قازاقستاندىق اسكەري دارىگەرلەر ليۆانعا كومەككە اتتاندى
ق ر پرەزيدەنتى قاسىم- جومارت توقايەۆ قورعانىس مينيسترىنە ليۆانعا اسكەري مەديتسينا ماماندارىن جىبەرۋ تۋرالى ماسەلەنى شەشۋدى تاپسىردى.
«7- تامىزدا ق ر پرەزيدەنتى - جوعارعى باس قولباسشىنىڭ تاپسىرماسىن ورىنداۋ ماقساتىندا ق ر قارۋلى كۇشتەرىنىڭ جەكە قۇرامىنىڭ اراسىنان قۇرالعان 29 مەديتسينا مامانى مەن 4 اۋدارماشى بار توپ نۇر- سۇلتان- اقتاۋ باعىتى بويىنشا ۇشتى. 8- تامىز كۇنى تاڭەرتەڭ بەيرۋت پورتىندا جارىلىس سالدارىنان زارداپ شەككەندەرگە مەديتسينالىق كومەك كورسەتۋ ءۇشىن ق ر ق ك اۋە قورعانىس كۇشتەرى اسكەري- ترانسپورتتىق اۆياتسيا ۇشاعى اقتاۋ - بەيرۋت باعىتى بويىنشا ۇشتى»، - دەلىنگەن ۆەدومستۆو حابارلاماسىندا.
قازاقستان رەسپۋبليكاسىنداعى Covid-19-بەن بايلانىستى جاعدايدى ەسكەرە وتىرىپ، توپ قۇرامىنا ينفەكتسيونيست جانە تەراپيەۆت دارىگەرلەر قوسىلمادى.
«توپ قۇرامىنا جوعارى بىلىكتى حيرۋرگتەر، تراۆماتولوگتار، نەيروحيرۋرگتەر، انەستەزيولوگ- رەانيماتولوگتار، سونداي- اق حيرۋرگيالىق بەيىندەگى ورتا مەديتسينالىق پەرسونالدار بار. ولاردىڭ كوپشىلىگى اعىلشىن ءتىلىن جەتىك مەڭگەرگەن. اسكەري مەديتسينا قىزمەتكەرلەرىنىڭ ماقساتى - زارداپ شەككەندەرگە بىلىكتى مەديتسينالىق كومەك كورسەتۋ»، - دەپ اتاپ وتىلگەن مينيسترلىك مالىمەتىندە.
اۆتور: رۋسلان عابباسوۆ