ماسكا تاعۋ تالابىن ورىنداۋ كەرەك – د د س ۇ ساراپشىسى

نۇر-سۇلتان. قازاقپارات – د د س ۇ- نىڭ قازاقستانداعى وكىلدىگىنىڭ باسشىسى كەرولاين كلارينۆال كورناۆيرۋس ينفەكسياسىنا توسقاۋىل قويۋدىڭ شارالارىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىز بۇل تاقىرىپتى ۇنەمى تالقىلايمىز. بارشاسىنا جارايتىن، ياعني بارلىق ەلدەر ءۇشىن امبەباپ شەشىمنىڭ بولۋىن قالايمىز. الايدا، ەڭ باستىسى - بارلىق شەشىمدەر ەلدەردەگى جاعدايعا ساي كەلۋى ءتيىس. وسى ورايدا جەرگىلىكتى دەڭگەيدە ءتيىستى قادامدار ەنگىزىلەتىنىنە كوز جەتكىزۋىمىز كەرەك. نەلىكتەن ول ماڭىزدى؟ ءار ەل مەن ءار دەنساۋلىق ساقتاۋ جۇيەسىندە ايىرماشىلىق بار. سوندىقتان ءتيىستى قادامدار ناقتى ءبىر ەلگە سايكەس كەلۋى قاجەت. بۇل وڭاي شارۋا ەمەس. وسى ماقساتتاردى ورىنداۋعا تىرىسىپ كەلە جاتقان قازاقستان ۇكىمەتى مەن دەنساۋلىق ساقتاۋ جۇيەسىنە ريزاشىلىعىمدى بىلدىرگىم كەلەدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

«ءار ادام ىندەتتىڭ تارالماۋىنا ءوز ۇلەسىن قوسۋى قاجەت. ەڭ باستىسى - گيگيەنا تالاپتارىن ساقتاپ، قولدى سابىنمەن جۋعان دۇرىس. سونىمەن قاتار، رەسپيراتورلىق ەتيكەتتى ساقتاعان ءجون. ءبىز ارا قاشىقتىقتى ساقتاۋعا كەڭەس بەردىك، كەم دەگەندە ەكى مەتر. بۇل شارالار ىندەتتى جۇقتىرۋ سەبەپتەرىن تومەندەتەدى. ماسكا تاعۋ ءتارتىبىن ورىنداۋى ءتيىس. جالپى، ءبىز وسى شارالاردى ءار ازاماتتىڭ ورىنداۋى كەرەكتىگىن اتاپ وتۋدەمىز»، - دەدى كەرولاين كلارينۆال.