قىزىلوردادا اباي تۇتىنعان شكاف ساقتاۋلى تۇر

قىزىلوردا. قازاقپارات - قازاق حالقىنىڭ كورنەكتى تۇلعاسى اباي تۇتىنعان ءاربىر جادىگەر - بۇگىندە حالقىمىزدىڭ باعا جەتپەس بايلىعى.

سونداي دۇنيەنىڭ ءبىرى - قىزىلوردا وبلىسى سىرداريا اۋداندىق تاريحي-ولكەتانۋ مۋزەيىندە ساقتاۋلى تۇر.

قوس عاسىرعا جۋىق تاريحى بار شكاف مۋزەيگە كەلۋشى كوپشىلىكتىڭ قىزىعۋشىلىعىن تۋعىزادى، دەپ حابارلايدى قازاقپارات ءتىلشىسى.

شكافتى مۋزەيگە اۋدان ورتالىعى - تەرەڭوزەك كەنتىنە جاقىن ورىن تەپكەن ا. توقماعانبەتوۆ اۋىلىنىڭ تۇرعىنى احمەتبەك ىسكەندىروۆ 2006-جىلى تابىس ەتكەن ەكەن.

باعالى جادىگەر العاشقىدا قۇنانبايدىڭ تۋىسى تۇرعان ەسىمدى ايەل كىسىگە بەرىلگەن. سەمەي وڭىرىندە دۇنيەگە كەلگەن ول سىر بويىنىڭ ازاماتىمەن شاڭىراق كوتەرگەن. ءوزىنىڭ اۋىلىنا توركىندەپ بارعاندا وعان تۋىسقاندارى قازاقتىڭ ويشىل اقىنى - اباي ەستەلىك رەتىندە اتالمىش شكافتى تارتۋ ەتەدى.

«ودان كەيىنگى كەزەڭدە ول كىسى قىز بوسانىپ، وعان ابايدىڭ اجەسى - زەرەنىڭ ەسىمىن قويادى. زەرە بوي جەتىپ، بەرىدە اسقار اۋىلىنىڭ ازاماتىنا تۇرمىسقا شىعادى. كەلىن بولىپ تۇسكەندە وعان جاساۋ رەتىندە وسى شكاف تا وزىمەن بىرگە كەلەدى»، - دەيدى اۋداندىق ولكەتانۋ مۋزەيىنىڭ ماماندارى.

مولدالار مەن بايلاردىڭ باسىنا قارا بۇلت ۇيىرىلگەن 1928-29-جىلدارى بۇل وتباسى تاجىكستانعا كوشۋگە ءماجبۇر بولادى. شكاف اۋىل تۇرعىنى تۋمىشقا قالعان ەكەن. 1942-جىلى زەرەنىڭ قىزى ءاسيانىڭ ۇرپاقتارى احمەتبەك، ماماديار، ءابدىرامان تاجىك ەلىنەن ا. توقماعامبەتوۆ اۋىلىنا قايتا ورالدى.

ەلگە كەلىسىمەن ءاسيا اكە-شەشەسىنىڭ تۋمىشقا اماناتتاپ كەتكەن دۇنيەلەرى، ونىڭ ىشىندە سەمەيدەن كەلگەن كىتاپ سورەسىن قايتارىپ الادى. احمەتبەك ىسكەندىروۆتىڭ ايتۋىنشا، زەرە وعان ناعاشى اجە بولىپ كەلەدى. ياعني، اناسىنىڭ شەشەسى.

كونەنىڭ كوزىندەي دۇنيە وسىلايشا احمەتبەك ىسكەندىروۆتىڭ وتباسىنا تيەدى. قانشاما جىلدار بويى كوزىنىڭ قاراشىعىنداي ساقتاپ كەلگەن دۇنيەنى ول كىسى بەرىدە اۋداندىق ولكەتانۋ مۋزەيىنە تابىس ەتىپ، حالىقتىڭ قىزىعا تاماشالايتىن قۇندى جادىگەرىنىڭ بىرىنە اينالدى.

ەستەرىڭىزگە سالا كەتەلىك، بۇگىن - 10- تامىزدا قازاقستاندا تۇڭعىش رەت اباي كۇنى اتالىپ وتەدى.