ومارتاعا وڭاي سوقپاعان جاز
بۇل جايت كوپتەگەن شارۋا قوجالىعىن ابدەن تيتىقتاتتى. ديقاندار مەن مال وسىرەتىندەردى ايتپاعاندا، ومارتاشىلار دا وسى ماۋسىمدا بالدىڭ كولەمى ماردىمسىز بولا ما دەپ الاڭداۋلى. قاپىرىق اۋا رايى شاعىن كولشىكتەردى كەپتىرىپ، سارقىراپ اعىپ جاتقان وزەندەردى ورتايتىپ تاستاعان..
الەكساندر كراسيلنيكوۆ 6 جىلعا جۋىق بال اراسىن باعۋمەن شۇعىلدانادى. العاشىندا جاي عانا اۋەستىك دەپ قابىلداعانىمەن، قازىر ومارتاسىن كەڭەيتىپ، 50 مىڭ جاندىككە دەيىن جەتكىزگەن. ءبىراق بيىلعى قۋاڭشىلىقتان اعزاعا پايداسى مول بالدىڭ ءتۇسىمى از بولادى دەپ توپشىلاپ وتىر. سەبەبى ىلعالدىڭ ازدىعىنان شىرىندى دالا گۇلدەرى سولىپ قالعان. سوندىقتان سۋارمالى القابى بار ومارتاشىلاردىڭ عانا اسىعى الشىسىنان ءتۇسىپ تۇر.
الەكساندر كراسيلنيكوۆ، كاسىپكەر:
- ماعان دا قازىر تۇيەجوڭىشقا، قىزىلباس بەدە سياقتى شىرىندى گۇلدەردى وسىرۋگە جەر تەلىمى قاجەت بولىپ تۇر. بال ارالارى ءۇشىن قاراپايىم كۇنباعىس تاپشى. سوندىقتان كوڭىلدە كۇدىك باسىم.
اسا مۇمكىندىگى بولماعاندىقتان، كاسىپكەر ومارتانى اۋلاسىنداعى شاعىن باقشاعا ورنالاستىرعان. بيىلعى ماۋسىمنىڭ العاشقى ءونىمىن دە جيناپ ۇلگەرىپتى. ال كەلەر جىلدان باستاپ ۇيالاردىڭ سانىن كوبەيتۋدى كوزدەيدى. بۇل ماقساتتا مەملەكەتتىك سۋبسيدياعا يەك ارتۋدى جوسپارلاپ وتىر.
گۇلناز شومەكەيەۆا، قوبدا اۋىلدىق وكرۋگى اكىمى اپپاراتىنىڭ باس مامانى:
- قازىرگى تاڭدا حالىققا ءوزىنىڭ شارۋاسىن اينالدىرىپ كەتۋگە كوپتەگەن قولداۋلار كورسەتىلىپ جاتىر. سونىڭ ىشىندە «يگىلىك» باعدارلاماسى، «ەڭبەك»، «باستاۋ بيزنەس» باعدارلاماسى. ەندى ول كىسى كەلىپ، ءوزىنىڭ قۇجاتتارىن تاپسىرسا ءارى قاراي ءبىز بارىمىزشا كومەگىمىزدى كورسەتەمىز.
ايتا كەتۋ كەرەك، بيىل قوبدا اۋدانىنىڭ كاسىپكەرلەرىن قولداۋعا مەملەكەتتىك بيۋدجەتتەن 37 ميلليون تەڭگە قارجى بولىنگەن. قازىر 10 ازامات تيەسىلى نەسيەگە قول جەتكىزىپ، شارۋاسىنا كىرىسىپ تە كەتتى. سوندىقتان ولاردىڭ ءىسى جاندانادى دەگەن ءۇمىت بار.
www.24.kz