كوروناۆيرۋس: قازاقستاندىق ۆاكتسينانىڭ جانۋارلارعا جۇرگىزىلگەن سىناعى ءساتتى ءوتتى
«پرەزيدەنت تاپسىرماسىمەن جانە ءبىلىم جانە عىلىم مينيسترلىگىنىڭ قولداۋىمەن ءبىزدىڭ عالىمدار 23 - ناۋرىزدا كوروناۆيرۋسقا قارسى ۆاكتسينا جاساۋ باعدارلاماسىن ازىرلەۋگە كىرىستى. كوروناۆيرۋسپەن اۋىراتىن ناۋقاستاردان بيولوگيالىق ماتەريالدار الىندى. كۇشەيتىلگەن جۇمىستاردىڭ ناتيجەسىندە ءبىز العاشقى وتاندىق بەلسەندەندىرىلمەگەن ۆاكتسينانى ازىرلەدىك. 15 - مامىردا ۆاكتسينامىزدى د د س ۇ سايتىندا كلينيكاعا دەيىنگى سىناقتار جۇرگىزۋگە كانديداتتىق ۆاكتسينا رەتىندە تىركەدىك» ، - دەپ ءتۇسىندىردى ەرعالي ءابدىرايىموۆ قازاقپارات تىلشىسىنە بەرگەن سۇحباتىندا.
عالىمنىڭ ايتۋىنشا، قازىرگى ۋاقىتتا سىناق جۇمىستارى بەلسەندى ءجۇرىپ جاتىر. وندا تىشقان، اتجالمان، ەگەۋقۇيرىق، تەڭىز شوشقاسى سىندى زەرتحانالىق جانۋارلارعا سىناق جۇرگىزىلگەن.
«دەنساۋلىق ساقتاۋ مينيسترلىگىنىڭ حاتتاماسىمەن كوپتەگەن پارامەترلەر بويىنشا 20 دان استام ءتۇرلى سىناقتار وتۋدە. بارلىق تەستىلەۋلەر بويىنشا ۆاكتسينا ءوزىن وتە جاقسى جانە ءابسوليۋتتى قاۋىپسىز ەكەنىن كورسەتتى. ياعني، پرەپارات زەرتحانالىق جانۋارلارعا زيانسىز بولدى. وعان قوسىمشا ۆاكتسينا ءقازىر دەنساۋلىق ساقتاۋ مينيسترلىگىنىڭ تالاپتارى بويىنشا دارىلىك زاتتاردى ساراپتاۋ ۇلتتىق ورتالىعىنىڭ الماتى فيليالىندا سىنالىپ جاتىر. وندا دا كلينيكاعا دەيىنگى سىناقتار جۇرۋدە» ، - دەيدى ە. ءابدىرايىموۆ.
الدىن الا مالىمەتتەر بويىنشا، كلينيكاعا دەيىنگى سىناقتاردى قىركۇيەك ايىنا دەيىن اياقتاۋ جوسپارلانعان. سودان كەيىن ۆاكتسينا سىناق رەتىندە ەرىكتىلەرگە سالىنادى. مۇندا كوروناۆيرۋسپەن اۋىرىپ كورمەگەندەر دە ەرىكتى بولا الادى.
«ال قىركۇيەكتىڭ باسىندا كلينيكالىق سىناقتاردىڭ ءبىرىنشى كەزەڭى ءۇشىن ەرىكتىلەر ىرىكتەلەدى، ياعني ۆاكتسينا ادامداردىڭ وزىندە سىنالادى. وعان دەنساۋلىعى مىقتى ادامدار بولۋى كەرەك. ىرىكتەۋ دەنساۋلىق ساقتاۋ مينيسترلىگىنىڭ تالاپتارى بويىنشا جۇرگىزىلەدى. بۇل ءماجبۇرلى شارا ەمەس. ءار ادام وسى سىناقتارعا قاتىسا الادى» ، - دەدى سپيكەر. ونىڭ ايتۋىنشا، كلينيكاعا دەيىنگى سىناقتار ەڭ الدىمەن ۆاكتسينانىڭ قاۋىپسىزدىگىن كورسەتۋى كەرەك.
«ءبىز پرەپاراتتىڭ قاۋىپسىزدىگىن 20 دان استام پارامەتر بويىنشا زەرتتەيمىز. وسى پارامەترلەر بويىنشا ۆاكتسينا ءوزىن جاقسى كورسەتۋدە جانە زەرتحانالىق جانۋارلاردا ەش جاناما اسەر بايقالمادى. ۆاكتسينانىڭ شامامەن قاشان دايىن بولاتىنىن ايتۋ قيىن. ويتكەنى ول بىرنەشە سىناق كەزەڭدەرىنەن ءوتۋى كەرەك. بۇل پروتسەدۋرالاردى رەتتەيتىن دەنساۋلىق ساقتاۋ مينيسترلىگىنىڭ ارنايى حاتتاماسى بار. ۆاكتسينا ساتىلىمعا قاشان تۇسەتىنىن ناقتى ايتا المايمىز. ازىرلەۋ پروتسەسى قازىر جەدەل ءجۇرىپ جاتىر. قازىر بىردە- ءبىر ۆاكتسينا كلينيكالىق سىناقتان وتكەن جوق، بۇكىل الەمدە ءالى دە سىنالىپ جاتىر»، - دەدى ەرعالي ءابدىرايىموۆ.
بۇعان دەيىن ق ر ءبىلىم جانە عىلىم مينيسترلىگى كوروناۆيرۋسقا قارسى قازاقستاندىق ۆاكتسينانىڭ سىناقتان ءساتتى ءوتىپ جاتقانىن مالىمدەگەن ەدى.