كوشەدە «مانياك» ءجۇر دەپ جالعان اقپارات تاراتقان ايەل ۇستالدى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وقيعا وتكەن دەمالىس كۇندەرى مامليۋتكا قالاسىندا بولعان.
WhatsApp مەسسەندجەرىندە جەرگىلىكتى توپتاردا «ساق بولىڭىزدار! مامليۋتكا قالاسىنىڭ جۇمىسشى كەنتىندە مانياك پايدا بولدى، كەشقۇرىم جۇرتتىڭ سوڭىنا تۇسەدى. 30.07.2020 ج. بويجەتكەندى قۋدى، الايدا ول قاشىپ قۇتىلدى. بۇرىن قىلمىستىق جاۋاپكەرشىلىككە تارتىلعان» دەگەن ماتىنمەن ەر ادامنىڭ فوتوسۋرەتى تاراپ كەتكەن.
فەيك اقپاراتتى اۋداندىق پوليتسيا ءبولىمىنىڭ قىزمەتكەرلەرى الەۋمەتتىك جەلىلەردى مونيتورينگتەن وتكىزۋ بارىسىندا انىقتايدى. حابارلاما اۆتورى دا كوپ ۇزاماي انىقتالدى. مامليۋتكانىڭ 27 جاستاعى تۇرعىنى جالعان اقپاراتتى تاراتقانىن مويىندادى. ايەل 1982-جىلى تۋعان جەرلەسىمەن اراز بولعان، بۇل قادامعا سول سەبەپتەن بارعان.
3- تامىز كۇنى اكىمشىلىك سوت «جالا جابۋ» بابى بويىنشا ءىستى قارادى. مەدياتسيا ءراسىمى بارىسىندا زارداپ شەگۋشى نارازىلىعىنان باس تارتىپ، جەرلەسىمەن تاتۋلاسۋعا كوندى.
«جالعان حابارلاما تاراتقانى ءۇشىن ايەلگە 180 ا ە ك مولشەرىندە ايىپپۇل سالىنۋى نەمەسە 20 تاۋلىككە دەيىن اكىمشىلىك قاماۋعا الۋ جازاسى قولدانىلۋى مۇمكىن ەدى. زاڭ بويىنشا جالا جاپقان، بىرەۋدىڭ ار-نامىسىنا نۇقسان كەلتىرەتىن جالعان اقپارات تاراتقان جەكە تۇلعالارعا وسىنداي جازا قاراستىرىلعان.
الايدا، ءبىز دەر كەزىندە جالعان حابارلامانى كورىپ، جۇرتتىڭ قاتتى دۇرلىگۋىنە جول بەرمەدىك. 20 قىزمەتكەر 2-3 ساعات بويى WhatsApp جەلىسى ارقىلى «مانياك» تۋرالى حابارلامانىڭ جالعاندىعىن ايتىپ، ونىڭ ءارى قاراي تارالۋىن توقتاتتى»، - دەيدى مامليۋت اۋداندىق پوليتسيا ءبولىمىنىڭ باسشىسى سەرىك ءالجانوۆ.