نۇر- سۇلتاندا مۇعالىمدەر مەن دارىگەرلەرگە الەۋمەتتىك تۇرعىن ءۇي سالىنۋدا

نۇر- سۇلتان. قازاقپارات - ەلوردا اكىمدىگى قازاقستاندىق يپوتەكالىق كومپانيامەن بىرلەسىپ ءبىرقاتار الەۋمەتتىك تۇرعىن ءۇي قۇرىلىسىن جۇزەگە اسىرۋدا، دەپ حابارلايدى قالا اكىمدىگىنىڭ رەسمي سايتى.

«بۇل ۇيلەر ساتىپ الۋ قۇقىعىمەن جالعا بەرىلەتىن تۇرعىن ءۇي قاتارىنا جاتادى. قولجەتىمدى باسپانا مۇعالىمدەر مەن دارىگەرلەر اراسىندا بولىنەدى. بيىل بەرىلەتىن پاتەر سانى - 1 مىڭعا جۋىق. بۇگىن شۇعىلا، قوسشىعۇل ۇلى، تورايعىروۆ كوشەلەرىندە، تولەبايەۆ جانە شارباقتى كوشەلەرىنىڭ قيىلىسىندا جانە تىلەندييەۆ داڭعىلىندا ورنالاسقان ءۇيدىڭ قۇرىلىسى بارىسىمەن تانىستىم»، - دەپ جازدى التاي كولگىنوۆ ءوزىنىڭ «ينستاگرام» پاراقشاسىندا.

بۇدان باسقا، كەزەكتە تۇرعان (حالىقتىڭ الەۋمەتتىك ءالسىز توپتارىنا)، تۇرعىن ءۇي قۇرىلىس جيناق بانكىنىڭ سالىمشىلارى ءۇشىن تۇرعىن ءۇي سالۋ بويىنشا جۇمىس ءجۇرىپ جاتىر. كەلەسى جىلدارعا باعىتتالعان دايىندىق جۇمىستارى دا باستالدى.