاتىر. سونداي-اق پوەتيكالىق جانە كومپوزيتورلىق تۋىندىلارىمەن قازاق مۋزىكاسىنا جاڭا لەپ اكەلگەن ابايدىڭ ءان مۇراسى ەرەكشە سۇلۋلىعىمەن، كوركەمدىك بايلىعىمەن، اۋەزدىلىگىمەن قۇندى. ابايدىڭ شىعارماشىلىعىنا عانا ءتان وسى قازاق كونسەرت سوليستەرى ۇسىناتىن جاڭا كونسەرتتىك باعدارلاما كورىنىس تابادى»، - دەدى قازاق كونسەرت باسشىسى جەڭىس سەيدۋللا ۇلى.

سوڭعى جاڭالىقتار