جانۋارلارعا جاۋاپكەرشىلىكپەن قاراۋ تۋرالى زاڭ جوباسى كوپشىلىكتىڭ تالقىلاۋىنا شىعارىلدى
ق ر ەكولوگيا، گەولوگيا جانە تابيعي رەسۋرستار مينيسترلىگى بۇعان دەيىن ق ر پارلامەنتى ءماجىلىسىنىڭ ءبىر توپ دەپۋتاتتارى ازىرلەگەن زاڭ جوباسىن قوعامدىق تالقىلاۋدى وتكىزەدى. بۇگىنگى تاڭدا بۇل قۇجات ۇكىمەتتىڭ قاراۋىندا.
«قازاقستاندا جانۋارلاردى قورعاۋ تۋرالى جاڭا زاڭ جوباسىنىڭ قاجەتتىلىگى الدەقاشان ءپىسىپ- جەتىلگەن. ەلىمىزدە بارلىق جانۋارلارعا، ونىڭ ىشىندە ءۇي، جابايى جانە اۋىلشارۋاشىلىعى جانۋارلارىنا جاۋاپكەرشىلىكپەن قاراۋ تۋرالى بىردە- ءبىر زاڭ جوق. جانۋارلارعا قاتىگەزدىك كورسەتكەن ادامدار تۋرالى الەۋمەتتىك جەلىدە ءجيى جازىلادى. الايدا، بۇگىندە قازاقستانداعى جانۋارلارعا قاتىگەزدىك كورسەتكەنى ءۇشىن تاعايىندالاتىن جازا جەڭىل. سونىمەن بىرگە، تاجىريبە كورسەتكەندەي، جانۋارلارعا قاتىگەزدىكپەن قاراۋ ادامدارعا قاتىستى قاتىگەزدىك قىلمىستان 5 ەسە، مۇلىك قىلمىسىنان 4 ەسە كوپ»، دەلىنگەن حابارلامادا.
باسپاءسوز قىزمەتىنىڭ حابارلاۋىنشا، قولدانىستاعى زاڭنامادا جانۋارلارعا ارنالعان باسپانا ۇعىمى جانە ولاردى سالۋ ستاندارتتارى، ءۇي جانۋارلارىن سەرۋەندەتۋ جانە كۇتىپ ۇستاۋ ەرەجەلەرى جوق. ال قاڭعىباس يتتەر مەن مىسىقتاردى اۋلاۋ جانە جويۋ ەرەجەلەرى قالالار مەن ەلدىمەكەندەردە ءارتۇرلى.
«دالادا يتتەردى اتۋدى كوپشىلىكتىڭ سىنعا الۋدا. جانۋارلاردىڭ قۇقىعىن قورعاۋشىلار ونىڭ ورنىنا جانۋارلارعا ارنالعان باسپانا قۇرىپ، مىسىق پەن ءيتتى زارارسىزداندىرۋدى ۇسىنادى. كەيبىر ادامدار ءۇي جانۋارلارىن دالاعا تاستاپ، ولاردى ۇزاق ۋاقىت تاماقسىز، سۋسىز قالدىرادى. ۋاقتىلى ۆەتەرينارلىق كومەك كورسەتپەيدى جانە ت. ب. رەسپۋبليكامىزداعى وتكىزىلەتىن يتتەردىڭ توبەلەسى دە ەتيكالىق تۇرعىدا قايتا قاراۋدى قاجەت ەتەدى. كەيبىر حايۋاناتتار باعىنداعى جانە سيركتەردەگى جانۋارلاردى كۇتىپ- ۇستاۋ ەرەجەلەرىنىڭ قاتالدىعى ازاماتتاردىڭ اشۋ- ىزاسىن تۋدىرۋدا»، دەلىنگەن حابارلامادا.
جالپى، جانۋارلارعا قاتىگەزدىكپەن قاراۋ ماسەلەسى كۇردەلى. ول بالالار تاربيەسىمەن، پەداگوگيكا، ەتيكا، اقپاراتتىق، قورشاعان ورتانى قورعاۋ جانە قىلمىستىق- اتقارۋ ساياساتىمەن تىعىز بايلانىستى.
«سوندىقتان بۇگىندە مەملەكەت، ءبىرىنشى كەزەكتە، حايۋاناتتار باعىنداعى جانۋارلاردى ۇستاۋعا قويىلاتىن تالاپتاردى قاتايتۋ، جانۋارلاردى قورعاۋداعى ازاماتتىق باستامالاردى قارجىلاندىرۋ، سونىمەن بىرگە زوولوگيالىق ۆولونتەرلىكتى قولداۋ جانە مەكتەپ وقۋشىلارى مەن ستۋدەنتتەر اراسىندا جانۋارلارعا جاۋاپكەرشىلىكپەن قاراۋ يدەياسىن ىلگەرىلەتۋ ءۇشىن شارالار قابىلدايدى. ءوز كەزەگىندە، ەكولوگيا مينيسترلىگى حالىقتىڭ وسى ماسەلە بويىنشا بارلىق ۇسىنىستارىن قاراۋعا جانە زاڭ جوباسىن تالقىلاۋ كەزىندە ەسكەرۋگە دايىن»، دەلىنگەن حابارلامادا.
ەسكە سالا كەتسەك، مەملەكەت باسشىسى قاسىم- جومارت توقايەۆ تابيعاتقا زيانىن تيگىزگەن زاڭبۇزۋشىلارعا سالىناتىن ايىپپۇل قۇنىن ۇلعايتۋدى تاپسىردى. سونداي- اق پرەزيدەنت تاپسىرماسىمەن مەكتەپ باعدارلاماسىنا «بالالاردىڭ ەكولوگيالىق ءبىلىمى» اتتى جاڭا ءپان ەنگىزىلەدى.
ايتا كەتەرلىگى، قازاقستاندا قاراقۇيرىقتى ساقتاۋ جوباسى ىسكە قوسىلدى. كاسپي يتبالىعى قازاقستاننىڭ قىزىل كىتابىنا ەنگىزىلمەك.