جەلىدە ۆيكتور سوي اندەرىنىڭ نەگىزىندە ءتۇسىرىلىپ، قاشىقتىقتى ساقتاۋعا ۇندەگەن بەينەروليك شىقتى

نۇر-سۇلتان. قازاقپارات - «ءوزىڭدى كۇت، اباي بول» بەينەروليگىنىڭ اۆتورلارى ماسكا تاعۋ، الەۋمەتتىك قاشىقتىقتى ۇستانۋ، جاقىنىنىڭ دەنساۋلىعىنا قامقور بولۋعا شاقىردى.

ولار اتى اڭىزعا اينالعان ۆيكتور سوي اندەرىنىڭ نەگىزىندە تۇرعىنداردى ساقتىق شارالارىن قولدانۋعا شاقىرىپ وتىر. الەۋمەتتىك جەلىدە روليك تەز تارالىپ، پايدالانۋشىلار اۆتورلاردىڭ بۇل يدەياسىن جاقسى قابىلدادى، دەپ حابارلايدى قازاقپارات.

ۆيدەو ق ر دەنساۋلىق ساقتاۋ ءمينيسترى الەكسەي سويدىڭ ماسكانى مىندەتتى تۇردە تاعۋ جانە الەۋمەتتىك قاشىقتىقتى ساقتاۋ ۇندەۋىنەن باستالادى. ودان كەيىن روليكتەن مەديتسينالىق قىزمەتكەرلەردىڭ كوروناۆيرۋسپەن تىكەلەي كۇرەس جۇرگىزىپ وتىرعان ەمحاناداعى كادرلاردى كورۋگە بولادى.

بۇدان باسقا، روليكتە جاعدايدى تۇراقتاندىرۋعا ۇلەسىن قوسىپ وتىرعان ەرىكتىلەر، پوليتسەيلەر، سانيتارلاردىڭ جۇمىسى دا كورسەتىلگەن. ءاندى ورىنداعان - پەتر پوگودايەۆ، ءماتىنىن جازعان - ءداۋىت شايحيسلاموۆ، مالىك حاسەنوۆ، الەكسەي ماكلاي جانە سانات شاپاشوۆ.

وسىلايشا، روليكتىڭ اۆتورلارى تۇرعىنداردى وزدەرى، جاقىندارىنا كۇتىم جاساپ، ماسكا تاعۋعا، قاشىقتىقتى ۇستانۋعا جانە اباي بولۋعا شاقىردى. اتلعان ۆيدەونى ءتۇرلى پابليكتەر مەن الەۋمەتتىك جەلىلەردە 1 ميلليون ادام كورگەن.

اۆتور: ارايلىم مۇرات