ماۋلەن اشىمبايەۆ: اباي ۇلاعاتى - ەشقاشان ماڭىزىن دا، قۇندىلىعىن دا جوعالتپايتىن ونەگە، وشپەس وسيەت
مۇنداي پىكىردى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ءبىلدىردى، دەپ حابارلايدى قازاقپارات ءتىلشىسى.
«بارشاڭىزدى ەلىمىزدە العاش رەت رەسمي تۇردە اتالىپ ءوتىپ جاتقان اباي كۇنىمەن قۇتتىقتايمىن! بۇل - قازاق ءۇشىن تاريحي وقيعا، زور قۋانىش جانە ۇلتتىق قۇندىلىقتاردى ۇلىقتاۋدىڭ جاڭا بەلەسى، ەلدىك پەن ەگەمەندىكتىڭ جارقىن كورىنىسى. ۇلى ويشىلدىڭ 175 جىلدىعىندا وسىنداي دەربەس كۇننىڭ بەلگىلەنۋى وتە ورىندى باستاما. ويتكەنى سانامىزدى جاڭعىرتىپ، ساپامىزدى ارتتىرۋدا اباي ەڭبەكتەرىنىڭ الار ورنى ەرەكشە. سوندىقتان بۇل شەشىمدى باس اقىنعا عانا ەمەس، قازاق ادەبيەتى مەن مادەنيەتىنە، ءبىلىمى مەن عىلىمىنا، تۇتاس ۇلت رۋحانياتىنا كورسەتىلگەن زور قۇرمەت دەپ قابىلدايمىز»، - دەپ جازدى ماۋلەن اشىمبايەۆ Facebook پاراقشاسىندا.
ونىڭ پايىمىنشا، اباي مۇراسى وتانشىل، ادال، پاراساتتى، ءبىلىمدى، بىلىكتى ۇرپاق تاربيەلەۋدىڭ نەگىزى دەپ ايتساق تا ارتىق بولمايدى. سول سەبەپتى، ۇلى اقىننىڭ شىعارمالارىن قازىرگى زاماننىڭ تالاپتارى مەن تەتىكتەرىن ەسكەرە وتىرىپ، كەڭىنەن ناسيحاتتاعان ءجون.
«وسىعان وراي پرەزيدەنتىمىز قاسىم-جومارت كەمەل ۇلى توقايەۆ ءوزىنىڭ « اباي جانە XXI عاسىرداعى قازاقستان» اتتى ماقالاسىندا كوپتەگەن وزەكتى ماسەلەلەردى كوتەرىپ، ۇتىمدى ويلارىن ورتاعا سالعانىن جاقسى بىلەمىز. مەملەكەت باسشىسى بۇگىن «ەگەمەن قازاقستان» گازەتىنە جاريالانعان «اباي - رۋحاني رەفورماتور» اتتى ماقالاسىندا دا ۇلى ويشىلدىڭ ءىلىمى قازىرگى ءبىرقاتار باعىتتارعا ورايلاس كەلەتىنىنە نازار اۋدارىپ، ەلدى ءبىلىم يگەرۋدە، تاربيە ماسەلەسىندە، جاڭا كاسىپ ۇيرەنۋدە جانە ىنتىماق- بىرلىكتە ابايعا جۇگىنۋگە شاقىرادى. شىن مانىندە، ۇلت ۇستازىنىڭ ۇلاعاتى - ەشقاشان ماڭىزىن دا، قۇندىلىعىن دا جوعالتپايتىن ونەگە، وشپەس وسيەت»، - دەدى ول.
سەنات سپيكەرىنىڭ اتاپ وتۋىنشە، ەڭ باستىسى، اقىننىڭ ەڭبەكتەرىن دارىپتەگەندە ناۋقانشىلىققا جول بەرمەگەن ابزال.
«پرەزيدەنتىمىز ايتقانداي، عۇلامانىڭ مەرەيتويى توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني دامۋىمىز ءۇشىن قاجەت. وسى تۇرعىدان كەلگەندە بۇگىنگى مەرەكەنىڭ ءمان-ماڭىزى ايرىقشا، كوتەرگەن جۇگى اۋىر ەكەنىن ۇعامىز. ەندەشە ۇلتىمىزدىڭ وركەنيەت ورىنە جاساعان كەزەكتى قادامى ۇزاعىنان بولعاي! ۇلى ويشىلدىڭ شىعارمالارى حالقىنا رۋحاني قىزمەتىن جالعاستىرا بەرسىن! اباي كۇنى قۇتتى دا قايىرلى بولسىن! قازاق ەلى ماڭگى جاساسىن!»، - دەدى ماۋلەن اشىمبايەۆ.
ايتا كەتەيىك، تاياۋدا قازاقستان رەسپۋبليكاسى ۇكىمەتىنىڭ قاۋلىسىمەن 10- تامىز اباي كۇنى بولىپ بەلگىلەندى.