كوروناۆيرۋسقا قارسى قازاقستاندىق ۆاكسينا بارلىق تالاپتارعا ساي - عىلىم دوكتورى

None
None
نۇر-سۇلتان. قازاقپارات - كوروناۆيرۋس ىندەتى ەتەك جايعالى الەم ەلدەرى جەدەل ۆيرۋسقا قارسى ۆاكسينا ازىرلەۋگە كىرىسىپ كەتتى.

بۇگىنگى كۇنى بىرنەشە ەل عالىمدارى ۆاكسينا ازىرلەپ، ونى سىناقتان وتكىزۋدە. ونىڭ ىشىندە ءبىزدىڭ وتاندىق عالىمدار دا بار، دەپ حابارلايدى قازاقپارات.

قازاقستاندىق عالىمدار اتالعان ۆيرۋسقا قارسى ۆاكسينا ازىرلەۋگە ناۋرىز ايىنىڭ سوڭىندا كىرىسكەن بولاتىن. وسى ورايدا وتاندىق عالىمداردىڭ ۆاكسينا ازىرلەۋدەگى جەتىستىگى تۋرالى تىلشىمىزگە ق ر ءبىلىم جانە عىلىم مينيسترلىگى عىلىم كوميتەتىنە قاراستى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتى باس ديرەكتورىنىڭ عىلىم جانە كوممەرتسيالاندىرۋ جونىندەگى ورىنباسارى، ۆەتەريناريا عىلىمىنىڭ دوكتورى ەرعالي ءابدىرايىموۆ اڭگىمەلەپ بەردى.

«كوروناۆيرۋس ىندەتىنە قارسى ۆاكسينا ازىرلەۋدى ءبىزدىڭ ينستيتۋتتىڭ عالىمدارى ناۋرىز ايىنىڭ سوڭىندا قولعا الدى. 9-مامىردا العاشقى ۆاكسينا دايىن بولدى. سونداي-اق، ول دۇنيەجۇزىلىك دەنساۋلىق ساقتاۋ ۇيىمىندا العاشقى قازاقستاندىق كانديداتتى ۆاكسينا رەتىندە تىركەلىپ، كلينيكاعا دەيىنگى سىناق جۇرگىزىلدى. شىلدە ايىنىڭ سوڭىندا الىنعان ناتيجەلەر بويىنشا وتاندىق ۆاكسينا زيانسىزدىعى، پيروگەندىگى، يممۋنوگەندىگى جانە تاعى باسقا پارامەترلەرى بويىنشا حالىقارالىق جانە قازاقستاندىق فارماكوپەيا تالاپتارىنا تولىق ساي كەلەتىنى دالەلدەندى»، - دەدى ە. ءابدىرايىموۆ.

ونىڭ ايتۋىنشا، اتالعان ۆاكسينا كلينيكالىق سىناقتان وتكەن سوڭ دەنساۋلىق ساقتاۋ مينيسترلىگىنە تىركەۋگە جىبەرىلەدى.

«سونىمەن قاتار ءبىزدىڭ عالىمدار 30-31-شىلدە كۇندەرى ەكىنشى سۋببىرلىكتى ۆاكسينا ازىرلەدى، ول دۇنيەجۇزىلىك دەنساۋلىق ساقتاۋ ۇيىمىندا تىركەلدى. بۇل ءبىزدىڭ عالىمداردىڭ ازىرلەگەن ەكىنشى ۆاكسيناسى. سونىمەن قاتار ونى ازىرلەۋگە ءبىزدىڭ ينستيتۋتتىڭ بارلىق عالىمدارى اتسالىستى. ال ۆاكسينا كىمدەرگە ەگىلەدى دەگەن سۇراققا كەلسەك، دەنساۋلىق ساقتاۋ مينيسترلىگىنىڭ تالاپتارى باسشىلىققا الىنادى»، - دەدى ول.

ماماننىڭ مالىمدەۋىنشە، جالپى كوروناۆيرۋس ىندەتىنە قارسى ۆاكسينانىڭ دايىن بولۋ مەرزىمى كلينيكالىق سىناقتاردىڭ ناتيجەسىندە انىقتالادى.

«ۆاكسينانىڭ باعاسى تۋرالى ايتۋعا ءالى ەرتەرەك. جالپى بۇگىنگى كۇنى ۆاكسينا ازىرلەۋ تەحنولوگياسى مەن تالاپتارى بەلگىلى. قازىرگى ۋاقىتتا ءار ەلدىڭ عالىمدارى ءوز مۇمكىندىكتەرى مەن بار نوۋ- حاۋدى قولدانۋدا، سوندىقتان بەلگىلى ءبىر ەلدىڭ ۆاكسيناسىنا قاتىستى دۇرىس نەمەسە بۇرىس دەپ ايتۋعا بولمايدى»، - دەيدى عىلىم دوكتورى.

اۆتور: ءالي يبرايەۆ

سوڭعى جاڭالىقتار