اباي كۇنى قالاي اتاپ وتىلەدى

None
None
نۇر- سۇلتان. قازاقپارات - ەرتەڭ، 10 - تامىزدا ەلىمىزدە قازاقتىڭ ۇلى اقىنى ابايدىڭ 175 جىلدىق مەرەيتويى اتالىپ وتەلەدى. مەرەيتوي اياسىندا رەسپۋبليكا بويىنشا 100-دەن استام شارا ۇيىمداستىرىلادى،

دەپ حابارلايدى قازاقپارات ءتىلشىسى مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

كوروناۆيرۋس ىندەتىنە بايلانىستى بارلىق ءىس- شارا ونلاين فورماتتا ءوتىپ جاتقانى بەلگىلى. 10- تامىز كۇنى دە حاكىم اباي مەرەيتويى اياسىنداعى رەسپۋبليكا كولەمىندەگى بار ءىس- شارا ونلاين تۇرىندە ۇيىمداستىرىلادى.

سونىمەن 10- تامىزعا سەمەيدەگى ابايدىڭ «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق قورىعى «حاكىم اباي» اتتى ارنايى مادەني باعدارلاما دايىنداپ، ءىس- شارالار لەگىن Qazaqstan ۇلتتىق تەلەارناسىنداعى «تاڭشولپان» باعدارلاماسى ارقىلى تىكەلەي ەفيرگە شىعۋمەن باستايدى.


وسىدان كەيىن مەرەكە وڭىرلەردەگى تانىمال مادەنيەت جانە ونەر قايراتكەرلەرىنىڭ اباي شىعارمالارىن وقۋىمەن جالعاسادى. ءدال وسى كۇنى سەمەيدەگى «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق قورىعىندا «اباي جانە ХХІ عاسىر: بولاشاقپەن سۇحبات» اتتى حالىقارالىق كونفەرەنسيا وتەدى. جيىنعا تانىمال عالىمدار، ابايتانۋشىلار، رەسەي فەدەراتسياسى ادەبيەت اكادەمياسىنىڭ اكادەميگى گ. پرياحين، ءتۇرلى مادەني جانە ج و و باسشىلارى قاتىسادى.

سونىمەن قوسا تاۋلىك بويى ينتەرنەت ارقىلى اباي قورىق- مۋزەيى، «اباي- شاكارىم» ماۆزولەيىنە ۆيدەو ەكسكۋرسيا جاساۋعا، اباي مۋزەيىندەگى ەكسپوناتتار جايلى ءتۇرلى بەينەباياندار تاماشالاۋعا بولادى.

جىل باسىنان بەرى اقىننىڭ تۋىپ- وسكەن ولكەسىندە اباي ەسىمىمەن بايلانىستى تاريحي- مادەني مۇرا نىساندارىنا عىلىمي رەستاۆراتسيا جۇمىستارى جۇرگىزىلىپ جاتقانىن ايتا كەتۋ كەرەك.

سونىمەن قاتار 10- تامىزدا 15:00-دە حالىقارالىق دەڭگەيدە اباي ولەڭدەرىن حالىقارالىق 8 تىلدە (فرانسۋز، اعىلشىن، اراب، يسپان، قىتاي، جاپون، نەمىس، يتاليان تىلدەرىندە) وقۋعا ارنالعان «Abai world challenge» اتتى ۆيدەومارافون باستاۋ الادى. اتالعان چەللەندجگە اباي شىعارماشىلىعىن زەرتتەپ جۇرگەن الەمنىڭ تۇكپىر- تۇكپىرىندەگى عالىم- زەرتتەۋشىلەر، اۋدارماشى، جازۋشى، زيالى قاۋىم وكىلدەرى، شەت مەملەكەتتەردەگى قازاقستان رەسپۋبليكاسىنىڭ توتەنشە جانە وكىلەتتى ەلشىلەرى قاتىسادى.

جالپى 10- تامىز كۇنى رەسپۋبليكا بويىنشا 100-گە جۋىق ءىس- شارا وتەدى. بۇل ءىس- شارانىڭ بارلىعى مادەنيەت جانە سپورت مينيسترلىگىنىڭ Facebook, Instagram, Youtube پاراقشالارىندا تىكەلەي كورسەتىلەدى.

سونداي- اق وسى كۇنى الەۋمەتتىك بەينەباياندار مەن قىسقا مەتراجدى فيلمدەرگە ارنالعان «ابايدىڭ مۇراسى - ادامزات قازىناسى» اتتى ونلاين- فەستيۆال باستالادى. الەمدىك دەڭگەيدەگى ويشىل ءوز شىعارمالارىندا ەڭبەكسۇيگىشتىكتى، بىلىمگە قۇشتارلىقتى، دانالىقتى، قايىرىمدىلىق پەن وتانعا دەگەن ماحابباتتى ناسيحاتتاعان. ءارى اقىن وي مەن جۇرەك تازالىعىنا ايرىقشا ءمان بەرگەن. حاكىم ابايدىڭ دانالىعى مەن فيلوسوفيالىق كوزقاراسى عاسىرلار وتسە دە ءوزىنىڭ ءمان- ماڭىزى مەن ومىرشەڭدىگىن جويماق ەمەس. ءبىز ءبىرتۇتاس قوعام رەتىندە اقىن شىعارمالارىن تەك بيىل مەرەيتوي اياسىندا عانا قۇرمەتتەپ قانا قويماي، شىعارمالارىن ءوزىمىزدى- ءوزىمىز تانۋ جولىندا اينىماس تەمىرقازىققا اينالدىرۋىمىز قاجەت.

مەرەكە كۇنى ەلوردامىز بەن وڭىرلەردە كەمەڭگەر ويشىلدى ەسكە الۋ ماقساتىندا گۇل شوقتارىن قويۋ ءراسىمى وتەدى.

ايتا كەتەيىك، تاياۋدا عانا 10 - تامىز اباي كۇنى رەتىندە بەلگىلەنىپ، قازاقستان رەسپۋبليكاسىنىڭ مەملەكەتتىك مەرەكەلەر كۇنتىزبەسىنە ەنگىزىلگەن بولاتىن.

اۆتور: مارلان جيەمباي

سوڭعى جاڭالىقتار