ماسكا باعاسىن ارزانداتۋعا تىرىسامىز - ليۋدميلا بيۋرابەكوۆا
«شىندىعىندا اقپاندا ماسكا باعاسى 15 تەڭگە ەدى. ول كەزدە ىندەت ءورشىپ تۇرعان بولاتىن. بارلىق ەلدەر، ونىڭ ىشىندە قازاقستان دا جەكە قورعانىش زاتتارىن ەكسپورتقا شىعارۋدى توقتاتتى. دەگەنمەن، جەكە قورعانىش زاتتارىن، ماسكالاردى شىعاراتىن وتاندىق وندىرۋشىلەر بولعانىمەن ءبىز يمپورتقا تاۋەلدىمىز. ءبىز سىرتتان، ونىڭ ىشىندە قىتايدان اكەلىنەتىن شيكىزاتقا تاۋەلدى بولىپ وتىرمىز. سول ۋاقىتتا شيكىزات قولجەتىمدى بولمادى. وتاندىق وندىرۋشىلەرىمىز وزدەرىنىڭ ۇزاقمەرزىمدى كەلىسىمشارتتارى اياسىندا مەديتسينا قىزمەتكەرلەرىن قامتاماسىز ەتۋ ءۇشىن جۇمىس ىستەدى»، - دەدى ۆيتسە- مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، سول كەزدە وتاندىق نارىقتا ماسكا تاپشىلىعى ورىن الىپ، دەنساۋلىق ساقتاۋ مينيسترلىگى وتاندىق وندىرۋشىلەرمەن ءونىمدى ءوندىرۋ قۋاتىن ارتتىرۋ تۋرالى كەلىسسوزدەر جۇرگىزدى.
«مەملەكەت مەديتسينالىق ماسكا باعاسىن رەتتەمەيدى. توتەنشە جاعداي رەجيمى كەزىندە شەكتى باعانى بەكىتۋ تۋرالى شەشىمدى مەملەكەتتىك كوميسسيا نارىقتى تۇراقتاندىرۋ ءۇشىن قابىلدادى. ەستەرىڭىزدە بولسا، سول ۋاقىتتا كەيبىر ادامداردىڭ الاياقتىق ارەكەتتەرى ورىن الدى. سوندىقتان وسىنداي شەشىم قابىلدانىپ، ماسكا باعاسى 118 تەڭگە بولىپ بەكىتىلدى. نارىق اشىلىپ، شيكىزات پايدا بولعاننان كەيىن دە ماسكا قىمباتتاۋىن توقتاتپادى. فارماتسيەۆتيكا ونەركاسىن قاداعالايتىن يندۋستريا جانە ينفراقۇرىلىمدىق دامۋ مينيسترلىگىنىڭ بىزگە ۇسىنعان مالىمەتتەرىنە سايكەس، شيكىزات 20-25 ەسە قىمباتتاعان. سوندىقتان ماسكا باعاسى بۇرىنعى 15 تەڭگە دەڭگەيىنە تۇسپەيدى. قازىرگى ۋاقىتتا وندىرۋشىلەرىمىزدەن ماسكا باعاسىن تومەندەتۋ ءۇشىن كەلىسسوز جۇرگىزىپ جاتىرمىز. تاياۋ ۋاقىتتا ماسكا باعاسى 60 تەڭگەگە دەيىن ارزانداپ قالۋى مۇمكىن»، - دەدى ليۋدميلا بيۋرابەكوۆا.
اۆتور: مارلان جيەمباي