«ازىرەت سۇلتان» مەشىتىنىڭ وكىلى قۇرباندىققا شالىناتىن قوي باعاسىنا قاتىستى جاعدايدى ءتۇسىندىردى
ونىڭ ايتۋىنشا، وسىدان بىرەر كۇن بۇرىن نۇر- سۇلتان قالاسىندا «قۇربان شالۋ ءراسىمىن ۇيىمداستىرۋ شارالارى» اتتى باسپا ءسوز بريفينگى وتكەن ەدى. بريفينگ بارىسىندا نۇر- سۇلتان قالاسىنىڭ باس يمامى ەربولات جۇسىپوۆكە qurban2020.kz سايتىندا ەلوردا بويىنشا قويدىڭ باعاسى نەلىكتەن 50 مىڭ تەڭگە دەپ بەكىتىلگەنى جايلى ساۋال قويىلدى.
ەلوردانىڭ باس يمامى بۇل سۇراققا جاۋاپ بەرە كەلە: «مالعا قويىلاتىن تالاپتار بار. نۇر- سۇلتان قالاسى بويىنشا قويدىڭ باعاسى 50 مىڭ، ءىرى قارانى 350 مىڭ دەپ بەردىك. بۇل جەردە قويدىڭ جاسىنا نازار اۋدارۋ كەرەك. 6 ايعا جەتپەگەن، ارىقتاۋ توقتىلاردىڭ ءوزىن 35-40 مىڭعا الۋلارىڭىز مۇمكىن. ءبىراق قوي مەن ەشكى 1 جاسار بولۋى كەرەك. ال، 1 جاسار قويدىڭ باعاسى ءۇشىن 50 مىڭ وتە جاقسى باعا»، - دەپ اتاپ ءوتتى.
«كەيىننەن الەۋمەتتىك جەلى بەتتەرىندە جانە كەيبىر پورتال جۋرناليستەرى بۇل اڭگىمەنى ءىلىپ اكەتىپ، تۇسىنىكتى تىلدە ايتىلعان ءسوزدىڭ استارىن اينالدىرىپ، «ارزان قويدى قۇداي دا قابىلدامايتىن بولعانى ما؟»، «قۇرباندىققا ءبىر جاسار قوي عانا جارايدى دەگەن تالاپ ورىندى ما؟ !» دەگەن سىندى اڭگىمەلەردى جاريالاپ جىبەردى. وسىعان قاراي، بريفينگتە ايتىلعان مالىمدەمەنى تاعى ءبىر مارتە تارقاتىپ ايتۋدى ءجون ساناپ وتىرمىز»، - دەدى ايدوس يمانتاي.
ونىڭ سوزىنە قاراعاندا، ەربولات ءجۇسىپوۆ سوزىندە ەلوردا بازارلارىنداعى مال باعاسىنان حاباردار ەكەنىن اڭعارتىپ، 35-40 مىڭ تەڭگەگە جاسى التى ايعا جەتپەگەن، ارىقتاۋ توقتى عانا ساتىپ الا الۋعا بولاتىنىن ەسكەرتىپ، كورەرمەندەرگە شاريعات تالابى بويىنشا قۇرباندىققا شالىناتىن قوي مەن ەشكى تۇلىگىنىڭ ءبىر جاسقا جەتكەن بولۋ كەرەكتىگىن ەسكە سالدى. وسى سەبەپتى دە، نۇر- سۇلتان قالاسىنىڭ باس يمامى: «ءبىر جاسقا تولماعان قويلار قۇرباندىقتىڭ ورنىنا جۇرمەي قالۋى مۇمكىن» دەپ، بازارداعى ارىق توقتىلاردىڭ شاريعات تالابىنا ساي كەلمەيتىنىن ايتىپ ساقتاندىرعان بولاتىن.
«بۇل - ەربولات ءجۇسىپوۆتىڭ نەمەسە باسقا ءبىر ءدىن قىزمەتكەرىنىڭ ويدان شىعارعان ۇكىمى ەمەس. يسلام شاريعاتىنىڭ تالابى وسى. قوي مەن ەشكى ءبىر جاسقا جەتۋ كەرەك. ۇلكەندىگى ءبىر جاسار قويعا ۇقساس التى ايعا تولعان سەمىز ءارى ءىرى قويدى دا قۇرباندىققا شالۋعا رۇقسات ەتىلەدى. ال، ءىرى قارا ەكى جاسقا، تۇيە بەس جاسقا تولۋى شارت. مىنەكەي، وسى ايتىلعان ءپاتۋاعا وراي، ەربولات ءجۇسىپوۆ ءدال قازىرگى ەلوردا بازارلارىنداعى مال باعاسىن ساراپتاي كەلە، 35-40 مىڭ تەڭگەگە التى ايعا تولماعان، ارىق توقتى عانا كەلەتىنىن ەسكەرتتى. ول توقتىلاردىڭ قۇرباندىق ورنىنا جۇرمەي قالۋى مۇمكىن ەكەنىن ايتتى. سونداي- اق، بۇل باعا تەك ەلوردا تۇرعىندارى ءۇشىن ەكەنىن ەسكەرتە كەتەيىك، qurban2020.kz سايتىندا ەلىمىزدىڭ ءار وڭىرلەرىندەگى مال باعاسى دا ءارتۇرلى كورسەتىلگەن. وسى رەتتە تاعى ءبىر ايتا كەتەر جايت، بيىلعى كارانتين رەجيمىنە سايكەس ق م د ب «زەكەت» قورىنىڭ ۇيىمداستىرۋىمەن جۇزەگە اسىپ وتىرعان «وكىلدىك (ونلاين) قۇربان شالۋ» جوباسى اياسىندا ق م د ب مال باعاسىن رەتتەۋگە ارالاسپايدى»، - قوستى باسپا ءسوز حاتشىسى.
سونداي- اق ول ال باعاسى جەرگىلىكتى نارىق باعاسىمەن كورسەتىلگەندىگىن ايتادى. تاپسىرىس بەرۋشىدەن تۇسكەن قاراجات مال يەسىنە، ياعني ساتۋشىعا تىكەلەي بەرىلەدى. ويتكەنى بۇل دەلدالدىق قىزمەت ەمەس. كورسەتىلگەن سوماعا قاساپشىنىڭ قىزمەتى عانا كىرەدى. ال قۇرباندىق ەتىن بولشەكتەپ، مۇقتاج جاندارعا تاراتۋ سىندى بارلىق ۇيىمداستىرۋ جۇمىستارى مەشىت جاماعاتى مەن ەرىكتىلەردىڭ كومەگى ارقىلى تەگىن جۇزەگە اسادى. بۇل قۇربان شالۋعا تاپسىرىس بەرۋشى ازاماتتار ءۇشىن ۇلكەن جەڭىلدىك.
«ءسوز سوڭىندا ايتارىمىز، قاسيەتتى قۇربان ايت مەرەكەسى قارساڭىندا حالىقتى اۋرە- سارساڭعا ءتۇسىرىپ، قىزىل ءسوزدى قۇبىلتا بەرۋ قيسىنسىز ارەكەت. سايت بەتىندە قىزدى- قىزدىمەن اسىل دىنىمىزگە ءتىل تيگىزىپ، شاريعاتتى مانسۇقتاعان پىكىرلەرگە دە ورىن بەرىلىپتى. بىلمەستىكپەن ايتقان ءبىر بولەك، دەگەنمەن يسلامعا ءتىل تيگىزىپ، ورىنسىز پىكىر ايتۋدىڭ دا اۋىرلىعى بارىن بىلە جۇرگەنىمىز ءجون. اللا تاعالا بارشامىزعا سابىرلىق بەرىپ، ۇلىق مەرەكەنى لايىقتى دارەجەسىندە وتكەرۋگە جازعاي! تىلەگەن دۇعا- تىلەكتەرىمىز، شالعان قۇرباندىقتارىمىز قابىل بولعاي!»، - دەپ قورىتتى ايدوس يمانتاي.