ۇلتتىق بانك تەڭگە باعامىنا اسەر ەتەتىن فاكتوردى ءتۇسىندىردى

الماتى. قازاقپارات - ۇلتتىق بانكتىڭ مونەتارلىق وپەراتسيالار دەپارتامەنتى ديرەكتورى نۇرجان تۇرسىنحانوۆ ۆاليۋتا نارىعىنداعى احۋال مەن نەگىزگى تەندەنتسيالار تۋرالى ايتتى، دەپ حابارلايدى قازاقپارات ءتىلشىسى.

ساۋدا-ساتتىق ناتيجەسىندە ۇلتتىق ۆاليۋتا باعامى ءبىر دوللار ءۇشىن 420 تەڭگەنى قۇرادى.

بيرجاداعى كولەمى - 160 ميلليون دوللار. نۇرجان تۇرسىنحانوۆ تەڭگە ديناميكاسىنىڭ وزگەرۋ سەبەپتەرى مەن ۆاليۋتا باعامىنا اسەر ەتەتىن فاكتورلار تۋرالى ايتتى.

«جالپىدان باستايىق. ۇلتتىق ۆاليۋتا باعامىنا سىرتقى جانە ىشكى فاكتورلار اسەر ەتەدى. ەڭ الدىمەن، مۇناي باعاسى. ءبىرىنشى جارتىجىلدىقتا مينەرالدى ونىمدەر بارلىق ەكسپورتتىڭ %70 دان استامىن قۇرادى جانە ولاردىڭ باعاسى الەمدىك نارىقتارداعى جاعدايعا بايلانىستى تومەندەدى. ناتيجەسىندە تەڭگەگە كەرى اسەرىن تيگىزدى.

ەندى قور بيرجاسىنداعى اعىمداعى جاعدايدى جانە تەڭگەنىڭ باعامىنا قاتىستى جاعدايدى تالداپ كورەيىك.

بيرجاداعى كولەمدەر ەلدەگى قۇربان ايت مەرەكەسىنە وراي جۇما كۇنى جۇمىس ىستەمەگەندىكتەن ءوستى.

ال، الەمدىك قارجى نارىقتارى ءوز قىزمەتىن جالعاستىرا بەردى. سوندىقتان، بۇگىن، دۇيسەنبىدە بيرجاداعى بانكتەر ادەتتەگىدەن كوبىرەك ساتىپ الدى. كەيىنگە قالدىرىلعان سۇرانىس تا بار. الايدا، 160 ميلليون دوللار - بۇل رەكوردتىق سوما ەمەس»، - دەدى نۇرجان تۇرسىنحانوۆ.

سونىمەن قاتار، ول جىل باسىنان بەرگى ستاتيستيكاعا بويىنشا، بيرجادا كۇن سايىن ورتا ەسەپپەن 110 ميلليون دوللار ساۋدالاناعانىن اتاپ ءوتتى. بۇل كورسەتكىش 80 ميلليون 170 ميلليون دوللارعا دەيىن بولۋى مۇمكىن. سوندىقتان ۇلتتىق بانك قازىرگى كولەمدى كۇتپەگەن جاعداي دەپ كورمەيدى. سونداي-اق، نۇرجان تۇرسىنحانوۆ بيرجاداعى تەڭگە قۇنىنىڭ السىرەۋىنىڭ نەگىزگى سەبەپتەرى تۋرالى ايتىپ بەردى.

«مەن ۆاليۋتالاردىڭ السىرەۋى دامۋشى ەلدەردىڭ نارىقتارىنداعى جالپى تەندەنتسيا ەكەنىن اتاپ وتكىم كەلەدى. ماسەلەن، تۇركيا، وڭتۇستىك افريكا جانە رەسەي ۆاليۋتالارى ءبىزدىڭ ۇلتتىق ۆاليۋتادان گورى قاتتى السىرەدى، سايكەسىنشە %1,8، %2,5 جانە %3,4.

مۇناي باعاسىنان باسقا، تەڭگە ىشكى فاكتورلارعا، سونداي-اق رۋبل ديناميكاسىنا وڭ نەمەسە تەرىس اسەر ەتەدى. جالپى قارجى نارىعى اياسىندا رەسەي رۋبلى تەڭگەنىڭ ايىرباس باعامىنىڭ وزگەرۋ فاكتورلارىنىڭ ءبىرى بولىپ تابىلادى، ءبىراق ول نەگىزگى ەمەس»، - دەدى نۇرجان تۇرسىنحانوۆ.