ق ر پرەزيدەنتى: ۇكىمەت كارانتين رەجيمىن ساقتاۋ جونىندەگى شارالاردى كۇشەيتۋگە مىندەتتى
بۇل تۋرالى ق ر پرەزيدەنتى قاسىم-جومارت توقايەۆ Twitter- دەگى پاراقشاسىندا جازدى، دەپ حابارلايدى قازاقپارات.
«بۇكىل الەمدە پاندەميا ءورشىپ تۇر. ول قازاقستاندى دا اينالىپ وتپەدى. ىندەت جۇزدەگەن ەڭبەككەر مەن زەينەتكەردى، قارتتار مەن جاستاردى، اتاقتى ازاماتتارىمىز بەن قاراپايىم ادامداردى ارامىزدان الىپ كەتىپ جاتىر. داڭقتى پالۋان، قوعام قايراتكەرى ج. ۇشكەمپىروۆتىڭ قازاسى تۋرالى حاباردى زور كۇيزەلىسپەن قابىلدادىم. وسى دەرتتەن قايتىس بولعان ازاماتتاردىڭ قازاسى قابىرعاما باتتى. كوروناۆيرۋس پەن وكپە قابىنۋى سالدارىنان قايتىس بولعانداردىڭ سانى ءالى دە جوعارى»، - دەپ جازدى مەملەكەت باسشىسى.
سونداي-اق پرەزيدەنت دەنساۋلىق ساقتاۋ مينيسترلىگى مەن بارلىق مەديتسينالىق مەكەمەلەردىڭ باستى مىندەتى - ءولىم-ءجىتىم دەڭگەيىن ەڭ تومەنگى شەككە دەيىن ءتۇسىرۋ ەكەندىگىن اتاپ ءوتتى.
«ۇكىمەت ازاماتتاردىڭ كارانتين رەجيمىن ساقتاۋ جونىندەگى شارالاردى كۇشەيتۋگە مىندەتتى. ونسىز پاندەمياعا قارسى كۇرەستە جەڭىسكە جەتۋ مۇمكىن ەمەس»، - دەدى قاسىم-جومارت توقايەۆ.