+7 (701) 759 90 19
8 °С : نۇر-سۇلتان
17 °С : الماتى
USD 421.58 EUR 496.83
RUB 5.53 CNY 62.2
جاڭالىقتار

كوركى كوز ارباعان التايداعى نارىن جايلاۋى - شەتەلدەگى قازاق ءتىلدى ب ا ق- قا شولۋ

9 تامىز 12:33
:ءبولىسۋ
كوركى كوز ارباعان التايداعى نارىن جايلاۋى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

كوركى كوز ارباعان التايداعى نارىن جايلاۋى - تيانشاننەت

قىتايدىڭ التاي ايماعىنا قاراستى قابا اۋدانىنداعى نارىن جايلاۋى جاز ايلارىندا تۇرلەنىپ، وزگەشە تۇسكە ەنەدى، دەپ جازادى «تيانشاننەت» اقپاراتتىق پورتالى.

اتالعان ب ا ق- تىڭ جازۋىنشا، قىتايداعى قانداستارىمىز قونىستانعان قابا اۋدانىنداعى نارىن جايلاۋىندا ورماندار، سان ءتۇرلى باعالى وسىمدىكتەر بارشىلىق. جاز ماۋسىمىندا اسقار تاۋ، نۋ ورمانى وزگەشە تۇسكە ەنىپ، وزەن سۋلارى سىلدىراي اعىپ، گۇلدەرى قۇلپىرىپ جايقالا وسەدى. باتىس ءسىبىر جاقتاعى تايگا ورمانىن بۇل جەردەن دە كورە الاسىز.

«جاز ورتاسى بولعاندا، الىستاعى قارلى تاۋلاردىڭ قىر جوتالارى كۇن نۇرىمەن شاعىلىسىپ، ەتەگى التىن سارى تۇسكە بويالىپ جاتادى. كوز جەتەر ماڭدا، تاۋدىڭ بەل جوتاسىنا تۇمان شوگىپ، تابيعاتتىڭ جاراسىمدىلىعىن ايگىلەيدى. كىلەمنىڭ تۇگىندەي كوگالا مايساڭ توسىندە قورالى قوي، تابىندى سىيىر جايىلا وتتاپ، تىنىستى تىرشىلىكتى اڭعارتادى. نارىن جايلاۋىندا ءبىر ورىندا تۇرىپ، ءۇش كولدى تاماشالاۋعا بولادى، ياعني قاناس كولى مەن «قوس كولدى» كورە الاسىز. جولىڭىز ءتۇسىپ نارىن جايلاۋىنا بارساڭىز، بەينە ەرتەگى الەمىنە ەنگەندەي كۇي كەشەسىز. نازارلارىڭىزعا وسى كوركەم تابيعات كورىنىستەرىنەن فوتورەپورتاج ۇسىنامىز»، - دەپ جازادى تيانشاننەت.


تۇركيادا حورەزمدى بيلەگەن «جالوليددين مانگۋبەردى» جايلى فيلمنىڭ ءتۇسىرىلىمى باستالدى - «ءو ز ا» اقپاراتتىق اگەنتتىگى

تۇرىكتىڭ تاريحىن تەرەڭنەن زەرتتەيتىن «ەرتۇعىرىل» تەلەحيكاياسىنىڭ پروديۋسەرى مەحمەت بۋعداز حورەزمدى بيلەگەن جالوليددين مانگۋبەردى جايىندا كوپسەريالى تۋىندىنىڭ ءتۇسىرىلىمىن باستادى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

««وزبەك كينو» اگەنتتىگىنىڭ مالىمەتىنشە، «Bo‘zdag‘ film» ستۋدياسى تاسپالايتىن سەريالدىڭ باستى ءرولى جالوليددين حورەزمشاحتى تۇرىك اكتەرى ەمرە كيۆيلجيم سومدايدى. فيلمنىڭ سسەناريىن وزبەكستاندىق تانىمال جازۋشى نازار ەشانقۇل جازعان. قازىرگى كەزدە تۇركيانىڭ اقساراي پروۆينتسياسىندا ءتۇسىرىلىپ جاتقان سەريال ءۇشىن ارنايى تاريحي اشەكەيلەرى بار پاۆيلون سالىندى. جوسپار بويىنشا فيلم وزبەكستان مەن تۇركيا اۋماعىندا تۇسىرىلەتىن بولعان»، - دەپ جازادى «ءو ز ا» اقپاراتتىق اگەنتتىگى.

ايا- سوفيا مەشىتى بۇكىل ادامزاتقا اشىق - TRT

تۇركيا ءدىن ىستەرى باسقارماسى ءتوراعاسى الي ەرباش ايا- سوفيا مەشىتىنىڭ بۇكىل ادامزاتقا اشىق ەكەنىن جاريالادى، دەپ جازادى تۇركيا راديو تەلەۆيزيا پورتالى.

«ەرباش دۇزدجەدە جۋرناليستەرگە جاساعان مالىمدەمەدە، «ايا- سوفيانىڭ عيباداتقا اشىلۋى ءارى ۇلتىمىز، ءارى بۇكىل ادامزات ءۇشىن قۇت اكەلگەن ءبىر جاڭالىق بولدى. تەك قانا مۇسىلماندار ەمەس، كۇن سايىن ون مىڭداعان ادام كەلىپ ارالاۋدا. ءبىز ايا- سوفيا بۇكىل ادامزاتقا اشىق دەپ جاريالايمىز»، دەدى ەرباش ءدىن ىستەرى باسقارماسى. سونداي- اق ول مادەنيەت جانە تۋريزم مينيسترلىگى جانە ىستانبۇل گۋبەرناتورلىعى ىنتىماقتاستىعىمەن ايا- سوفيادا ەڭ جاقسى قىزمەتتى ۇسىنۋعا تىرىسقاندارىن جەتكىزدى»، - دەپ جازادى TRT.

اتالعان اقپارات كوزىنىڭ دەرەگىنە سۇيەنسەك، مەملەكەت كەڭەسىنىڭ 10- دەپارتامەنتى ايا- سوفيانىڭ مەشىتتەن مۇراجايعا وزگەرتىلۋىنە بايلانىستى 1934 -جىلى 24 - قاراشاداعى مينيسترلەر كابينەتى شەشىمىنىڭ كۇشىن جويدى. مەملەكەتتىك كەڭەس شەشىمىمەن سان عاسىرلىق تاريحى بار ايا- سوفيا ەندى ءدىني قۇلشىلىق جاساۋ ورنى بولماق. بۇل تۋرالى تۇركيا پرەزيدەنتىنىڭ جارلىعى رەسمي گازەتتە جاريالاندى.

ايتا كەتۋ كەرەك، ايا- سوفيا عيماراتى VI عاسىردىڭ 30- جىلدارىندا ۆيزانتيا يمپەراتورى يۋستينياننىڭ زامانىندا سالىنعان. ول مىڭداعان جىل بويى حريستيان الەمىندەگى ەڭ ءىرى شىركەۋ بولعان. 1453 -جىلى كونستانتينوپولدى وسمان يمپەرياسى باسىپ العاننان كەيىن، شىركەۋ اينالاسىنا ءتورت مۇنارا سالىپ، مەشىتكە اينالدىرعان. ايا- سوفيا 1934 -جىلى مۇراجايعا اينالدى. 1985 -جىلى UNESCO- نىڭ بۇكىلالەمدىك مۇرا تىزىمىنە ەندى.

تاشكەنتتە تۇركى دۇنيەسى دەرەكتى فيلمدەر فەستيۆالى وتەدى - «ءو ز ا» اقپاراتتىق اگەنتتىگى

بيىل 22-24 - قازان كۇندەرى تاشكەنتتە تۇركى دۇنيەسى دەرەكتى فيلمدەر فەستيۆالى وتەدى، دەپ حابارلايدى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«وزبەك كينو» ۇلتتىق اگەنتتىگىنىڭ مالىمەتىنشە، تاشكەنتتە تۇركى الەمى جۋرناليستەرىنىڭ فەدەراتسياسى جانە تۇركى الەمىنىڭ مادەنيەت، ونەر جانە كينو قورىنىڭ قولداۋىمەن دەرەكتى فيلمدەردىڭ كورسەتىلىمىن وتكىزۋ جوسپارلانعان.

«فەستيۆال بۇكىل تۇركى الەمىنىڭ تۇكپىر- تۇكپىرىنەن كەلگەن رەجيسسەرلەردى كەزدەسۋلەر مەن پىكىر الماسۋ ءۇشىن جينايدى. قاتىسۋشى ەلدەردىڭ تىزىمىنە وزبەكستان، تۇركيا، ازەربايجان، تۇرىكمەنستان، قازاقستان، قىرعىزستان، سولتۇستىك كيپر تۇرىك رەسپۋبليكاسى، اۆتونوميالىق تۇرىك رەسپۋبليكالارى، ماكەدونيا، كوسوۆو، ۆەنگريا جانە تۇركى قوعامداستىقتارى ەنگەن»، - دەپ جازادى «ءو ز ا» اگەنتتىگى.

اراستا ەۋرازيا وداعىنا مۇشە مەملەكەتتەر ەلشىلەرىنىڭ وتىرىسى وتەدى - «فارس» اقپارات اگەنتتىگى

يراننىڭ سولتۇستىك- باتىسىنداعى اراس ەركىن ايماعى ۇيىمىنىڭ ديرەكتورلار كەڭەسىنىڭ باسشىسى موحسەن ناريمان ەۋرازيا ەكونوميكالىق وداعىنا مۇشە مەملەكەتتەر ەلشىلەرىنىڭ وتىرىسى وتەتىنىن حابارلادى، دەپ جازادى «فارس» اقپارات اگەنتتىگى.

«موحسەن ناريمان دۇيسەنبى كۇنى اراستا يران سىرتقى ىستەر ءمينيسترىنىڭ ەكونوميكالىق ديپلوماتيا جونىندەگى ورىنباسارى عولامرەزا انساريمەن كەزدەسۋىندە: «ەۋرازيا وداعىنا مۇشە مەملەكەتتەر ەلشىلەرىنىڭ وتىرىسى يراننىڭ ەۋرازيا مەن كاۆكاز ايماعىنىڭ ەلدەرىمەن ساۋدا- ەكونوميكالىق قارىم- قاتىناسىن دامىتۋ ماقساتىندا وتەدى»، - دەدى.

عولامرەزا انساري دە اراس ەركىن ايماعى ۇيىمىنىڭ ەۋرازيا ەكونوميكالىق وداعىنا مۇشە ەلدەرمەن ارىپتەستىگىن دامىتۋ قاجەتتىگىن قۋاتتاپ: «ەۋرازيا ايماعى مەن ت م د ەلدەرىنە اپارار جالعىز قاقپا رەتىندەگى وسى ايماقتىڭ الەۋەتىن پايدالانىپ، مۇنايدان تىس ەكسپورتتىق تاۋارلار نەگىزىندە اتالمىش ەلدەرمەن ساۋدا اينالىمىن ارتتىرۋ كەرەك»، - دەدى»، - دەپ جازادى دەپ جازدى Рarstoday .

يزمير فيلم فەستيۆالى 22-26 - قىركۇيەكتە وتەدى - TRT

حالىقارالىق يزمير فيلم فەستيۆالى 2020 -جىلى 22-26 - قىركۇيەكتە ۇيىمداستىرىلادى، دەپ حابارلايدى تۇركيا راديو تەلەۆيزيا پورتالى.

«2018 -جىلدان بەرى ۇيىمداستىرىلعان فەستيۆال بيىل كوروناۆيرۋس ىندەتىنە بايلانىستى ساقتىق شارالارى اياسىندا وتكىزىلەدى. فەستيۆال اياسىندا ۇمىتكەر بولاتىن فيلمدەر يزميردىڭ 30 اۋدانىنداعى اشىق الاڭدارىندا كورەرمەندەرگە ۇسىنىلادى. ايتا كەتەر جايت، فەستيۆالدە بيىل تەلەسەريالدار دا كورسەتىلەدى. ۇزدىك بولعاندارعا «التىن ارتەميدا جۇلدەسى» بەرىلەدى»، - دەپ جازادى TRT.:

اۆتور: باقىتجول كاكەش



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات