ەكولوگيا مينيسترلىگى ەسىل وزەنىندە سۋ ءتۇسىنىڭ وزگەرۋىنە قاتىستى تۇسىنىك بەردى

نۇر- سۇلتان. قازاقپارات - ەكولوگيا مينيسترلىگى ەلوردا تۇرعىندارىن الاڭداتقان ەسىل وزەنىندەگى سۋدىڭ تۇسىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

ايتا كەتەيىك، وزەندەگى سۋدىڭ جاسىل تۇسكە بويالعان بولىگى الەۋمەتتىك جەلىدە جاريالانعان ەدى. مينيسترلىك مالىمەتىنشە، الەۋمەتتىك جەلىدەگى جاريالانىم نەگىزىندە ەلوردا بويىنشا ەكولوگيا دەپارتامەنتىنىڭ ماماندارى 31 - شىلدە كۇنى ەسىل وزەنى بويىن قاراپ شىقتى. وسى ورايدا وزەن جاعالاۋى زەرتتەلىپ، ەسىلدەگى سۋدىڭ سىناماسى الىندى.

«ەسىل وزەنى سۋىنىڭ جاسىل تۇسكە بويالۋىنا تابيعي قۇبىلىس سەبەپ بولۋى مۇمكىن. سۋ ءتۇسىنىڭ وزگەرۋىنە فيتوپلانكتوننىڭ كوبەيۋى اسەر ەتەدى. بۇل تۇرعىدا سۋ قويماسىندا بالدىردىڭ تەز كوبەيۋى ىقپال ەتۋى مۇمكىن»، - دەلىنگەن ەكولوگيا مينيسترلىگى حابارلاماسىندا.

سونىمەن قاتار، سۋ ءتۇسىنىڭ وزگەرۋىنە ماكروبالدىرلار دا اسەر ەتۋى ىقتيمال. ۆەدومستۆو مالىمەتىنشە، اتالعان ماسەلەنى ەكولوگيا دەپارتامەنتى ەرەكشە باقىلاۋعا الدى. زاڭناماعا سايكەس، دەپارتامەنت نۇر- سۇلتان قالاسى اۋماعىندا تۇراقتى مونيتورينگ پەن باقىلاۋ جۇرگىزۋدە. ال سۋدان الىنعان سىنامانىڭ ناتيجەلەرى الداعى ۋاقىتتا جاريالاناتىن بولادى.

اۆتور: رۋسلان عابباسوۆ