+7 (701) 759 90 19
15 °С : نۇر-سۇلتان
25 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

مۇسىلمانداردىڭ ۇلىق مەرەكەسى - قاسيەتتى قۇربان ايت باستالدى

31 شىلدە 07:30
:ءبولىسۋ
مۇسىلمانداردىڭ ۇلىق مەرەكەسى - قاسيەتتى قۇربان ايت باستالدى

نۇر-سۇلتان. قازاقپارات - بۇگىن كۇللى مۇسىلمان ءۇشىن ۇلىق سانالاتىن قۇربان ايت مەرەكەسى باستالدى، دەپ حابارلايدى قازاقپارات.

ورازا ايتتان كەيىن 70 كۇن وتكەندە كەلەتىن قۇربان ايت مەرەكەسىن كوپشىلىك مۇسىلمان 3 كۇن قاتارىنان تويلايدى. بيىلعى قۇربان ايت مەرەكەسى عۇلامالار كەڭەسىنىڭ بەكىتۋىمەن 31-شىلدە، 1-2-تامىز كۇندەرىنە سايكەس كەلىپ تۇر. ياعني ۇلىق مەرەكەنىڭ العاشقى كۇنى - قاسيەتتى جۇماعا ءدوپ كەلدى. ايتسە دە، ەلىمىزدەگى كارانتين مەرزىمى 2-تامىزعا دەيىن ۇزارتىلعاندىقتان، رەسپۋبليكا بويىنشا مەشىتتەر جابىق.

وسىعان بايلانىستى 31-شىلدە كۇنى قۇربان ايت نامازى وقىلمايدى. ەلدەگى ەپيدەميولوگيالىق احۋال قۇربان ايت مەيرامىن جىلداعىداي مەرەكەلەۋگە مۇمكىندىك بەرمەي تۇر.

بۇل جاعدايعا بۇعان دەيىن قازاقستان مۇسىلماندارى ءدىني باسقارماسى تۇسىنىستىكپەن قاراۋعا شاقىرعان بولاتىن. مەرەكەنىڭ باستى ءراسىمى - جاراتۋشى رازىلىعى ءۇشىن قۇربان شالۋ. بۇل ءراسىم ءدىني نانىم بويىنشا يبراھيم پايعامبار زامانىنان بەرى كەلە جاتىر دەپ ەسەپتەلەدى.

قۇربان شالۋ ۇلىق عيبادات ءارى جاعدايى كەلگەن مۇسىلمانعا ءۋاجىپ. وسىناۋ عيباداتتى ورىنداۋ ماقساتىندا قازاقستان مۇسىلماندارى ءدىني باسقارماسى حالىقتىڭ ءوتىنىشىن ەسكەرە وتىرىپ، بيىل العاش رەت قۇربان ايت قارساڭىندا حالىقارالىق تاجىريبەلەرگە سۇيەنىپ، قاشىقتان قۇربان شالۋ جوباسىن قولعا الدى.

وسى ماقساتتا qurban2020.kz سايتى اشىلىپ، 24-شىلدەدەن باستاپ تاۋلىك بويى جۇمىس ىستەي باستادى. 30-شىلدەگە دەيىن قۇربان شالۋعا ونلاين تاپسىرىس قابىلداندى. كەز كەلگەن ازامات ونلاين قۇربان شالۋعا تاپسىرىس بەرە الادى.

قازاقستان مۇسىلماندارى ءدىني باسقارماسىنىڭ ءتوراعاسى، باس مۇفتي ناۋرىزباي قاجى تاعان ۇلى ايتۋىنشا، ونلاين رەجيمدە تاپسىرىس قابىلداپ، قۇرباندىق ەتىن مۇقتاج جاندارعا تاراتۋ تاجىريبەسى تۇركيا، مالايزيا، يندونەزيا، ب ا ءا سىندى ءبىرقاتار مۇسىلمان مەملەكەتتە بۇرىننان قالىپتاسقان جانە داستۇرگە اينالعان.

«بۇل جۇيەنىڭ باستى ەرەكشەلىگى - قۇرباندىق ەتى تۇگەلدەي مۇقتاج جاندارعا تاراتىلادى. العاش رەت ىسكە قوسىلعالى تۇرعان سايتتا كەمشىلىكتەر بولۋى مۇمكىن. تەحنيكالىق قيىندىقتار تۋىنداسا، قۇرمەتتى حالايىق، تۇسىنىستىكپەن قاراۋدى وتىنەمىز. ونلاين قۇرباندىق جۇيەسىن اشۋداعى ماقسات - سىن- ساعاتتا پايدا تابۋ ەمەس، حالىقتىڭ قۇربان شالۋعا دەگەن قاجەتتىگىن قامتاماسىز ەتۋ. ءدىني باسقارمانىڭ ماقساتى - ازاماتتاردىڭ قۇرباندىعىن شالۋدى ۇيىمداستىرۋ. ونلاين تاپسىرىس ارقىلى قۇرباندىق شالۋ كەزىندە داعدىعا اينالعان مالدى تاڭداۋ، قاساپشى جانىنا بارىپ قاتىسۋ مۇمكىندىگى بولمايىن دەپ تۇر. بۇل جوبانى كارانتين كەزىندە قۇربان شالعىسى كەلگەن ازاماتتاردىڭ نيەتىن جۇزەگە اسىرۋ مۇمكىندىگى رەتىندە ۇسىنىپ وتىرمىز. اللا قالاسا، اتالمىش جوبا كەلەسى جىلى ءوز جالعاسىن تابادى دەپ ۇمىتتەنەمىز. ونلاين قۇرباندىق شالۋدا يمامدارىمىز دەلدالدىق قىزمەت جاسامايدى. ەكى ورتادا ءجۇرىپ پايدا تابۋمەن اينالىسپايدى. ءبىزدىڭ مىندەت - حالىققا قىزمەت، قۇرباندىق شالۋدى ۇيىمداستىرۋ مەن قۇربان ەتتەرىن مۇقتاج جاندارعا ۇلەستىرىپ بەرۋ عانا»، - دەگەن ەدى ناۋرىزباي قاجى تاعان ۇلى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

وسى كەزگە دەيىن ازاماتتار قۇربان ەتىن ۇشكە ءبولىپ، ءبىر بولىگىنە اعايىن- تۋىس، كورشى- قولاڭعا ايت داستارحانىن جاياتىن. پاندەميا جاعدايىنا بايلانىستى بيىلعى ونلاين قۇرباندىق شالىنعاندا ەتتىڭ ۇشتەن ءبىرى بەرىلمەي، تۇگەلدەي الەۋمەتتىك تۇرعىدا از قامتىلعان ازاماتتارعا، مۇقتاج جاندارعا ۇلەستىرىلەتىن بولدى.

كارانتين كەزىندە ونلاين قۇرباندىق شالۋ جوباسىنا مەملەكەتىمىز قولداۋ كورسەتىپ وتىر. ءار وبلىستا قۇربان شالاتىن ورىندار بەلگىلەنىپ، جەرگىلىكتى اكىمدىك پەن سانيتارلىق دارىگەرلەردىڭ رۇقساتىمەن، ءتارتىپ ساقشىلارىنىڭ قاداعالاۋىمەن كارانتين تالاپتارىن قاتاڭ تۇردە ساقتاي وتىرىپ ورىندالادى.

بۇل رەتتە ناۋرىزباي قاجى تاعان ۇلى ءار وبلىستىڭ ءدىني احۋالىنا جاۋاپ بەرەتىن مەكەمەلەردى ءدىني باسقارمانىڭ وبلىستىق وكىلدىكتەرىمەن بىرگە جۇمىس ىستەۋگە شاقىردى. وسى ماقساتتا ءدىني باسقارما مەن وبلىستىق مەشىتتەر جانىنان اقپارات ورتالىقتارى دا قۇرىلعان. ونلاين قۇرباندىق تۋرالى بىلگىسى كەلەتىن ازاماتتار وسى ورتالىقتارعا حابارلاسا الادى.

قازاقستان مۇسىلماندارىنىڭ ءدىني باسقارماسى حالىقتى وسىنداي قيىن- قىستاۋ كەزدە پەندەشىلىككە سالىنباي، پايدا تابۋ مەن الىپساتارلىققا بارماي، مال باعاسىن قىمباتتاتپاۋعا، حالىقتىڭ جاعدايىن ەسكەرۋگە شاقىرادى.

قاساپشىلار دا ءوز قىزمەتىنە الاتىن اقىسىن قىمباتتاتپاي، جاناشىرلىقپەن ەلگە قىزمەت ەتەر دەپ ۇمىتتەنەدى. قۇربان شالۋ ءۇشىن وبلىس، قالا اكىمدەرىن، سانيتارلىق- ەپيدەميولوگيالىق باسقارما قىزمەتكەرلەرىن ءتارتىپ ساقشىلارىمەن بىرلەسىپ اتسالىسۋعا ۇندەيدى.


:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات