ەلوردا مەكتەپتەرىنە جاڭا وقۋلىق تاراتىلا باستادى

نۇر- سۇلتان. قازاقپارات - ەلوردالىق ءبىلىم باسقارماسى مەن «استانا - ادالدىق الاڭى» جوبالىق كەڭسەسىنىڭ قىزمەتكەرلەرى قالاداعى جالپى ءبىلىم بەرەتىن مەكتەپتەرگە وقۋلىقتىڭ تارالۋىن قاداعالاپ، كوشپەلى مونيتورينگ جۇرگىزدى، دەپ حابارلايدى قازاقپارات قالا اكىمدىگىنە سىلتەمە جاساپ.

ەلوردا مەكتەپتەرىندە جاڭا وقۋ جىلىنا دايىندىق جۇرگىزىلىپ جاتىر. قازىرگى ۋاقىتتا وقۋ ورىندارى جاڭا وقۋلىقپەن قامتاماسىز ەتە باستالدى.

«بۇل قويمادا 1-11 - سىنىپتارعا ارنالعان 19 باسپانىڭ وقۋلىعى بار. وسى جەردەن بارلىق مەكتەپتەر كەستەگە سايكەس وقۋلىق بەرىلەدى. بۇگىنگى تاڭدا 35 مەكتەپكە كىتاپ تاراتىلدى» ، - دەيدى قالالىق ءبىلىم باسقارماسى باسشىسىنىڭ ورىنباسارى باعلان سماتايەۆا.

بۇل رەتتە سانيتاريا نورمالارى قاتاڭ ساقتالادى. ەكى اپتا ىشىندە ەلورداعا شامامەن 20 جۇك كولىگىمەن 750 توننا وقۋلىق جەتكىزىلدى. وقۋلىق قازىر مەكتەپتەرگە ءبولىنىپ جاتىر. وقۋ قۇرالىن ۋاقتىلى جەتكىزۋدى مونيتورينگ توبى قاداعالايدى.

«بۇگىن قالالىق ءبىلىم باسقارماسىمەن بىرلەسە وتىرىپ، قوسشى اۋىلىنداعى مەكتەپكە بارىپ، وقۋلىقتاردى 1-11- سىنىپتارعا تاراتتىق. اتاپ ايتقاندا، وقۋلىقتاردىڭ № 54 مەكتەپ- ليتسەيگە جىبەرىلۋىن قاداعالادىق. ءبىز بۇل ۇدەرىستى تولىق باقىلايمىز» ، - دەيدى نۇر- سۇلتان قالاسى اكىمدىگىنىڭ «استانا- ادالدىق الاڭى» جوبالىق كەڭسەسىنىڭ ۇيلەستىرۋشىسى ساۋلە بيسەمبايەۆا.

قازاقستاندا الداعى وقۋ جىلىن ەلىمىزدىڭ بارلىق مەكتەپتەرىندەگى 1-11 سىنىپتاردا قاشىقتان وقىتۋ جوسپارلانعان. وسىعان بايلانىستى ءبىلىم باسقارماسىنا جانە وقۋ ورىندارىنىڭ ديرەكتورلارىنا مەكتەپتىڭ قاشىقتان وقىتۋعا دايىندىعىن قامتاماسىز ەتۋ تاپسىرىلدى.