+7 (701) 759 90 19
-7 °С : نۇر-سۇلتان
-2 °С : الماتى
USD 419.54 EUR 509.2
RUB 5.72 CNY 64.81
جاڭالىقتار

الماتىلىق وقۋشى بالالارعا تەگىن اعىلشىن ءتىلىن ۇيرەتەتىن ونلاين مەكتەپ اشتى

9 تامىز 10:54
:ءبولىسۋ
الماتىلىق وقۋشى بالالارعا تەگىن اعىلشىن ءتىلىن ۇيرەتەتىن ونلاين مەكتەپ اشتى

الماتى. قازاقپارات - بۇگىندە كارانتين جاعدايىنا بايلانىستى وقۋ، جۇمىس جانە باسقا شارالاردىڭ بارلىعى ونلاين فورماتقا كوشىرىلدى. ياعني ۇيدەن جۇمىس ىستەپ، ۇيدە وقيتىن كەزەڭ بۇل.

كارانتيندى ءساتتى پايدالانىپ، ءوز يدەياسىن جۇزەگە اسىرعانداردىڭ ءبىرى الماتىلىق وقۋشى يليا كان. ول يگى شارانى قولعا الىپ از قامتىلعان وتباسىدان شىققان جانە دارىگەرلەر مەن پوليتسەيلەردىڭ بالالارىنا تەگىن اعىلشىن ءتىلىن ۇيرەتۋدە.

سول ءۇشىن دە ارنايى ونلاين مەكتەپ اشقان. «Teaching for heroes» جوباسىنىڭ اۆتورى قازاقپارات تىلشىسىنە سۇحبات بەرىپ، جاقىندا قولعا الىنعان الەۋمەتتىك جوبانىڭ قالاي جۇزەگە اسىرىلىپ جاتقاندىعى تۋرالى ايتىپ بەردى.


«مەنىڭ جاسىم 16-دا. بوس ۋاقىتىمدا وقىعاندى، جازعاندى ۇناتامىن، سول سياقتى مەكتەپتە فۋتبول وينايمىن. مەن قازىر ا ق ش- تا وقيمىن، بيىل 11- سىنىپقا ءوتتىم. بولاشاق ماماندىققا قاتىستى ءالى ناقتى تاڭداۋ جاساعان جوقپىن. دەگەنمەن جوعارى ءبىلىمدى دە وسى ا ق ش- تا جالعاستىرماق ويىم بار. باستاپقى كەزدە ءوزىم دە ءتىل ۇيرەتىپ، ساباق بەردىم. قازىر كوبىنەسە ۇيىمداستىرۋشىلىق جۇمىستارمەن اينالىسامىن. بۇگىندە ءبىزدىڭ ونلاين مەكتەپتە 2 مىڭنان استام بالا جانە جەتكىنشەك اعىلشىن ءتىلى كۋرسىنان ءوتىپ، ءبىلىم الۋدا. ونىڭ ىشىندە جوبامەن 100-200 قاتىسۋشى از قامتىلعان وتباسىنىڭ بالالارى. اعىلشىن ءتىلىن مەڭگەرەمىن دەگەن نيەتتى بالالارمەن 900-گە جۋىق وقىتۋشى ءوز تاجىريبەسىمەن بولىسۋدە»، - دەدى ي. كان.

سونداي- اق، جوبا اۆتورى ونلاين مەكتەپتى اشۋدىڭ العاشقى ساتىندە قيىندىقتاردىڭ كەزدەسكەنىن دە جاسىرمادى.

«بۇل جوبا كوماندالىق جۇمىس. بىزدە ءوزىمىزدىڭ Whatsapp جەلىسىندە توبىمىز بار، سول جەردە جۇمىس بارىسى مەن وعان قاتىستى يدەيالاردى بىرگە تالقىلايمىز. ول جەردە ماعان كومەكتەسۋشى دوستارىم، ءتىل ۇيرەتۋشى ماماندار بار. ونلاين مەكتەبىمىز العاش جۇمىس ىستەي باستاعاندا بىرنەشە قيىندىقتار بولدى. اتاپ ايتقاندا، كوبىسى ونلاين پلاتفورماعا قالاي قوسىلۋ كەرەكتىگىن بىلمەدى، ودان سوڭ كۋرسقا قالاي جانە كىمدەرگە جازىلۋعا بولادى دەگەن سۇراقتار ءجيى تۋىندادى. ۋاقىت ءوتىپ جۇمىس ىستەي كەلە، اتالعان ماسەلەلەر ءوز شەشىمىن تاپتى.

جوبانىڭ اشىلعانىنا ءبىر اي دا بولعان جوق، دەگەنمەن راحمەتىن ايتىپ، ريزاشىلىعىن بىلدىرۋشىلەردىڭ سانى وتە كوپ. ونىڭ ىشىندە بالالارمەن قاتار ولاردىڭ اتا- انالارى دا بار. ءتىل ۇيرەتۋشى ماماندار دا مۇنىڭ كەرەك جوبا ەكەنىن ايتۋدا. اسىرەسە قاتىسۋشى بالالاردىڭ ءار ساباقتى اسىعا كۇتەتىنى قۋانتادى. ونىڭ ۇستىندە ءبىزدىڭ ءتىل ۇيرەتۋ فورماتىمىز ادەتتەگىدەي لەكتسيا تۇرىندە ەمەس. ءبىز ءار بالانىڭ ەرەكشەلىگى مەن قابىلەتىنە قاراي جەكە تۇردە وقۋ فورماتىن ازىرلەپ، ۇيرەتەمىز»، - دەيدى ول.

ونىڭ ايتۋىنشا، ەڭ باستىسى - بالالاردىڭ ريزا بولۋى مەن ءتىل ۇيرەنۋگە دەگەن قابىلەتى.

«تاعى ءبىر ايتىپ وتەتىن ەرەكشە ءسات، بۇل بالالار مەن جەتكىنشەكتەرگە تەك قانا اعىلشىن ءتىلىن ۇيرەتەتىن ونلاين مەكتەپ ەمەس. بۇل الەۋمەتتىك جوبا، ءبىزدىڭ ماقسات - ورتاق قىزىعۋشىلىعى بار بالالاردىڭ باسىن بىرىكتىرۋ. ءوز يدەيالارىن جۇزەگە اسىرعىسى كەلەتىن بالالارعا باعىت- باعدار كورسەتىپ، مۇمكىندىگىنشە اقىل- كەڭەس بەرۋ. اعىلشىن ءتىلى ۇيرەنۋ كۋرسىنا قالاي جازىلۋعا بولادى دەگەن ساۋالدار دا ءتۇسىپ جاتىر. ولارعا ايتارىم، باستى تالاپ قاتىسۋشىنىڭ از قامتىلعان وتباسىلاردىڭ، دارىگەرلەردىڭ، پوليتسەيلەردىڭ وتباسىنان بولعانى ابزال. دەگەنمەن وسى كۇنگە دەيىن ەشقانداي قاتىسۋشىنىڭ بەتىن قايتارعان ەمەسپىز»، - دەدى الماتىلىق جەتكەنشىك.

يليا كاننىڭ مالىمدەۋىنشە، ءتىل ۇيرەنگىسى كەلەتىندەردىڭ اراسىندا قازاقستاندىق بالالاردان بولەك، الىس- جاقىن شەتەلدەن دە نيەتتىلەر بار.

«ساباق بەرەتىن مامانداردىڭ قۇرامى وتە مىقتى، ءبىزدىڭ جوبامىز تۋرالى ەستىگەن الەمگە ايگىلى ۋنيۆەرسيتەتتەردىڭ ۇستازدارى دا قول ۇشىن سوزۋدا. وقىتۋشىلاردىڭ كەيبىرىن مەن ءوزىم شاقىردىم، ال قالعاندارى وسى جوبا تۋرالى ينتەرنەتتەن ءبىلىپ، وزدەرى ىنتا ءبىلدىردى. وقۋشىلاردىڭ قاتارىندا قازاقستاننان بولەك، رەسەي، ازەربايجان جانە ارمەنيادان بار. ءوز ەلىمىزدەن كوپ ءوتىنىم ءبىلدىرۋشى الماتى جانە نۇر- سۇلتان قالاسىنان بولىپ وتىر»، - دەدى ول.

ودان بولەك، ونلاين مەكتەپتى ۇيىمداستىرۋشى جەرلەسىمىز بالالاردى ىرىكتەۋ پروتسەسىنىڭ قالاي وتەتىنى تۋرالى ايتىپ بەردى.

«ءتىل ۇيرەنەمىن دەگەن ءاربىر نيەتتەنۋشى الدىمەن ساۋالنامانى تولتىرادى. ول جەردە قانداي وتباسىدان شىققانى، جاسى مەن باسقا دا دەرەكتەر سۇرالادى. ەگەر ءبىزدىڭ تالاپتارعا ساي كەلسە ول قابىلدانادى. دەگەنمەن بالا ءتىل ۇيرەنۋگە قۇشتار بولىپ، ءبىراق ءبىزدىڭ تالاپتارعا سايكەس كەلمەسە، مىسالى ول دارىگەردىڭ ەمەس مۇعالىمنىڭ بالاسى بولۋى مۇمكىن، ونداي جاعدايدا ءبىز باس تارتپاي وقۋعا قابىلدايمىز. ياعني ۇيرەنەمىن دەگەن ىنتاسى بار بالاعا ەسىك اشىق. ساباق ءار بالامەن جەكە تۇردە وتەدى. العاشقى ۋاقىتتا 6 ساباق وتەدى، سودان سوڭ بالانىڭ ىنتاسى مەن ءتىل مەڭگەرۋ دەڭگەيىنە قاراي جالعاسا بەرەدى. كۋرس 1 ايدان، 1 جىلعا دەيىن سوزىلۋى مۇمكىن، ونى وقۋشى مەن وقىتۋشى ءوزارا شەشەدى»، - دەدى ي. كان.

ءسوز سوڭىندا يدەيا اۆتورى اتالعان جوبانى كارانتين كەزىندە عانا ەمەس، ودان ءارى جالعاستىرىپ دامىتۋ جوسپارى بارىن ايتتى.

اۆتور: ءالي يبرايەۆ


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات