ساپاربايەۆ قوردايداعى تارتىپسىزدىكتەرگە قاتىستى ۇستالعان تۇرعىنداردىڭ تۋىستارىمەن كەزدەستى
ايماق باسشىسى قاراكەمەر جانە سورتوبە اۋىلدارىندا جەرگىلىكتى تۇرعىندارمەن ءبىرقاتار كەزدەسۋلەر وتكىزدى. بەردىبەك ساپاربايەۆ ۇستالعانداردىڭ تۋىستارىنىڭ بارلىق وتىنىشتەرىن مۇقيات تىڭداپ، ولاردىڭ ەشقايسىسى نازاردان تىس قالمايتىنىن جانە پروكۋراتۋرا، قۇقىق قورعاۋ جانە جەرگىلىكتى اتقارۋشى ورگاندارمەن قارالاتىنىن اتاپ ايتتى. ول بارلىق وزەكتى ماسەلەلەر قازاقستان زاڭناماسى اياسىندا شەشىلۋى ءتيىس ەكەندىگىن اتاپ ءوتتى.
«ءبىز بولعان قايعىلى وقيعالار 11 ادامنىڭ ولىمىنە اكەلىپ سوقتىرعانىن، ەكى جۇزگە جۋىق ادام جاراقات العانىن، ازاماتتارىمىزدىڭ مۇلكى زارداپ شەككەنىن ۇمىتپاۋىمىز كەرەك. سىزدەردىڭ بارلىق وتىنىشتەرىڭىز قارالادى، ۇستالعاندارمەن كەزدەسۋلەر مەن تەلەفون ارقىلى سويلەسۋلەر ۇيىمداستىرىلادى. قۇقىق قورعاۋ ورگاندارى تەرگەۋ جۇمىستارىن اياقتادى، ول ماتەريالدارمەن تاراپتار تانىستىرىلۋى كەرەك. زاڭدى بۇزعان جانە ولاردىڭ كىناسى دالەلدەنگەن ادامداردىڭ ءبارى جازالانۋى قاجەت ەكەنىن تاعى دا ايتقىم كەلەدى. بارلىعى زاڭ بويىنشا بولۋى كەرەك. بۇل ماسەلە مەملەكەت باسشىسى قاسىم- جومارت توقايەۆتىڭ جەكە باقىلاۋىندا»، - دەپ اتاپ ءوتتى ساپاربايەۆ.
سونىمەن قاتار، وبلىس اكىمى جەرگىلىكتى تۇرعىندارمەن بولعان اڭگىمە بارىسىندا مەملەكەت تاراپىنان قوماقتى قاراجات ءبولىنىپ، جەرگىلىكتى اتقارۋشى ورگاندار قورداي اۋدانىنداعى ەلدى مەكەندەردى دامىتۋ باعىتىندا اۋقىمدى جۇمىستار اتقارىپ جاتقاندىعىن اتاپ ءوتتى.
ماسەلەن، قاراكەمەر جانە ماسانشى اۋىلدارىنداعى الەۋمەتتىك نىسانداردى اباتتاندىرۋ مەن سالۋ ءۇشىن قوسىمشا 3 ميلليارد تەڭگە بولىنگەن. تۇرعىن ۇيلەر، سپورت جانە بالالار الاڭدارى، دارىگەرلىك امبۋلاتوريا، مەكتەپ، كوشەلەر سالىنىپ، گاز قۇبىرى، سۋمەن جابدىقتاۋ جەلىلەرى تارتىلىپ جاتىر. جۇزدەسۋ سوڭىندا ايماق باسشىسى ءتارتىپ پەن زاڭدىلىقتى ساقتاۋعا، ءتۇرلى ارانداتۋشىلىقتار مەن جالعان اقپاراتقا بوي الدىرماۋعا شاقىردى.
