ۇكىمەت وقۋشىلارعا پايدالانۋ ءۇشىن جارتى ميلليون كومپيۋتەر بەرەدى

نۇر-سۇلتان. قازاقپارات - پرەمەر- مينيستر اسقار مامين جاڭا وقۋ جىلىنا قاتىستى مينيسترلىكتەرگە تاپسىرما جۇكتەدى، دەپ حابارلايدى قازاقپارات ءتىلشىسى.

«وقۋ جىلىنىڭ باستالۋىنا ءبىر ايدان از ۋاقىت قالدى. دايىندىقتى بۇدان دا جانداندىرۋ كەرەك. قاشىقتان وقىتۋدىڭ مەتودولوگياسىن پىسىقتاپ، بالالار، اتا- انالار مەن مۇعالىمدەردىڭ اراسىندا اۋقىمدى ءتۇسىندىرۋ جۇمىستارىن جۇرگىزۋ ماڭىزدى. ول ءۇشىن 20 تامىزعا دەيىن الداعى وقۋ ءۇردىسى تۋرالى تولىق اقپارات بەرە وتىرىپ، ونلاين رەجيمدە رەسپۋبليكالىق اتا- انالار جينالىسىن ۇيىمداستىرۋ كەرەك»، - دەدى ا. مامين ۇكىمەت وتىرىسىندا.

ونىڭ سوزىنە قاراعاندا، ۇكىمەت اسا مۇقتاج وتباسىلاردىڭ بالالارىنا پايدالانۋ ءۇشىن شامامەن 500 مىڭ كومپيۋتەردى بەرۋدى قامتاماسىز ەتەدى.

«اكىمدىكتەر كومپيۋتەرلىك تەحنيكامەن قامتاماسىز ەتۋ ماسەلەسىن جەرگىلىكتى دەڭگەيدە قوسىمشا پىسىقتاسىن»، - دەدى ۇكىمەت باسشىسى.

بۇدان بۇرىن حابارلانعانداي، مينيستر باستاۋىش سىنىپ وقۋشىلارى ءۇشىن كەزەكشى سىنىپتار اشىلاتىنىن ايتتى. سونىمەن قاتار، جاڭا وقۋ جىلىندا كوللەدج ستۋدەنتتەرىنىڭ ءبىلىم الۋ ءتارتىبىن ءتۇسىندىردى.