باتىس قازاقستاندا ايەلى مەن ەكى قىزىن ولتىرگەن تۇرعىن ءومىر بويىنا باس بوستاندىعىنان ايىرىلدى

ورال. قازاقپارات – ب ق و قىلمىستىق ىستەر جونىندەگى مامانداندىرىلعان اۋدانارالىق سوتىندا سەرىك قاپيزوۆقا قاتىستى ۇكىم شىقتى، دەپ حابارلايدى قازاقپارات ءتىلشىسى.

اتالعان سوتتىڭ باسپا ءسوز قىزمەتى ءمالىم ەتكەنىندەي، س. قاپيزوۆقا ق ر ق ك 99-بابى 3-بولىگى، 202-بابى 2-بولىگى 1 جانە 5-تارماقتارىنا سايكەس ايىپتاۋ ۇكىمى شىعارىلدى. سوت تالقىسىندا بەلگىلى بولعانىنداي، بيىلعى ناۋرىز ايىندا جۇبايى ج- عا جەڭىل دارەجەدە دەنە جاراقاتىن كەلتىرگەنى ءۇشىن قاپيزوۆ قاماۋعا الىنعان. وسى كەزدە ج. نەكەنى بۇزۋ تۋرالى تالاپ- ارىز بەرگەن. بيىلعى 9 -ساۋىردە س. قاپيزوۆ ايەلى تۇراتىن ءۇيدىڭ ەسىگىن بۇزىپ كىرىپ، بەنزين شاشىپ، وت قويعان. سونىڭ سالدارىنان ج. مەن ونىڭ ەكى قىزى قازا تاپقان. ءۇي يەسىنە 3 ميلليون تەڭگە زالال كەلتىرىلگەن. سوتتالۋشى ادامداردى، سونىڭ ىشىندە جاس بالالاردى اسا قاتىگەزدىكپەن ولتىرگەنى جانە مۇلىكتى قاساقانا جويعانى ءۇشىن ايىپتى دەپ تانىلدى. ونىڭ كىناسى كۋالاردىڭ ايعاقتارىمەن جانە ساراپتاما قورىتىندىلارىمەن دالەلدەندى. وسىلايشا س. قاپيزوۆ ءومىر بويىنا باس بوستاندىعىنان ايىرىلدى. ول جازاسىن قاۋىپسىزدىگى توتەنشە قىلمىستىق- اتقارۋ جۇيەسى مەكەمەسىندە، سونىڭ ىشىندە العاشقى بەس جىلىن قاۋىپسىزدىگى تولىق مەكەمەدە وتەيدى. سوت ۇكىمى كۇشىنە ەنگەن جوق.

ەسكە سالا كەتەيىك، بۇدان بۇرىن ب ق و- دا تۇرعىن ۇيدەگى ءورت ورنىنان ايەل مەن ونىڭ ەكى قىزىنىڭ مۇردەسى تابىلعانىن، كەيىن ولاردى ولتىرگەن تۇرعىننىڭ قاماۋعا الىنعانىن جازعان بولاتىنبىز.