وڭتۇستىك كورەيادا تولاسسىز جاۋعان نوسەر جاڭبىردان التى ادام قازا تاپتى

سەۋل. قازاقپارات - دۇيسەنبى كۇنى وڭتۇستىك كورەيانىڭ ورتالىق اۋداندارى مەن سەۋلدا تولاسسىز نوسەر جاڭبىر جاۋىپ، ۇيلەر مەن جولداردى سۋ باستى.

بيلىك جاعالاۋ ماڭىنداعى جانە تاۋلى اۋدانداردى جابۋعا ءماجبۇر بولىپ وتىر.

بۇل تۋرالى قازاقپارات رەنحاپ اگەنتتىگىنە سىلتەمە جاساپ حابارلايدى.

كانۆوندو تاۋلى پروۆينتسياسىنداعى چحۋنچحون قالاسىندا، سونداي-اق كەنگگي پروۆينتسياسى اۋماعىنا ساعاتىنا 100 م م جاڭبىر جاۋعان. سەۋلدە وڭتۇستىكتەگى كاننام اۋدانىندا جولدا ەنى 2 مەتر جانە تەرەڭدىگى 1,5 مەترلىك شۇڭقىر پايدا بولعان.

بيلىك جولدى قالپىنا كەلتىرىپ جاتىر. سەۋلدىڭ تاعى ءبىر اۋدانىندا بيلىك سۋ باسقان ۇيلەردىڭ سۋىن سورعىزىپ، داۋىل كەزىندە قۇلاعان اعاشتاردى الىپ تاستادى. حان وزەنىنىڭ بويىنداعى كوپتەگەن ساياباقتارعا كىرۋگە تىيىم سالىندى، سەبەبى وزەندەگى سۋدىڭ دەڭگەيى بىردەن كوتەرىلگەن.

بۇدان بولەك، بيلىك قايعىلى وقيعالاردىڭ الدىن الۋ ماقساتىندا تاۋلى ايماقتارعا بارۋعا شەكتەۋ سالدى.

توتەنشە جاعدايلار جونىندەگى ورتالىق اگەنتتىكتىڭ مالىمەتىنشە، قاتتى جاۋىن-شاشىن سالدارىنان التى ادام قازا تاۋىپ، سەگىزى ءىز-ءتۇزسىز جوعالىپ كەتكەن.

كەم دەگەندە 190 ءۇي زاقىمدالىپ، 818 ادام ءوز ۇيلەرىن تاستاپ كەتۋگە ءماجبۇر بولعان.

وڭتۇستىك كورەيا پرەزيدەنتى مۋن چجە ين وسى جاعدايعا بايلانىستى جوسپارلانعان جازعى دەمالىسىنان باس تارتتى.