قازاقستاندا كوشەدە مىندەتتى تۇردە ماسكا تاعىپ ءجۇرۋ كەرەك - قاۋلى

نۇر-سۇلتان. قازاقپارات - قازاقستاننىڭ مەملەكەتتىك باس سانيتارلىق دارىگەرى ايجان ەسماعامبەتوۆا 2020 -جىلدىڭ 27-شىلدەسىندە «قازاقستان رەسپۋبليكاسىنىڭ مەملەكەتتىك باس سانيتارلىق دارىگەرىنىڭ 2020 -جىلدىڭ 26-ماۋسىمىنداعى №43-قاۋلىسىنا وزگەرىستەر مەن تولىقتىرۋلار ەنگىزۋ تۋرالى» جاڭا قاۋلىعا قول قويدى.

جاڭا ەرەجەگە سايكەس قازاقستاندىقتار جابىق نىساندارمەن بىرگە كوشەدە جانە كولىكتە ماسكا تاعىپ جۇرۋگە مىندەتتەلدى، دەپ حابارلايدى قازاقپارات.

قاۋلىدا كورسەتىلگەندەي، حالىق ءۇشىن مىنا جاعدايلاردا ماسكا تاعۋعا مىندەتتەلەدى:

- جابىق نىسانداردا (ءدارىحانا، دۇكەن، كەڭسە، مەديتسينالىق ۇيىم، حالىققا قىزمەت كورسەتۋ سالاسىنداعى ۇيىمدار مەن باسقا جەرلەردە)، سونىمەن بىرگە كولىكتە جانە كوشەدە جۇرگەندە؛

- COVID-19 اۋرۋى بويىنشا كۇدىكتى ادامعا كومەكتەسەتىن ساۋ ازاماتتارعا؛

- كوروناۆيرۋس ينفەكسياسىنا ۇقساس اۋرۋ بەلگىلەرى پايدا بولعان جاعدايدا (دەنە قىزۋىنىڭ كوتەرىلۋى، جوتەل نەمەسە تۇشكىرۋ)؛ قاۋلىنىڭ بۇل بولىگى مىندەتتى تۇردە ورىندالۋعا جاتادى.

بۇل تالاپ ساقتالماعان جاعدايدا كىنالىلەر اكىمشىلىك جاۋاپكەرشىلىككە تارتىلادى.