رەسەيدەگى قازاقستاننىڭ ەلشىلىگىندە قازاقستاندىق جۇپ نەكەلەستى

نۇر- سۇلتان. قازاقپارات - رەسەيدەگى قازاقستاننىڭ ەلشىلىگىندە قازاقستاندىق مەديتسينا قىزمەتكەرلەرى - دانيار مەن دينارا نەكەگە وتىردى، دەپ حابارلايدى قازاقپارات ءتىلشىسى.

«كوروناۆيرۋس پاندەمياسى الەمدەگى ءداستۇرلى ءومىر ءسۇرۋ سالتىن قاتتى وزگەرتىپ جىبەردى. الايدا تۋىنداعان قيىندىقتارعا قاراماستان كەيبىر جاستار ىرگە قۇراپ، وتاۋ كوتەرىپ جاتىر. بۇگىن ماسكەۋدە رەسەيدەگى قازاقستاننىڭ ەلشىلىگىندە جاستار نەكەگە وتىردى»، - دەپ حابارلاندى ەلشىلىكتىڭ Facebook - تەگى پاراقشاسىنان.

وسىلايشا 26 جاستاعى ەكى مەديتسينا قىزمەتكەرى دانيار جيەنعاليەۆ پەن دينارا سالىقوۆا وتباسى قۇرىپ وتىر. قازىرگى ۋاقىتتا ولار ا. ن. باكۋليەۆ اتىنداعى ۇلتتىق مەديتسينالىق جۇرەك- تامىرلى حيرۋرگيانى زەرتتەۋ ورتالىعى مەن ن. ن. بلوحين اتىنداعى ۇلتتىق مەديتسينالىق ونكولوگيالىق زەرتتەۋ ورتالىعىندا ەڭبەك ەتەدى. وتاۋ قۇرعان جاستار جەتى جىل اقتوبەدەگى م. وسپانوۆ اتىنداعى بقو مەديتسينا ۋنيۆەرسيتەتىندە ءبىلىم العان. الايدا تەك ماسكەۋدە تانىسقان. ماسكەۋدە ولار جوعارىدا اتالعان مەديتسينالىق ورتالىقتاردا ورديناتۋرادا وقۋىن جالعاستىرعان. تانىسقانىنا ەكى جىل بولعان جاستار ۇيلەنىپ، وتباسى قۇرۋ تۋرالى شەشىمگە كەلگەن.

«ەلشىلىككە بارىپ نەكەمىزدى تىركەيتىنىمىزدى بىردەن كەلىستىك. ازداپ الاڭداپ تۇرعانىمىزبەن باقىتتىمىز. ءبىز ءۇشىن بۇگىن ەرتەگىگە بەرگىسىز باقىتتى كۇن»، - دەيدى دانيار مەن دينارا. ىندەتكەن بايلانىستى توي كۇنى كەيىنگە شەگەرىلىپ وتىر. الايدا جاستار تۋىنداعان قيىندىق ماحابباتتارىن تەك قۋاتتاي تۇسەتىنىنە سەنىمدى.