نۇر- سۇلتاندا جولاۋشىلارعا اۆتوبۋسقا ماسكاسىز كىرۋگە تىيىم سالىندى

نۇر- سۇلتان. قازاقپارات - قالادا قاتاڭ سانيتارلىق شارالار ساقتالا وتىرىپ، قوعامدىق كولىك جۇمىسى قايتا جانداندى، دەپ حابارلايدى ەلوردا اكىمدىگىنىڭ رەسمي سايتى.

بۇگىن، 3 - تامىزدا ەلوردادا قوعامدىق كولىكتەر قايتا جۇرە باستادى. سونىمەن بىرگە، CTS قىزمەتكەرلەرىمەن مارشرۋتتاردىڭ دەرەكتەرگە نەگىزدەلگەن جۇمىس جۇكتەمەسىن جانە قوزعالىس كەستەلەرىن مودەلدەۋ بويىنشا تالداۋ جۇرگىزىلدى.

«بۇگىن قوعامدىق كولىكتەر ءوز جۇمىسىن باستادى، ءبىراق ازىرگە جەدەل مارشرۋتتار مەن قالا ماڭىنداعى مارشرۋتتاردىڭ قوزعالىسى توقتاتىلدى. كولىكتىك باقىلاۋ قىزمەتكەرلەرى قوعامدىق كولىكتەردە ماسكا تاعۋ ءتارتىبىنىڭ ساقتالۋىن قاداعالاۋدا. جۇرگىزۋشىلەردىڭ ماسكا تاعۋى، اۆتوبۋستاردا دەزينفەكسيا قۇرالدارى بولۋى قاداعالانادى. جاعداي تۇراقتى. جولاۋشىلار لەگى ورتاشا دەڭگەيدە ساقتالۋدا»، - دەدى «City Transportation Systems» ج ش س باسقارما ءتوراعاسىنىڭ ورىنباسارى باۋىرجان سەيىتوۆ.

«ءبىز جۇمىسىمىزدى ساعىندىق. بارلىق جولاۋشىلار سانيتارتيا تالاپتارىن ساقتايدى. ادامدار ماسكاسىز كىرىپ جاتقان جوق»، - دەيدى № 1 اۆتوبۋس پاركىنىڭ جۇرگىزۋشىسى مەيرام داۋلەتبەكوۆ.

حابارلانعانداي، 1- تامىزدا نۇر- سۇلتان قالاسىنىڭ اكىمى التاي كولگىنوۆ كارانتين كەزەڭىندەگى قوعامدىق كولىكتەردىڭ دايىندىعىمەن تانىستى. جۇمىس بەرۋشىلەر مەن قالا تۇرعىندارىنىڭ ءوتىنىشى بويىنشا 3 - تامىزدان باستاپ اۆتوبۋستاردىڭ قوزعالىسى قايتا جانداندى. اۆتوبۋستار ساعات 6:00-دەن 21:00-گە دەيىن جۇرەدى.

اۆتوبۋسقا وتىرعىزۋ تەك الدىڭعى ەسىك ارقىلى جۇزەگە اسىرىلادى. جول ءجۇرۋ اقىسى قولما- قول اقشاسىز تولەمدەر ارقىلى جاسالادى. اۆتوتۇراقتاردىڭ جۇمىسىن جاقسارتۋ ءۇشىن 100 ەلەكتر اۆتوبۋسى ساتىپ الىنىپ، تاپسىرىلدى، قالا تۇرعىندارىنىڭ تىلەكتەرى ەسكەرىلىپ، جاڭا باعىتتار اشىلدى. كولىكتىك باقىلاۋ دەپارتامەنتى كۇن سايىن قوعامدىق كولىكتە سانيتاريا نورمالارىن ساقتاۋ بويىنشا رەيد جۇرگىزەدى.