وزەندە شومىلىپ جۇرگەن ايەلدى كاتەرمەن قاعىپ ولتىرگەن كۇدىكتى ۇستالدى

ورال. قازاقپارات - ورالدا وزەندە شومىلىپ جۇرگەن ايەلدى كاتەرمەن قاعىپ ولتىرگەن كۇدىكتى ۇستالدى، دەپ حابارلايدى قازاقپارات ءتىلشىسى.

ب ق و پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى اسحات تەمىرجانوۆتىڭ ايتۋىنشا، بۇل وقيعا 6- ماۋسىم كۇنى شاعان وزەنىندە «دوستىق» ساياجاي قوعامى اۋدانىندا بولعان ەدى.

بەلگىسىز بىرەۋ وزەندە ءجۇزىپ جۇرگەن ايەلدى كاتەرمەن قاعىپ كەتىپ، ولتىرگەن بولاتىن. الىنعان شارالار بارىسىندا 5- تامىز كۇنى وسى قىلمىستى جاساعان كۇدىكتى انىقتالدى. ول كامەلەتكە تولماعان تۇرعىن بولىپ شىقتى.

«قازىرگى كەزدە تەرگەۋ امالدارى جۇرگىزىلۋدە. باسقا اقپارات ق ر قىلمىستىق ءىستى جۇرگىزۋ كودەكسىنىڭ 201-بابىنا سايكەس جاريالاۋعا جاتپايدى»، دەدى ا. تەمىرجانوۆ.

تۇرعىنداردىڭ سوزىنە قاراعاندا، ۇستالعان كۇدىكتى بەلگىلى كاسىپكەر، وبلىستىق ءماسليحات دەپۋتاتى ۆالەري كرىلوۆتىڭ 17 جاستاعى ۇلى كورىنەدى.

ەسكە سالا كەتەيىك، بۇدان بۇرىن ورالدا وزەندە شومىلىپ جۇرگەن ايەلدى بەلگىسىز بىرەۋدىڭ موتورلى قايىقپەن جانشىپ ءولتىرىپ كەتكەنىن جازعان بولاتىنبىز.