نۇر-سۇلتانداعى ەسىل وزەنىندەگى جاسىل سۋ تۇرعىنداردى شوشىتتى
بۇعان دەيىن جەلىدە وزەندەگى جاسىل سۋدىڭ ۆيدەوسى پايدا بولعان. كادر سىرتىنداعى ايەل ادام: «قاراڭىزدار، قانداي سۇمدىق. بۇل كەنەسارى حاننىڭ ەسكەرتكىشى جانىنداعى جاعالاۋدىڭ باس جاعى»، - دەيدى.
ەكولوگيا گەولوگيا جانە تابيعي رەسۋرستار مينيسترلىگى جەلىدە پايدا بولعان ۆيدەوعا بايلانىستى مەملەكەتتىك ەكولوگيالىق باقىلاۋ ءبولىمىنىڭ باس مامانى جانە زەرتحانالىق- اناليتيكالىق باقىلاۋ ءبولىمىنىڭ باس مامانى 31-شىلدەدە وقيعا ورنىن تەكسەرۋگە شىققانىن ايتتى.
«جۇمىس بارىسىندا «ارقار» كوپىرىنەن ەسىلگە قۇياتىن جاعالاۋداعى اقبۇلاق جىلعاسى تەكسەرىلدى. ەسىلدەگى ەكى جەردەن: «مارال» كوپىرىنىڭ استى مەن تولىق حيميالىق تالداۋ ءۇشىن ەسىل وزەنىنە اقبۇلاق جىلعاسىنىڭ قۇيىلۋ ورنىنا دەيىن 300 مەتر جوعارى جەردەن سىناما ۇلگىسى الىندى. ەسىل وزەنىندە تابيعي ەمەس جاسىل ءتۇستىڭ پايدا بولۋىنا سۋدىڭ گۇلدەنۋى سياقتى تابيعي قۇبىلىس سەبەپ بولۋى مۇمكىن»، - دەيدى مينيسترلىك وكىلدەرى.
سۋدىڭ گۇلدەنۋى - سۋدىڭ ءتۇسىن جاسىل (جاسىل جانە كوك جاسىل بالدىرلار) جانە سارى- قوڭىردان (دياتومدىق) قىزىلعا (دينوفلاگەلياتتار) دەيىن وزگەرتەتىن فيتوپلانكتوننىڭ جاپپاي دامۋى. سۋدىڭ گۇلدەنۋى سۋ قويمانىڭ وتتەكتىك رەجيمىنىڭ ناشارلاۋىنا اپارىپ سوقتىرادى. سۋدىڭ گۇلدەنۋىنىڭ نەگىزگى سەبەپتەرىنىڭ بىرىنە سۋقويماعا مينەرالدىق، اسىرەسە فوسفورلى تىڭايتقىشتاردىڭ، سينتەتيكالىق جۋعىش زاتتەكتەر مەن ورگانيكالىق لاستاعىشتاردىڭ ءتۇسۋى جاتادى.
مينيسترلىك وكىلدەرى بۇل ماسەلە دەپارتامەنتتىڭ باقىلاۋىندا بولاتىنىن جانە تالداۋ ناتيجەلەرىن قوسىمشا حابارلايتىنىن جەتكىزدى.