ۋنيۆەرسيتەتتەردە وقىتۋ قاشىقتان جۇرگىزىلەدى - مينيستر

نۇر-سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ جوعارى وقۋ ورىندارىندا قاشىقتان وقىتۋ جالعاساتىنىن ايتتى، دەپ حابارلايدى قازاقپارات ءتىلشىسى.

«جوعارى وقۋ ورىندارىندا وقىتۋ نەگىزىنەن قاشىقتان جۇرگىزىلەدى. باكالاۆرياتتا پەداگوگيكالىق، IT، الەۋمەتتىك جانە گۋمانيتارلىق باعىتتار بويىنشا ءدارىس جانە سەمينار ساباقتارى قاشىقتان وتكىزىلەدى. تەحنيكالىق، اگرارلىق جانە تابيعي باعىتتار، مەديتسينا ءارى ونەر ماماندىقتارى بويىنشا دارىستەر مەن سەمينارلاردىڭ 70 پايىزى ونلاين فورماتتا، ال زەرتحانالىق جانە پراكتيكالىق ساباقتاردى (%30) كۇشەيتىلگەن سانيتارلىق شارالاردى قاتاڭ ساقتاي وتىرىپ، جەكە-جەكە وتكىزۋگە مۇمكىندىك بەرەمىز»، - دەدى مينيستر ۇكىمەت وتىرىسىندا.

ونىڭ سوزىنە قاراعاندا، ماگيستراتۋرا مەن دوكتورانتۋراداعى ساباقتار ارالاس پرينتسيپپەن وقىتىلادى.

«ال بولاشاق دارىگەرلەر وقيتىن ينتەرناتۋرا مەن رەزيدەنتۋرادا وقۋ ءداستۇرلى، شتاتتى فورماتا جۇرەتىن بولادى. وسى بەرىلگەن باعداردىڭ اياسىندا ءاربىر ۇيىم وزدەرى دەربەس شەمىم قابىلدايدى»، - دەدى ا. ايماعامبەتوۆ.

بۇدان بۇرىن حابارلانعانداي، مينيستر باستاۋىش سىنىپ وقۋشىلارى ءۇشىن كەزەكشى سىنىپتار اشىلاتىنىن ايتتى. سونىمەن قاتار، جاڭا وقۋ جىلىندا كوللەدج ستۋدەنتتەرىنىڭ ءبىلىم الۋ ءتارتىبىن ءتۇسىندىردى.