بەس اي كارانتيننەن كەيىن ناۋقاس بۇلدىرشىندەرگە وپەراتسيا جاساۋ باستالدى

نۇر-سۇلتان. قازاقپارات - الماتىدا بەس ايلىق كارانتيننەن كەيىن اۋىر ناۋقاسقا شالدىققان بۇلدىرشىندەرگە وپەراتسيا جاساۋ قايتا باستالدى.

اسىرەسە شاعىن ينۆازيالىق حيرۋرگيا ادىسىنە باسىمدىق بەرىلىپ وتىر. قازىر قولدا بار جاڭا تەحنولوگيالار مۇنداي وپەراتسيالاردىڭ جەڭىل ءارى ءساتتى وتۋىنە مول مۇمكىندىك بەردى.

سافينا دۇنيەگە كەلگەندە اناسى گاۋھار اسىلبەكوۆا ءبىر جايسىزدىقتى سەزەدى. ويتكەنى وعان قىزىنىڭ باسىنىڭ ءپىشىنى وزگەشەلەۋ بولىپ كورىنەتىن. جاس انا ءسابيىن بىرنەشە پەدياترعا قاراتىپتى. بارلىعى دا بالا ساۋ، اتالارىنىڭ قانىندا بار شىعار دەپ جاۋاپ بەرەدى. ءبىراق انا جۇرەگى بايىز تاپپايدى. سويتسە بەكەر ەمەس ەكەن. نەيروحيرۋرگتار نارەستەگە كرانيوسينوستوز دەگەن دياوگنوز قويادى. مۇنداي وپەراتسيانى الماتىدا ءجيى جاسايدى. ءبىراق سافينانىڭ ىندەتى كۇردەلى بولادى. دەگەنمەن دارىگەرلەر تاۋەكەلگە بارىپ وپەراتسيا جاساۋعا بەل بۋادى.

گاۋھار اسىلبەكوۆا، سافينانىڭ اناسى:

- مەن بالامدى تۋعاندا باسى وتە ەرەكشە بولدى. باسقا بالالاردىكى سەكىلدى ەمەس. قازىر مەنىڭ جانىمدا. قۇدايعا شۇكىر. مىڭدا ءبىر راحمەت. بۇگىن ءۇشىنشى كۇن. قۇداي قالاسا ءبىز جازىلىپ كەلە جاتىرمىز. بۇيىرتسا، ءبىزدى ۇيگە جىبەرەتىن شىعار. جاقىن ارادا.

كرانيوسينوستوز كەزىندە نارەستەنىڭ باس سۇيەكتەرىنىڭ جىگى مەن ەڭبەگى تەز ءبىتىپ كەتەدى. ەگەر وپەراتسيا دەر كەزىندە جاسالماسا ميدىڭ ءوسۋى تەجەلەدى. سونىڭ سالدارىنان بالانىڭ دامۋى كەشەۋىلدەپ، كوزى ناشارلاپ، دەنەسى قۇرىسا باستايدى. بۇدان باسقا دا قيىندىقتار تۋىندايدى. سوندىقتان دياگنوز ەرتە قويىلىپ، وپەراتسيا ەرتە جاسالسا بالا تەز ساۋىعىپ كەتەدى.

ازامات جايىلعانوۆ، نەيروحيرۋرگ:

- بۇل وپەراتسيا ەندوسكوپيالىق اسسيستەنتسيامەن وتەدى. ەندوسكوپيا كەزىندە بىزدەر باقىلاپ تۇرامىز. قان قايدا قۇيىلىپ جۇرگەنىن، نە ىستەپ جۇرگەنىمىزدى، ينسترۋمەنتتەر قالاي باراتىنىن ءبارىن كورەمىز. ەرەكشىلىگى تاعى دا ول بالالارعا التى ايعا تولعانعا شەيىن جاسايمىز بۇنداي وپەراتسيالاردى. وپەراتسيا جاساعاننان كەيىن بالانىڭ ءومىرى كادىمگىدەي بالالارمەن تەڭ بولادى. ەشقانداي وزگەرىستەر بولمايدى. قاۋىپ جوق بولادى وپەراتسيادان كەيىن. جاڭا ءادىس وتە قاۋىپسىز. بۇرىن حيحۋرگتار باستىڭ ءبىراز بولىگىن كەسەتىن. كىشكەنتاي پاتسيەنتتەر كوپ قان جوعالتىپ، قان قۇيۋعا ءماجبۇر بولاتىن. جاڭا تەحنولوگيانىڭ كومەگىمەن قازىر وپەراتسيا تەز ءارى جەڭىل وتەدى. الماتىلىق حيرۋرگتار جىل باسىنان بەرى وسىنداي 25 وپەراتسيا جاساپتى.

www.24.kz