الەكسەي سوي كوشەدە ماسكا تاعۋ حالىققا نەلىكتەن مىندەتتەلىپ وتىرعانىن ءتۇسىندىردى

نۇر- سۇلتان. قازاقپارات - دەنساۋلىق ساقتاۋ ءمينيسترى الەكسەي تسوي كوشەدە ماسكا تاعۋ حالىققا نەلىكتەن مىندەتتەلىپ وتىرعانىن ءتۇسىندىردى، دەپ حابارلايدى قازاقپارات ءتىلشىسى.

«قازىرگى تاڭدا قازاقستاندا كوروناۆيرۋس ينفەكتسياسىن جۇقتىرۋ جاعدايى تاۋلىگىنە 1500-1600 ادام دەڭگەيىندە تۇراقتالىپ قالدى. ماسەلەن نۇر- سۇلتاندا جەدەل جاردەمگە جۇگىنۋ 22 - ماۋسىمنان 30 - شىلدە ارالىعىندا ۇشتەن ەكىگە ازايدى. سونىمەن بىرگە كوروناۆيرۋس ينفەكتسياسى بويىنشا شاقىرتۋلار تاۋلىگىنە 500 دەن 86 عا دەيىن تومەندەدى. سول سەكىلدى جەدەل جاردەمدى شاقىرۋ جاعدايى 3 مىڭنان 1 مىڭعا دەيىن ءتۇستى. ستاتسيونارلاردىڭ تولىمدىلىعى 96 پايىزدان 35,7 پايىزعا دەيىن ازايدى»، - دەدى الەكسەي سوي و ك ق- دا وتكەن باسپا ءسوز ءماسليحاتىندا.

مينيستر سونىمەن قاتار شىمكەنت قالاسىندا دا جەدەل جاردەم قىزمەتىن شاقىرۋ دەڭگەيى 43 پايىزعا كەمىگەنىن ايتىپ ءوتتى.

«بۇكىل قازاقستان بويىنشا پروۆيزورلىق ستاتسيونارلار دا جابىلۋدا. بۇرىنعى، ياعني قالىپتى جۇمىس تارتىبىنە ورالىپ جاتىر. ولار قازىر رەزەرۆتە. توسەك ورىندارى بويىنشا قوسىمشا قاجەتتىلىك تۋىنداعان جاعدايدا ولار قوسىمشا جاساقتالادى»، - دەدى ول.

الەكسەي سوي كارانتين تاعى ەكى اپتاعا سوزىلاتىندىقتان بۇكىل ەل بولىپ، كاسىپ يەلەرى بولىپ قالىپتى ومىرگە قايتۋ ءۇشىن دايىندىق جۇمىستارى جۇرگىزىلۋى كەرەكتىگىن جەتكىزدى.

«دەنساۋلىق ساقتاۋ مينيسترلىگى كوروناۆيرۋس ينفەكتسياسىنىڭ تارالۋ قاۋپىن ەسكەرتۋ ءۇشىن حالىقتىڭ كارانتين تالاپتارىن ساقتاۋىنا قاتىستى ءبىرقاتار ۇيىمداستىرۋشىلىق جانە قۇقىقتىق شارالار قابىلداندى. دەنساۋلىق ساقتاۋ مينيسترلىگى جاۋاپتى ورگاندارمەن بىرگە ازاماتتاردى كارانتين شارالارىن ساقتاماعان جاعدايدا اكىمشىلىك جاۋاپكەرشىلىككە تارتۋ ءتارتىبىن بەكىتتى. بۇل رەتتە ماسكانى تاعىپ ءجۇرۋ – ك ۆ ي- دى جۇقتىرۋ قاۋپىن 30 پايىزعا ازايتادى. وسى جايدى ەسكەرە وتىرىپ، 2020 -جىلدىڭ 30 -شىلدەسىنەن باستاپ دەنساۋلىق ساقتاۋ مينيسترلىگى بۇيرىق شىعاردى. وعان سايكەس ازاماتتار قوعامدىق ورىندا، كوشەدە ماسكا تاعىپ جۇرۋگە مىندەتتەلەدى»، - دەدى ول.

سونداي- اق الەكسەي سوي بۇگىنگى كۇنى ا ق ش- تىڭ 43 شتاتىندا، پولشادا، اۆستراليادا، سلوۆاكيا مەن ۆەتنامدا قوعامدىق ورىندا ماسكا تاعۋ مىندەتتى ەكەندىگىن جەتكىزدى. ەسكە سالا كەتسەك، قازاقستاننىڭ مەملەكەتتىك باس سانيتارلىق دارىگەرى ايجان ەسماعامبەتوۆانىڭ قاۋلىسى بويىنشا حالىققا قازاقستاندا كوشەدە مىندەتتى تۇردە ماسكا تاعىپ ءجۇرۋ مىندەتتەلگەن بولاتىن.