بەكشين ك ۆ ي ناۋقاستارىن رۇقساتسىز ەمدەپ جاتقان جەكەمەنشىك ەمحانا تۋرالى پىكىر ءبىلدىردى
«ءبىزدىڭ ماماندار جارنامادا مىنانداي حابارلاما وقىعان. جارنامادا «تالانت جانە ك» مەديتسينالىق ورتالىعى كوروناۆيرۋسپەن اۋىرعان ناۋقاستارعا مەديتسينالىق كومەك كورسەتەدى دەپ جازىلعان. كەز كەلگەن مەديتسينالىق كومەك ارنايى ليسەنزياسى بار مەديتسينالىق ۇيىمداردا كورسەتىلۋى ءتيىس. ەگەر ولاردا نەگىزگى ليتسەنزيا بولسا جانە ەمحانا قوسىمشا تاعى ءبىر قىزمەت ءتۇرىن اشسا، ونىڭ قوسىمشاسى بولۋى ءتيىس. قوسىمشا مەن ليتسەنزيانى قالالىق كاسىپكەرلىك باسقارماسى بەرەدى»، - دەدى بەكشين.
ونىڭ ايتۋىنشا، ليتسەنزيا الۋ ءۇشىن سانيتار دارىگەرلەر، ورتكە قارسى باقىلاۋ قىزمەتى، قوعامدىق دەنساۋلىق ساقتاۋ باسقارماسى عيماراتتىڭ بارلىق قاۋىپسىزدىك تالاپتارىنا ساي ەكەندىگىن راستاپ، قورىتىندى شىعارۋى كەرەك.
«بۇل مەديتسينالىق ۇيىمدا تازا ايماق جوق بولىپ شىقتى. ياعني، قىزمەتكەرلەردىڭ دەنساۋلىعىنا قاۋىپ تونەدى. سانيتارلىق دالىزدەر، فيلتر كابينەتتەرى ۇيىمداستىرىلماعان. كىرەبەرىستە تەمپەراتۋرا ولشەۋ كەرەك. ول دا ەمحانادا جوق بولىپ شىقتى»، - دەدى بەكشين.
باس سانيتار دارىگەر «تالانت جانە ك» ەمحاناسىندا پاتسيەنتتەردىڭ دە، قىزمەتكەرلەردىڭ دە قاۋىپسىزدىگى ماسەلەسى وڭ شەشىلمەگەنىن ايتتى. «ەگەر ونداعى ادامدار ىندەتتى قايتا جۇقتىراتىن بولسا، ولارعا ءتىپتى قىلمىستىق جاۋاپكەرشىلىك قاراستىرىلۋى عاجاپ ەمەس»، - دەدى ول.
اۆتور: گۇلميرا عوسمانالي