كوروناۆيرۋس ىندەت قاۋپى تۋرالى «ساۋ بولايىق!» تەلەجوباسى ەفيرگە شىقتى

نۇر- سۇلتان. قازاقپارات - «قازاقستان» تەلەراديوكورپوراتسياسى كوروناۆيرۋسپەن كۇرەسۋدىڭ جولدارىن تۇسىندىرەتىن تاعى ءبىر باعدارلامانى ەفيرگە شىعاردى.

كورپوراتسيا قۇرامىنداعى Balapan تەلەارناسىنان بالالارعا ارنالعان «ساۋ بولايىق!» جاڭا جوباسى كورسەتىلە باستادى، دەپ حابارلايدى قازاقپارات ءتىلشىسى. حاباردىڭ ماقساتى - كىشكەنتاي كورەرمەندەرگە دەنساۋلىققا قاتىستى ماڭىزدى اقپاراتتى ويىن تۇرىندە بەرە وتىرىپ، سالاۋاتتى ءومىر سالتىن ناسيحاتتاۋ. تۇتاس الەم كوروناۆيرۋسپەن كۇرەسىپ جاتقاندا دەنساۋلىقتى كۇتۋ ءبىرىنشى ورىنعا شىقتى. جوبا كىشكەنتاي كورەرمەندەرگە «دەنساۋلىق - زور بايلىق» ەكەنىن ۇعىندىرۋدى ماقسات ەتەدى. كارانتين رەجيمىندە قاۋىپسىزدىك شارالارىن ساقتاۋدىڭ ماڭىزى تۋرالى ءتۇسىندىرىپ، سپورتپەن دوس بولۋعا شاقىرادى. «ماۋسىم ايىنان باستاپ Qazaqstan تەلەارناسىنان بەس كۇن بويى تىكەلەي ەفيردە «تەلەدارىگەر» جوباسى شىعا باستادى. نەگىزگى ماقسات - ەل تۇرعىندارىنا، اسىرەسە شالعاي اۋىل- ايماقتاعى كورەرمەنگە قازىرگى كۇردەلى احۋالعا بايلانىستى كۇندەلىكتى مەديتسينالىق كەڭەس بەرۋ. دارىگەرلەر تىكەلەي ەفير بارىسىندا COVID-19 ۆيرۋسى مەن وزگە دە اۋرۋلاردان ساقتانۋ مەن الدىن الۋ شارالارى، ەمدەۋ تاسىلدەرى تۋرالى نۇسقاۋلىق بەرەدى. الايدا بۇل تۇرعىدا بالالاردىڭ دا كوكەيىندە ءتۇرلى سۇراقتاردىڭ تۋىندايتىنى ءسوزسىز. ۇلكەندەر ءوز الدىنا، بالالاردى ىندەتتەن قورعاۋ - باستى ماسەلە. ول اتا- انالاردىڭ جاۋاپكەرشىلىگىمەن قاتار، كىشكەنتايلاردىڭ وزىنە اۋرۋدىڭ ءقاۋپىن تۇسىندىرە وتىرىپ جۇزەگە اسىرىلاتىنى ءسوزسىز. Balapan ارناسى وسى ىسكە اتسالىسۋدى كوزدەيدى. بۇل جوبا «قازاقستان» تەلەراديوكورپوراتسياسىنىڭ وسى باعىتتاعى اقپاراتتاندىرۋ شارالارىنىڭ جالعاسى» ، - دەلىنگەن تەلەراديوكورپوراتسيانىڭ باسپا ءسوز قىزمەتى تاراتقان اقپاراتتا.

«ساۋ بولايىق!» تەلەجوباسى ەفيرگە اپتاسىنا ءۇش رەت دۇيسەنبى، سارسەنبى، جۇما كۇندەرى ساعات 12:00-دە جانە 19:25-تە شىعادى. باعدارلامانىڭ «كەرەك دەرەك» ايدارىندا مەديتسينا سالاسىنا قاتىستى تەرميندەر جەڭىل تىلمەن تۇسىندىرىلسە، «شىمىر بول!» ايدارىندا ءتۇرلى جاتتىعۋلار كورسەتىلەدى. «جاتتا، ەستە ساقتا!» ءبولىمى باعدارلاما قورىتىندىسى رەتىندە سۇراق- جاۋاپ تۇرىندە وتەدى. جوبانىڭ ەرەكشەلىگى، باعدارلاماعا ەكران الدىندا وتىرعان كورەرمەندەر دە اتسالىسا الادى. ول ءۇشىن جاتتىعۋ جاساپ، ارنانىڭ رەسمي پاراقشاسىن بەلگىلەپ، الەۋمەتتىك جەلىگە جۇكتەۋ قاجەت. ەڭ ۇزدىك بەينەجاتتىعۋ «شىمىر بول!» ايدارىندا كورسەتىلەدى. جوباBalapan ارناسىنىڭ ەفيرىنەن جىل سوڭىنا دەيىن جالعاسادى.