اقتوتى رايىمقۇلوۆا قازاقستاندىقتاردى اباي كۇنىمەن قۇتتىقتادى

نۇر-سۇلتان. قازاقپارات - بۇگىن اباي كۇنى. ەلىمىزدە تۇڭعىش رەت اتالىپ وتكەلى وتىرعان مەرەكەمەن قازاقستاندىقتاردى ق ر مادەنيەت جانە سپورت ءمينيسترى اقتوتى رايىمقۇلوۆا قۇتتىقتادى، دەپ حابارلايدى قازاقپارات.

اقتوتى رايىمقۇلوۆانىڭ قۇتتىقتاۋى بۇگىن مينيسترلىكتىڭ Facebook پاراقشاسىندا جاريالاندى.

«قۇرمەتتى وتانداستار! قادىرمەندى ارىپتەستەر! بۇگىن 10- تامىز الەمدىك دەڭگەيدەگى ويشىل، ۇلت رۋحانياتىنىڭ تەمىرقازىعى - اباي قۇنانباي ۇلىنىڭ تۋعان كۇنى. حالقىمىز وسى قۋانىشتى كۇندى ۇلكەن قۇرمەتپەن قارسى العالى تۇر. وسىلايشا حاكىم ابايعا، ۇلت مادەنيەتىنە قۇرمەت كورسەتۋدى جالعاستىرا بەرەمىز. ەلباسى، ۇلت كوشباسشىسى نۇرسۇلتان نازاربايەۆ: «اباي الەمى ءبىزدى جەتى تۇندە اداستىرمايتىن تەمىرقازىق ىسپەتتى»، - دەپ الداعى باعىت-باعدارىمىزدى كورسەتىپ بەرگەن بولاتىن.

ەندەشە، ءبىز وسى ءسوزدى ساناعا ءسىڭىرىپ، قاشاندا ۇلگى ەتىپ وتىرۋىمىز كەرەك. ال قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ءوزىنىڭ «اباي جانە 21-عاسىرداعى قازاقستان» اتتى كونتسەپتۋالدى ماقالاسىندا: «عۇلاما اباي - قازاق توپىراعىنان شىققان الەمدىك دەڭگەيدەگى كەمەڭگەر. ول كۇللى ادامزات بالاسىنا اقىل- ويدىڭ جەمىسىن سىيلادى»، - دەپ دارا پەرزەنتتىڭ دانالىق ورنىن ايقىنداپ كورسەتكەن ەدى.

راسىندا ۇلى اقىن ءوز شىعارمالارىندا ناسيحاتتاعان ەڭبەكسۇيگىشتىك، بىلىمگە دەگەن قۇشتارلىق، ىزگىلىك پەن پاراساتقا زەيىن قويىپ، تاربيە الۋ - بۇگىنگى ۇرپاقتارىنىڭ الدىندا تۇرعان مىندەتتىڭ ءبىرى.

سايىپ كەلگەندە، بۇل تەك بيىل ۇلى اقىننىڭ 175 جىلدىعىندا اتقارىلاتىن شارۋا ەمەس. وسى جىلدان باستاۋ الىپ، مادەنيەت جانە سپورت مينيسترلىگىنىڭ نەگىزگى يدەولوگيالىق باعىتىنا اينالادى. حاكىم اباي ايتقان ىزگى قۇندىلىقتار ومىرشەڭدىگىن جويماق ەمەس. ۇكىمەت قاۋلىسىمەن 10- تامىز - اباي كۇنى بولىپ جاريالانىپ، مەملەكەتتىك مەرەكەلەر كۇنتىزبەسىنە ەنگىزىلدى. بۇل - ۇلكەن قۋانىش! ءبارىڭىزدى شىن جۇرەكتەن قۇتتىقتايمىن! بۇل - ءسىز بەن ءبىزدىڭ ورتاق جەتىستىگىمىز»، -دەدى مينيستر.

سونداي-اق ول قۇتتىقتاۋدا بۇل كۇنى ەلىمىزدىڭ ورتالىقتارىندا، ءار ايماعىندا بۇگىنگى كۇننىڭ تالابىنا ساي، نەگىزىنەن online فورماتتام ادەني ءىس-شارالار وتەتىنىن ايتتى.

«بۇل كۇنى وڭىرلەردە توي تويلايتىن ەمەس، وي تولعايتىن ءبىرقاتار مازمۇندى ءىس-شارا جوسپارلانعان. بۇل رەتتە سەمەيدەگى قازاقستان رەسپۋبليكاسى «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق قورىعىندا «اباي جانە 21-عاسىر: بولاشاقپەن سۇحبات» اتتى حالىقارالىق كونفەرەنتسيا، «اباي مۇراسى - ۇلت رۋحانياتىنىڭ التىن وزەگى» اتتى ونلاين كەزدەسۋ، «اباي مۇراسى» اتتى ونلاين- مۋزەيلىك ءدارىس، «اباي - حالىقتىڭ دانالىعى» ۆيرتۋالدى كورمەسى، «اباي الەمى» ونلاين-كونسەرتى، ۇلى اقىن مەرەيتويىنا وراي بەينە- ءدارىس وتەدى.

وسىناۋ ورايلى ءساتتى پايدالانا وتىرىپ، اتالعان باسقوسۋلاردىڭ ءساتتى وتۋىنە تىلەكتەستىك بىلدىرگىم كەلەدى. قازىرگى الەمدىك كوروناۆيرۋس ىندەتىنە بايلانىستى بارلىق ءىس-شارا ونلاين فورماتتا وتەدى. سونداي-اق وسىعان دەيىن ءبىرشاما ءىس-شارا ۇيىمداستىرىلعانداي الداعى ۋاقىتتا دا كوپتەگەن ادەبي-مادەني ءىس-شارالار جالعاسىن تابا بەرەدى.

قۇرمەتتى وتانداستار، ارداقتى اعايىن، بارشاڭىزدى ءمان-ماڭىزى جوعارى، رۋحاني مەرەكەمەن شىن جۇرەكتەن قۇتتىقتايمىن!»، - دەپ جازىلعان قۇتتىقتاۋ حاتىندا.