قازاقستان قالالارىندا ەرتەڭنەن باستاپ كارانتين شارالارى كۇشەيتىلەدى
قوستاناي وبلىسىنىڭ مەملەكەتتىك باس سانيتار دارىگەرىنىڭ ورىنباسارى يۋ. سيەۆوستيانوۆ وڭىردە قاتاڭ شەكتەۋ شارالارىن ەنگىزۋ تۋرالى قاۋلىعا قول قويدى. 3-تامىزدان باستاپ تاعى دا دا ساياباقتارعا، الاڭدار مەن سكۆەرلەرگە، جاعالاۋلارعا، قوعامدىق جانە ۇيىمداستىرىلماعان جاعاجايلارعا، حالىقتىڭ وزگە دە دەمالىس ورىندارىنا بارۋعا تىيىم سالىنادى...
قاتاڭ شەكتەۋ شارالارى 3-تامىز ءۇنى ساعات 00:00 باستاپ كۇشىنە ەنەدى. ماڭعىستاۋدا 3-تامىزدان باستاپ جاڭا كارانتين تالاپتارى كۇشىنە ەنەدى. قاۋلىعا سايكەس، ايماقتا 3-تامىز ساعات 00.00-دەن باستاپ 17-تامىز ساعات 00.00-گە دەيىن قاتاڭ شەكتەۋ شارالارى ەنگىزىلەدى. قاۋلىعا سايكەس، قالا ماڭىنداعى جانە قالالىق قوعامدىق كولىكتىڭ جۇمىسى توقتاپ، بارلىق ۇيىمداردا جينالىستار، كەڭەستەر، كونفەرەنسيالار، فورۋمدار، سەمينارلار، سەزدەر، كورمەلەر، ترەنينگتەر، وقىتۋ كۋرستارىن جانە ادامدار كوپ جينالاتىن باسقا دا ءىس-شارالاردى، سونداي- اق وتباسىلىق، ەستەلىك ءىس- شارالاردى (بانكەتتەر، ۇيلەنۋ تويلار، مەرەيتويلار، ەسكە الۋ راسىمدەرى ت. ب. ) وتكىزۋگە تىيىم سالىنادى. 3-تامىزدان باستاپ الماتىدا تۇنگى 00:00 دەن باستاپ COVID-19 تارالۋىنىڭ الدىن الۋ ءۇشىن قوسىمشا شەكتەۋ شارالارى ەنگىزىلەدى. سونىمەن قاتار، قالادا ءۇي كارانتينىن ساقتاماعاندارعا ايىپپۇل سالىناتىن بولدى.
ەلوردانىڭ باس مەملەكەتتىك سانيتار دارىگەرى 2020 -جىلدىڭ 3-تامىزىنان باستاپ نۇر-سۇلتان قالاسىندا قاتاڭ شەكتەۋ شارالارىن ۇزارتۋ تۋرالى قاۋلىعا قول قويدى. قالادا كوسمەتيكالىق جانە كوسمەتولوگيالىق قىزمەتتەر، مانيكيۋر جانە پەديكيۋر قىزمەتتەرىن كورسەتەتىن سپا-ورتالىقتار، ترەناجەر زالى، فيتنەس- ورتالىقتار، سپورت- ساۋىقتىرۋ ورتالىقتارى، باسسەيندەر، اكۆاپاركتەر، جاعاجايلار، قوعامدىق مونشالار، ساۋنالار، سۇلۋلىق سالوندارى مەن شاشتارازدار، ورتالىقتار مەن سالوندار ۋاقىتشا ىستەمەيدى. سونىمەن قاتار، اتتراكسيونداردىڭ بارلىق ءتۇرى، ونىڭ ىشىندە اشىق اۋادا، تۇرعىن ۇيلەردىڭ اۋلاسىندا جانە جالپى پايدالانۋ ورىندارىندا ورنالاسقان بالالاردىڭ ويىن الاڭدارىنىڭ جۇمىسىنا تىيىم سالىندى.
قالا ساياباقتارىندا، جاعالاۋدا، سكۆەرلەردە بالالار مەن ەرەسەكتەرگە ارنالعان قۇرالدار (ەلەكتروموبيل، قۇلايتىن اۆتوموبيل، ساموكات، گيروسكۋتەر) جالعا بەرىلمەيدى. ەسكە سالساق، قازاقستاندا شىلدە ايىنىڭ ورتاسىندا ەكى اپتاعا سوزىلاتىن كارانتين ەنگىزىلگەن بولاتىن.
29-شىلدەدە مەملەكەت باسشىسى قاسىم-جومارت توقايەۆ ەپيدەميولوگيالىق احۋالدى تۇراقتاندىرۋ جونىندە كەڭەس وتكىزىپ، كارانتين شارالارىن تاعى ەكى اپتاعا ۇزارتۋدى تاپسىرعان ەدى. ق ر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن وتكەن ۆەدومستۆوارالىق كوميسسيا پرەزيدەنت تاپسىرمالارىن ەرەكشە باقىلاۋعا الدى. ەكى اپتاعا سوزىلعان كارانتينگە بايلانىستى تولەم مىندەتتى تۇردە جۇرگىزىلەدى.
الايدا، بۇرىنعى سومانىڭ جارتىسى، ياعني 42500 تەڭگەنىڭ جارتىسى - 21250 تەڭگەدەن بەرىلەدى. بۇل قارجىنى قازاقستاندىقتار اۆتوماتتى تۇردە الادى.