جان كوسوبۋتسكي سوڭعى جەڭىسىنەن كەيىن الەمدىك رەيتينگتە ايتارلىقتاي جوعارىلادى

نۇر-سۇلتان. قازاقپارات - قازاقستاندىق بوكسشى جان كوسوبۋتسكي (14-0، 13 ك و) مينسكىدەگى جەڭىسىنەن كەيىن Boxrec.com بەدەلدى پورتالىنىڭ رەيتينگىندەگى ورنى جوعارىلادى، دەپ حابارلايدى قازاقپارات Sports.kz سايتىنا سىلتەمە جاساپ.

كوسوبۋتسكي ونىنشى راۋندتا پولياك بوكسشىسى كاميل سوكولوۆسكيدى (9-18-2، 3 ك و) نوكاۋتپەن جەڭىپ، رەيتينگتە اسا اۋىر سالماقتا 47- ورىننان 44 كە كوتەرىلدى.

بۇل قازاقستاندىقتىڭ كاسىبي كارەراسىنداعى وتكىزگەن 14 جەكپە-جەكتىڭ ون ءۇشىنشى نوكاۋتى. ونىڭ ىشىندە جەتى رەت قاتارىنان نوكاۋتپەن جەڭگەن.

ەسكە سالا كەتەيىك، جان كوسوبۋتسكي IBO Inter- Continental نۇسقاسى بويىنشا چەمپيوندىق بەلبەۋىن ءساتتى قورعادى.

31 جاستاعى اسا سالماقتاعى بوكسشى ءۇشىن بۇل ونىڭ Universum Box-Promotion جاڭا پروموۋتەرلىك كومپانياسىمەن وتكىزگەن ەكىنشى جەكپە-جەگى بولدى.