باتىس قازاقستان تۇرعىنى باس ۇيىتەمىن دەپ كۇيىپ قالدى

ورال. قازاقپارات - باتىس قازاقستان وبلىسىندا تۇرعىن قويدىڭ باسىن ۇيىتەمىن دەپ ءجۇرىپ كۇيىپ قالدى، دەپ حابارلايدى قازاقپارات ءتىلشىسى.

ب ق و توتەنشە جاعداي دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، وقيعا 31-شىلدە كۇنى ساعات 20.10-دا بايتەرەك اۋدانى ميچۋرين اۋىلىندا بولدى. كومسومول كوشەسى 62ب- مەكەنجايىندا تۇراتىن 1956 -جىلعى تۇرعىن گاز باللونىنىڭ كومەگىمەن قويدىڭ باسىن ۇيىتكەن. ءورت قاۋىپسىزدىگى ەرەجەسىن ساقتاماۋ سالدارىنان باللوننىڭ شلانگىسى شىعىپ كەتىپ، ەر ادام 2-3 دارەجەلى كۇيىك جاراقاتىن العان.

اياقتارى، ارقاسى، كەۋدەسى، بەتى كۇيگەن. دەنەسىنىڭ 50 پايىزىن كۇيىك شالعان تۇرعىن قالالىق كوپبەيىندى اۋرۋحاناعا جاتقىزىلدى. وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ ناقتىلاۋىنشا، دەنەسىنىڭ 50-55 پايىزىن كۇيىك شالعان ەر ادامنىڭ جاعدايى اۋىر. دەگەنمەن ەسىن بىلەدى، سۇراقتارعا جاۋاپ بەرەدى.