گرۋزيادا قازاقستاندىق جاس ءوسپىرىم ىزدەستىرىلىپ جاتىر
قۇتقارۋشىلار جاس ءوسپىرىمدى سۆانەتيادان دا، قارا تەڭىز جاعالاۋىنان دا ىزدەۋدە. يليا پيلپانيدىڭ سۋرەتى گرۋزيانىڭ ءى ءى م بارلىق بولىمدەرىنە جىبەرىلدى. مۇنداي مالىمدەمەنى گرۋزيانىڭ ءى ءى م ارنايى بريفينگتە توتەنشە جاعدايلاردى باسقارۋ قىزمەتىنىڭ باسشىسى تەيمۋراز مگەبريشۆيلي جاسادى، دەپ حابارلايدى قازاقپارات «گرۋزيا جاڭالىقتارىنا» سىلتەمە جاساپ.
يليا پيلپاني - قازاقستان ازاماتى. ول قىستا اكەسىمەن بىرگە الماتىدان مەستياداعى تۋىستارىنا قوناققا كەلگەن. كوروناۆيرۋس ىندەتىنە بايلانىستى ولار قازاقستانعا قايتا الماعان. 18- شىلدە كۇنى تاڭەرتەڭ يليا ۆەلوسيپەد تەبۋگە ۇيدەن شىعىپ كەتكەن. سوڭعى رەت يليانى لەندجەري اۋىلىنان كورگەن.
اكەسى جۋرناليستەرگە بەرگەن سۇحباتىندا ۇلىمەن ۇيدە جانجال بولعانىن جانە بالانىڭ ۇيدەن قاشۋدى جوسپارلاۋى مۇمكىن ەكەنىن جوققا شىعارماعانىن ايتتى. توتەنشە جاعدايلاردى باسقارۋ قىزمەتىنە جاس ءوسپىرىمنىڭ جوعالعانى تۋرالى حابار 19- شىلدەدە كەلىپ ءتۇستى.
«112» قوعامدىق قاۋىپسىزدىكتى باسقارۋ ورتالىعى گرۋزياداعى بارلىق قولدانىستاعى تەلەفون نومىرلەرىنە يليا پيلپانيدىڭ فوتوسۋرەتى بار ءۇش تىلدە اقپاراتتىق قىسقا ماتىندىك حابارلامالار جىبەردى، ەگەر ولاردا قانداي دا ءبىر اقپارات بولسا، 112 نومىرىنە قوڭىراۋ شالا الادى»، - دەپ مالىمدەدى مگەبريشۆيلي.
جاس ءوسپىرىم جوعالىپ كەتكەننەن كەيىن قۇتقارۋشىلار سۆانەتيدەگى لەندجەري، لاشدگۆەري، مەسگۋني، نەمسيا، سولي، كاەري، لحاني، كارتۆاني، لانحۆري، يسكاري، تسالاناري، ەتسەري، كالاشي، ۋشگۋلي، ۋگۆالي، پاري، زەمو لۋحا، كۆەمو لۋحا، لاحامۋلا، نوداشي، ماگاردي، لەزگارا، سۆيپي، گۆەبالدي سولي، كاەري، لەمسيا، كاشۆەتي، لاشتگۆەري، نەسگۋني، زارگاشي، كۋرەلي، بەچو، مازەري، دجوركۆالي، لاتالي سەكىلدى 38 ەلدىمەكەندى جانە ولاردىڭ اينالاسىن تەكسەردى.
جوعارىدا اتالعان اۋىلدارداعى قاراۋسىز قالعان ۇيلەر، سونداي-اق جەتى وزەنگە جاقىن اۋماق، ولاردىڭ ارنالارى مەن شاتقالدارى تەكسەرىلدى. قۇتقارۋشىلار تاۋلاردى، جايىلىمداردى، تۋننەلدەردى قاراپ شىقتى، ورماننان ىزدەدى. ينگۋري وزەنى مەن ينگۋري گەسدە ىزدەۋ جۇمىستارى جۇرگىزىلۋدە.
«ىشكى ىستەر مينيسترلىگىنىڭ وكىلدەرى ءىز-ءتۇزسىز جوعالىپ كەتكەن جاس ءوسپىرىمنىڭ وتباسىمەن ۇنەمى بايلانىستا. يليا پيلپانيدىڭ اتا-اناسىنا كۇن سايىن ولاردىڭ جۇمىسى تۋرالى اقپارات بەرىلەدى»، — دەپ اتاپ ءوتتى مگەبريشۆيلي.