قازاقستاندىقتارعا بالالارمەن سەرۋەندەۋدى توقتاتا تۇرۋعا كەڭەس بەرىلدى
«سابيلەرگە قاتىستى ايتارىم، ولاردى قورعاۋ كەرەك. ولاردىڭ دا ۇيدە بولعانى ءجون. ولارعا ماسكا ىزدەۋدەن بۇرىن قورعاۋ كەرەك»، - دەدى پرەمەر- ءمينيستردىڭ ورىنباسارى ەرالى توعجانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ۇكىمەت باسشىسىنىڭ ورىنباسارى بۇل رەتتە ماسەلە سابيلەرگە عانا ەمەس، بالالارعا دا قاتىستى ەكەنىن اتاپ ءوتتى.
«وسىناۋ ارالىقتا سەرۋەندەۋدى توقتاتا تۇرۋدى سۇرايمىن. بالالاردىڭ دەنساۋلىعى مەن كەلەشەگى ءۇشىن ويلانۋىمىز كەرەك»، - دەدى ەرالى توعجانوۆ. ءوز كەزەگىندە دەنساۋلىق ساقتاۋ ءمينيسترى الەكسەي سوي بالالارعا ارنالعان مەديتسينالىق ماسكانى ءار ادام ءوز ۇيىندە تىگىپ الۋعا مۇمكىندىك بارىن ەسكە سالدى.
«رەزەڭكەنى الىپ، قيا سالسا بولدى. ماسكا كىشىرەيىپ كەتەدى. سابيلەرگە ارنالعان ماسكا داكەنىڭ بىرنەشە قاباتىنان تۇرادى. ءوز قولىڭىزبەن دە جاساي الاسىز»، - دەدى مينيستر. ەسكە سالا كەتسەك، قازاقستاننىڭ مەملەكەتتىك باس سانيتاريا دارىگەرى ايجان ەسماعامبەتوۆانىڭ قاۋلىسى بويىنشا حالىققا قازاقستاندا كوشەدە ماسكا تاعىپ ءجۇرۋ مىندەتتەلگەن بولاتىن.