قورعانىس ءمينيسترى پرەزيدەنتكە قارۋلى كۇشتەردىڭ قۇرىلىسى جانە دامۋى تۇجىرىمداماسىن ازىرلەۋ تۋرالى باياندادى

None
None
نۇر- سۇلتان. قازاقپارات - پرەزيدەنت قاسىم- جومارت توقايەۆ قورعانىس ءمينيسترى نۇرلان ەرمەكبايەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

قورعانىس ءمينيسترى مەملەكەت باسشىسى - جوعارعى باس قولباسشىعا قارۋلى كۇشتەردىڭ اسكەري جانە جەدەل دايارلىعى، قازاقستان ارمياسىن دامىتۋ تۋرالى ەسەپ بەردى .

نۇرلان ەرمەكبايەۆ قاسىم- جومارت توقايەۆقا COVID-19 ىندەتىنە شالدىققان ازاماتتاردى قابىلداۋعا ارنالعان اسكەري مەديتسينالىق گوسپيتالدىڭ جۇمىسى تۋرالى باياندادى. سونداي- اق ول اسكەري قىزمەتشىلەر رەسپۋبليكانىڭ 10 قالاسىندا دەزينفەكسيالاۋ جۇمىستارىن جۇرگىزگەنى جانە قازاقستاندىق اسكەري دارىگەرلەردىڭ ەلىمىزگە كەلگەن رەسەيلىك ارىپتەستەرىمەن بىرلەسىپ ارەكەت ەتىپ جاتقانى جايىندا ايتتى.

قورعانىس ءمينيسترى قارۋلى كۇشتەردىڭ قۇرىلىسى جانە دامۋى تۇجىرىمداماسىن ازىرلەۋ تۋرالى دا اتاپ ءوتتى. قاسىم- جومارت توقايەۆ قازاقستاندىق اسكەردى دامىتۋدى جوسپارلاۋ كەزىندە مەملەكەتتىڭ قارجى- ەكونوميكالىق مۇمكىندىكتەرىن ەسكەرۋ قاجەت ەكەنىنە باسا نازار اۋداردى. قورعانىس ءمينيسترى تۇجىرىمدامانى ازىرلەۋدىڭ ءبىرىنشى كەزەڭىندە بيۋدجەت قارجىسىن ۇنەمدەۋ ماقساتىندا ۇيىمدىق- شتاتتىق قۇرىلىمدى، اسكەري بولىمشەلەردىڭ سانى مەن اسكەري ينفراقۇرىلىم نىساندارىن وڭتايلاندىرۋعا، وق- دارىلەردى جانە اسكەري تەحنيكانى ءتيىمدى پايدالانۋعا باسىمدىق بەرىلەتىنىن جەتكىزدى. نۇرلان ەرمەكبايەۆ قاسىم- جومارت توقايەۆقا اسكەري مىندەتتىلەردى جەدەل اسكەرگە شاقىرۋ ناۋقانىنىڭ اياقتالۋى تۋرالى اقپارات بەردى.

مەملەكەت باسشىسى قايتا قارۋلاندىرۋ جۇمىستارىن جوسپارلى جۇرگىزۋگە، اسكەردى جاڭعىرتۋعا، ونىڭ ىشىندە، اسكەري كوميسسارياتتاردىڭ قىزمەتىن اۆتوماتتاندىرۋ جانە سيفرلاندىرۋ قاجەتتىگىن اتاپ ءوتتى.

پرەزيدەنتتىڭ پىكىرىنشە، اسكەري ءتارتىپتى جانە جەمقورلىققا قارسى كۇرەستى نىعايتۋعا باسا ءمان بەرۋ كەرەك. باس قولباسشى بەيرۋت پورتىنداعى جارىلىس سالدارىنان زارداپ شەككەن ادامدارعا مەديتسينالىق كومەك كورسەتۋ ءۇشىن ليۆانعا اسكەري مەديتسينا قىزمەتكەرلەرىن جونەلتۋ ماسەلەسىن پىسىقتاۋدى تاپسىردى. بەيبىت ومىرگە جانە سوعىس جاعدايىنا بەيىمدەلگەن تەحنيكالىق قىزمەتتەر مەن اسكەري قۇرىلىمداردىڭ تەحنوگەندىك جانە تابيعي سيپاتتاعى توتەنشە جاعدايلاردى جويۋعا، سونداي- اق، بيولوگيالىق جانە حيميالىق قاۋىپپەن كۇرەسكە جۇمىلدىرىلۋ ىقتيمالدىعىن ەسكەرە وتىرىپ، ولاردىڭ تۇراقتى تۇردە اسكەري دايىندىقتان ءوتىپ تۇرۋى قاجەت ەكەنى ايتىلدى.

سوڭعى جاڭالىقتار